နောင်ချိုမြို့လေကြောင်းတိုက်ခိုက်မှု ပြည်သူတစ်ဦးသေ၊ တစ်ဦးဒဏ်ရာရ

ဟန်နွေ/People’s Spring

စစ်ကောင်စီတပ်က နောင်ချိုမြို့နယ်နှင့် သိန္နီမြို့နယ်တို့ကို လေကြောင်းတိုက်ခိုက်ခဲ့ရာ နောင်ချိုဖြစ်စဉ်တွင် ဒေသခံတစ်ဦး သေဆုံးပြီး တစ်ဦး ဒဏ်ရာရရှိခဲ့ကြောင်းနှင့် သိန္နီမြို့လေကြောင်းတိုက်ခိုက်မှုဖြစ်စဉ်တွင် လူထိခိုက် သေဆုံးမှုမရှိကြောင်း သတင်းရရှိသည်။

တအာင်းတပ်မတော်(TNLA)ထိန်းချုပ်ထားသည့် နောင်ချိုမြို့ကို စစ်ကောင်စီက အောက်တိုဘာ ၂၇ရက် ညပိုင်းတွင် ဖျက်အားပြင်း ဗုံးများအပါအဝင် ဗုံး ၁၁လုံး ကြဲချ တိုက်ခိုက်ခဲ့ခြင်းဖြစ်သည်ဟု ဆိုသည်။

ထိုသို့ တိုက်ခိုက်မှုကြောင့် နောင်ချိုမြို့နယ် သပြေရပ်ကွက်နေ အသက်(၆၀)အရွယ် အမျိုးသားတစ်ဦး သေဆုံးပြီး အသက် (၅၀) ဝန်းကျင်ရှိ အမျိုးသမီးတစ်ဦး ဒဏ်ရာရရှိကာ နေအိမ် သုံးလုံးပျက်စီးခဲ့ဟု TNLAက ထုတ်ပြန်သည်။

Public Service Announcement

စစ်ကောင်စီတပ်သည် ယနေ့နံနက် အစောပိုင်းကလည်း မုံးစီးဒေသကို ဗုံးကြဲချတိုက်ခိုက်ခဲ့ရာ လူနေအိမ် ပျက်စီးမှု ရှိခဲ့သည်ဟု အသိပေးသည်။

၁၀၂၇စစ်ဆင်ရေးတွင် စစ်ရှုံးနေသည့် စစ်ကောင်စီတပ်သည် တိုက်ပွဲဖြစ်ပွားခြင်းမရှိတော့သည့် မြို့နယ်၊ ကျေးရွာနှင့် နေရာဒေသများကို လေကြောင်းဖြင့် နေ့စဉ်ရက်စက် အသုံးပြုတိုက်ခိုက်ခဲ့ခြင်း ဖြစ်ကြောင်း ၊ ဒေသခံပြည်သူများအနေဖြင့် ထိခိုက်သေဆုံးမှုများ ရှိသကဲ့သို့ ပြည်သူပိုင်နေအိမ်၊ ဘုန်းကြီးကျောင်း၊ စာသင်ကျောင်းနှင့် ဘာသာရေးအဆောက်အဦးများလည်း ထိခိုက်ပျက်စီးမှု အများအပြားရှိခဲ့ဟု TNLAက ထုတ်ပြန်သည်။

ကိုးကန့်တပ်မတော်(MNDAA) ထိန်းချုပ်ထားသည့် သိန္နီကိုလည်း စစ်ကောင်စီက ယမန်နေ့ညက လေကြောင်း ဗုံးကြဲတိုက်ခိုက်ခဲ့ရာ ကချင်ခရစ်ယာန်ဘုရားကျောင်း ပျက်စီးခဲ့ပြီး နေအိမ်နှင်ယာဉ်အချို့လည်း ပျက်စီးခဲ့သည်ဟု MNDAAက ထုတ်ပြန်သည်။

လူနေရပ်ကွက်များတွင် ကျရောက်ခဲ့သော ကျန်ဗုံးများသည် လူနေအိမ်အချို့ ပျက်စီးစေခဲ့ပြီး လမ်းများနှင့် သောက်ရေပိုက်လိုင်းများကဲ့သို့သော အများသူငှာ အဆောက်အဦများ ထိခိုက်ပျက်စီးမှုအမျိုးမျိုးဖြင့် ပျက်စီးခဲ့ရပြီး လူထိခိုက်သေဆုံးမရှိဟု အသိပေးထားသည်။

စစ်ကောင်စီတပ်သည် TNLAနှင့် MNDAA ထိန်းချုပ် ထားသည့် မြို့ရွာများကို လေကြောင်း တိုက်ခိုက်မှုများ ဆက်တိုက်ပြုလုပ်နေခြင်းဖြစ်သည်။