ဟန်နွေ/People’s Spring
ဆီဆိုင်မြို့နယ် ပအိုဝ်းအမျိုးသားလွတ်မြောက်ရေးတပ်မတော် (PNLO/PNLA)တပ်ရှိရာသို့ စစ်ကောင်စီတပ်နှင့် လက်အောက်ခံ PNO ပြည်သူ့စစ်များက ထိုးစစ်ဆင်လာ၍ ယနေ့(နိုတင်ဘာ ၂၀ရက်)တိုက်ပွဲဖြစ်ပွားလျက်ရှိကြောင်း PNLA ပြောရေးဆိုခွင့်ရှိသူ ခွန်ရိန်းယံက ပြောသည်။
စစ်ကောင်စီတပ်နှင့် ၎င်းတို့လက်အောက်ခံ PNO ပြည်သူ့စစ်က အများပြည်သူအသုံးပြုနေသည့် ဆိုက်ခေါင် – ဟိုနမ့်ပွန်ချောင်းတံတားကို စစ်ကောင်စီက ယနေ့ နံနက်တွင် လေယာဉ်ဖြင့် ဗုံးသုံးကြိမ် ကြဲချတိုက်ခိုက်ခဲ့ပြီး မြေပြင်မှလည်း ထိုးစစ်ဆင်နေခြင်းဖြစ်သည်ဟု ဆိုသည်။
“ အခု မြေပြင် အခြေအနေ အသေးစိတ် မသိရသေးပါဘူး။ ဒီမနက် ၁၀နာရီခွဲမှာ စစ်ကောင်စီက အများပြည်သူ အသုံးပြုနေတဲ့ ပွန်ချောင်းတံတားကို ဗုံး ၃လုံး ကြဲချသွားပါတယ်။ ပြီးတော့ ပွန်ချောင်းတံတားအနီးမှာလည်း ထိတွေ့တိုက်ပွဲတွေဖြစ်ပွားနေပါတယ်။အဓိကကတော့ ကျနော်တို့ ရှိနေတဲ့နေရာတွေကို စစ်ကောင်စီနဲ့ စစ်ကောင်စီ လက်အောက်ခံ ပြည်သူ့စစ်တွေက ထိုးစစ်ဆင်လာလို့ တိုက်ပွဲဖြစ်ပွားရခြင်းဖြစ်ပါတယ်”ဟု ခွန်ရိန်းယံက ပြောသည်။
Public Service Announcement
ပွန်ချောင်းတံတားသည် ဆီဆိုင်မြို့နယ်နှင့် မောက်မယ်မြို့နယ်ကို ဆက်သွယ်ထားသည့် တံတားဖြစ်သည်။
စစ်ကောင်စီနှင့်စစ်ကောင်စီလက်အောက်ခံ PNO ပြည်သူ့စစ်က အင်အားဖြည့်တင်းကာ PNLO နယ်မြေထဲသို့ ဝင်ရောက်ကျူးကျော်တိုက်ခိုက်ရန် လုပ်ဆောင်လျက်ရှိသည်ဟုလည်း PNLAက ထုတ်ပြန်သည်။
ပအိုဝ်းဒေသ တိုက်ပွဲအခြေအနေများကို ဆက်လက်စုံစမ်းဆဲဖြစ်သည်။ PNLAသည် ယခုနှစ် ဇန်နဝါရီတွင် စစ်ကောင်စီတပ်ကို ပြန်လည်တိုက်ခိုက်ခဲ့ခြင်းဖြစ်ပြီး ဆီဆိုင်မြို့နယ်အတွင်း စစ်ကောင်စီတပ်နှင့် တိုက်ပွဲပြင်းထန်စွာဖြစ်ပွားခဲ့သည်။ ဆီဆိုင်မြို့ကို PNLAနှင့် မဟာမိတ်များက သိမ်းပိုက်ထားနိုင်ခဲ့သော်လည်း စစ်ကောင်စီက လေကြောင်း၊ လက်နက်ကြီး ပစ်ကူနှင့် မြေပြင် မှအင်အားအလုံးအရင်းဖြည့်တင်း၍ ပြန်လည်နေရာယူထားခြင်းဖြစ်သည်။
