▪︎“ဒီခရီးစဥ်က တရုတ်နဲ့ မြန်မာပြည်သူလူထုအကြား၊ တရုတ်-မြန်မာဆက်ဆံရေးကို အထောက်အကူဖြစ်ဖို့ထက် အဖုအထစ်ဖြစ်သွားနိုင်ဖို့လို့ကို စစ်ကောင်စီကိုပဲ မျက်နှာမူပြီးဆက်ဆံတဲ့ ဆက်ဆံရေးမျိုး ဖြစ်နေလားဆိုတာကို ကျွန်မတို့ စိုးရိမ်မှုရှိတယ်ဆိုတဲ့အကြောင်းကိုတော့ ကျွန်မတို့ အကြောင်းကြားထားပြီးဖြစ်တယ်”
-NUG နိုင်ငံခြားရေးဝန်ကြီး
အီယိုရီ/People’s Spring
အာဏာသိမ်းစစ်ခေါင်းဆောင်မင်းအောင်လှိုင်၏ လက်ရှိ တရုတ်ခရီးစဥ်သည် နိုင်ငံတော်တရားဝင်ခရီးစဥ်(State Visit)မဟုတ်ဘဲ တရုတ်နိုင်ငံ ပြည်နယ်တစ်ခု၌ ပြုလုပ်သော ဒေသတွင်းဖိုရမ်(Regional Forum)တစ်ခုကို တက်ရောက်စေခြင်းသာဖြစ်သည်ဟု တရုတ်နိုင်ငံဘက်မှ သတင်းစကားပြန်လည်ရရှိခဲ့ကြောင်း NUG နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။
အမျိုးသားညီညွတ်ရေးအစိုးရ NUG၊ကရင်အမျိုးသားအစည်းအရုံး KNU၊ ကရင်နီအမျိုးသားတိုးတက်ရေးပါတီ KNPP နှင့် ချင်းအမျိုးသားတပ်ဦး CNF တို့က ယနေ့(နိုဝင်ဘာ ၅ရက်)ပူးတွဲသတင်းစာရှင်းလင်းပွဲပြုလုပ်ရာ NUG နိုင်ငံခြားရေးဝန်ကြီးက ယနေ့စတင်သော စစ်ခေါင်းဆောင်မင်းအောင်လှိုင်၏ တရုတ်ခရီးစဥ်နှင့်ပတ်သက်၍ ဖြေကြားခဲ့ခြင်းဖြစ်သည်။
Public Service Announcement
“ကျွန်မတို့ သဘောထားက အင်မတန်မှ ရှင်းလင်းပါတယ်။ ဒီတွေ့ဆုံမှု၊ ဒီလိုမျိုးဖိတ်ကြားမှု ဒီခရီးစဥ်က တရုတ်နဲ့ မြန်မာပြည်သူလူထုအကြား၊ တရုတ်-မြန်မာဆက်ဆံရေးကို အထောက်အကူဖြစ်ဖို့ထက် အဖုအထစ်ဖြစ်သွားနိုင်ဖို့လို့ကို စစ်ကောင်စီကိုပဲ မျက်နှာမူပြီးဆက်ဆံတဲ့ ဆက်ဆံရေးမျိုး ဖြစ်နေလားဆိုတာကို ကျွန်မတို့ စိုးရိမ်မှုရှိတယ်ဆိုတဲ့အကြောင်းကိုတော့ ကျွန်မတို့ အကြောင်းကြားထားပြီးဖြစ်တယ်။ နောက်ပိုင်း သိရသလောက်က state visit မဟုတ်ဘူး။ ပြည်နယ်တစ်ခုမှာပဲလုပ်တဲ့ regional forum တစ်ခုကို တက်ရောက်တာသာလျှင်ဖြစ်တယ်ဆိုတာကို ကျွန်မတို့ သတင်းစကားပြန်ရရှိခဲ့တာ ရှိပါတယ်”ဟု နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။
တရုတ်နိုင်ငံဘက်မှ မည်သည့်ဌာန၊ မည်သို့သော အဆင့်ရှိသူက NUG ကို ပြန်လည်သတင်းစကားပေးပို့ခဲ့သည်ကိုမူ ရှင်းရှင်းလင်းလင်းမသိရပေ။ သို့သော် NUG သည် တရုတ်နှင့် ဆက်ဆံရေးချန်နယ်များထားရှိကြောင်း နိုင်ငံခြားရေးဝန်ကြီးက ပြောသည်။
