အင်ကြင်း/People’s Spring
မန္တလေးတိုင်း၊ မတ္တရာမြို့နယ်တွင် အထိနာနေသည့် စစ်ကောင်စီတပ်က ကျေးရွာများအား လက်နက်ကြီးဖြင့်ပစ်၍ ပြည်သူတစ်ဦး ဒဏ်ရာရကာ နေအိမ်တစ်လုံး မီးလောင်ပျက်စီးခဲ့ကြောင်း ဒေသခံများက ပြောသည်။
ယမန်နေ့(အောက်တိုဘာ ၁၄ရက်) ညနေ ၃ နာရီခွဲခန့်က မတ္တရာမြို့ပေါ်ရှိဝစစ်ကောင်စီတပ်က လက်နက်ကြီးဖြင့် ၃လုံးပစ်ခတ်ရာ အောက်တောင်ကိုင်းကျေးရွာသို့ ကျရောက်ခဲ့သည်။
Public Service Announcement
လက်နက်ကြီးကျည်များမှာ ရွာတွင်း တစ်လုံး၊ ရွာအပြင် နှစ်လုံးကျရောက်ခဲ့ပြီး အမျိုးသမီးတစ်ဦး ထိမှန်ထိခိုက်ဒဏ်ရာရကာ နေအိမ်တစ်လုံးမီးလောင်ပျက်စီးခဲ့ကြောင်း မတ္တရာနယ်အခြေစိုက် စစ်ရှောင်ကူညီနေသည့် ရောင်နီနွေဦးအဖွဲ့က ပြောသည်။
“ဒဏ်ရာရတဲ့ အမျိုးသမီးက မစိုးရိမ်ရဘူး။ တိုက်ပွဲရှိလို့ ပစ်တာမဟုတ်ဘူး။ မြို့ပေါ်ကရမ်းသမ်းပစ်တာ။”ဟု ရောင်နီနွေဦးအဖွဲ့တာဝန်ခံက ပြောသည်။
ထို့အပြင် ယမန်နေ့ ညနေ ၃ နာရီခန့်ကလည်း
မတ္တရာမြို့နယ်၊ တုံကုန်းကျေးရွာသို့ ရောက်ရှိလာသော စစ်ကောင်စီတပ်က နေအိမ်များ မီးရှို့ဖျက်ဆီးသွားကြောင်း ဒေသခံများက ပြောသည်။
ပြည်သူများအနေဖြင့် စစ်ကောင်စီတပ်နှင့် ဝေးရာတွင်နေထိုင်ကြရန်နှင့် လက်နက်ကြီးသံကို အမြဲနားစွင့်ရှောင်ရှားကြရန် ရောင်နီနွေဦးအဖွဲ့က သတိပေးထားသည်။
မတ္တရာမြို့နယ်အတွင်းရှိ ပြည်သူ့ကာကွယ်ရေးတပ်မတော် (မန္တလေး)မှ သိမ်းယူထားသော တပ်စခန်းများ ပြန်လည်ရရှိရန် စစ်ကောင်စီမှ လက်နက်ကြီး နှင့် လေကြောင်းတိုက်ခိုက်မှုများသာမက မြေပြင်စစ်ကြောင်းများပါ အသုံးပြု၍ တန်ပြန်ထိုးစစ်ဆင်နေကြောင်း၊ သိမ်းထားသော စခန်းများအား အပြည့်အဝထိန်းချုပ်ထားဆဲဖြစ်ကြောင်း မန္တလေး PDFက အသိပေးထားသည်။