“သို့သော် ဒီ channel တွေက အသံတွေကို ဘေဂျင်း(တရုတ်အစိုးရ)အနေနဲ့ ဘယ်လောက်အထိ နားထောင်သလဲ ဆိုတာကတော့ ကျွန်မတို့အနေနဲ့ အခုအချိန်အထိ အကြီးအကျယ်စိန်ခေါ်မှု ရှိနေဆဲပဲဖြစ်ပါတယ်”ဟု ဝန်ကြီး ဒေါ်ဇင်မာအောင်က ယနေ့သတင်းစာရှင်းလင်းပွဲ၌ ပြောသည်။
စစ်ခေါင်းဆောင်မင်းအောင်လှိုင်သည် ယနေ့(နိုဝင်ဘာ ၅ ရက်) နံနက်အစောပိုင်းတွင် တရုတ်သို့ ထွက်ခွာသွားပြီး နိုဝင်ဘာ ၆-၇ရက်များတွင် ကူမင်းမြို့၌ ပြုလုပ်မည့် ကျင်းပမည့် (၈)ကြိမ်မြောက် မဲခေါင်ဒေသခေါင်းဆောင်များ GMS(Greater Mekong Subregion) ထိပ်သီးညီလာခံ တက်ရောက်မည်ဟု သိရသည်။ မင်းအောင်လှိုင်၏ အဆိုပါခရီးစဥ်သည် စစ်အာဏာသိမ်းမှု ၄နှစ်နီးပါးအတွင်း တရုတ်နိုင်ငံသို့ ပထမဆုံးအကြိမ်သွားရောက်ခြင်းဖြစ်သည်။
မင်းအောင်လှိုင်၏ တရုတ်ခရီးစဥ်မတိုင်မီ ယင်းခရီးစဥ်နှင့်ပတ်သက်၍ ပြန်လည်သုံးသပ်ပေးရန် NUG က တရုတ်နိုင်ငံခြားရေးဝန်ကြီးဌာနထံ မေတ္တာရပ်ခံစာ ပေးပို့ခဲ့ကြောင်း သိရသည်။တရုတ်နိုင်ငံအနေဖြင့် ယင်းသို့ ဖိတ်ကြားခြင်း၊ဆောင်ရွက်ခြင်းက စစ်ကောင်စီကို အသိအမှတ်ပြုလိုက်သလို မဖြစ်ရန် လိုအပ်ကြောင်းလည်း မေတ္တာရပ်ခံစာ၌ ဖော်ပြထားသည်ဟု ဝန်ကြီး ဒေါ်ဇင်မာအောင်က ပြောသည်။
GMSထိပ်သီးညီလာခံကို တရုတ်ဝန်ကြီးချုပ် Li Qiang ဦးဆောင်ကျင်းပမည်ဖြစ်ပြီး စစ်ခေါင်းဆောင်မင်းအောင်လှိုင်သည် ဝန်ကြီးချုပ် Li နှင့်သာ တွေ့ဆုံခွင့်ရှိမည်ဖြစ်ကာ သမ္မတရှီကျင့်ဖျင်နှင့် တွေ့ဆုံခွင့် ရမည်မဟုတ်ကြောင်း သတင်းရင်းမြစ်အချို့က ပြောသည်။
တရုတ်နိုင်ငံက စစ်ခေါင်းဆောင်မင်းအောင်လှိုင်နှင့် စစ်ကောင်စီကို ထိတွေ့ဆက်ဆံနေမှုမှာ နှစ်နိုင်ငံအကြား Bilateral ဆက်ဆံမှုအဆင့်သို့ မရောက်ရှိသေးဘဲ ဒေသတွင်းနိုင်ငံများပါဝင်သော Multilateral ဘောင်အတွင်း၌ပင် ရှိသေးကြောင်း နိုင်ငံရေးလေ့လာစောင့်ကြည့်သူ၊ ဆောင်းပါးရှင် Otto က သုံးသပ်ထားသည်။
စစ်ကောင်စီ ဝါဒဖြန့် တယ်လီဂရန်များ နှင့်မီဒီယာများတွင်မူအာဏာသိမ်းခေါင်းဆောင်၏ တရုတ်ခရီးစဥ်ကို နိုင်ငံတော်အဆင့် ခရီးစဥ်ဖြစ်ပြီး တရုတ်နိုင်ငံအကြီးအကဲများက ကြိုဆိုကြသည်ဟု ရေးသားဝါဒဖြန့်နေကြသည်။ အာဏာသိမ်းခေါင်းဆောင် တရုတ်သို့ နေပြည်တော်လေဆိပ်မှ နိုဝင်ဘာ ၅ ရက် မနက်အစော ထွက်ခွာသွားပြီး ၂ နာရီ ခန့်အကြာတွင် လေဆိပ်၌ လက်လုပ်မိုင်းပေါက်ကွဲခဲ့သည်။ လက်လုပ်မိုင်းပေါက်ကွဲမှုသတင်းကို စစ်ကောင်စီက ဖုံးကွယ်ထားပြီး အသေခံ ဒရုန်း ၂ စင်း ကို လေဆိပ် ပြင်ပတွင် စစ်ကောင်စီက ပစ်ချဖျက်ဆီးနိုင်ခဲ့သည်ဟု သတင်းထုတ်လွှင့်ဖြန့်ချီနေသည်။
