ထိုင်းမှာ စစ်ဆေးရေးဂိတ်ကို ရှောင်​မောင်းရင်း ယာဉ်မတော်တဆမှုဖြစ်လို့ မြန်မာ ၇ ဦးသေဆုံး

-People’s Spring

ထိုင်းသတင်းဌာန Khaosodရဲ့ ဖော်ပြချက်အရ နိုဝင်ဘာ ၁၉ ရက်နေ့ ညသန်းခေါင်ကျော်၊ နိုဝင်ဘာ ၂၀ ရက်နေ့ မနက်အစောပိုင်းတုန်းက နက်ခွန်ပါသွမ် ခရိုင်၊ ဘန်လန် ခရိုင်ထဲက ကျေးရွာ အမှတ် ၈ နားမှာ ပစ်ကပ်ကား တစ်စီးက ဓာတ်တိုင်ကို တိုက်ပြီး လမ်းဘေး တူးမြောင်းထဲ ထိုးကျခဲ့တာလို့ သိရပါတယ်။

အဲဒီကားဟာရဲတပ်ဖွဲ့ရဲ့စစ်ဆေးရေးဂိတ်ကို ရှောင်တိမ်းပြီး မောင်းပြေးရာက လမ်းကွေ့တစ်ခုမှာ အရှိန်မထိန်းနိုင်ဘဲ လမ်းချော်ထွက်ခဲ့ရာက နောက်ဆက်တွဲ ဆိုးရွားတဲ့ အခြေအနေတွေ ကြုံတွေ့သွားခဲ့တာလို့ ရဲတွေက ပြောပါတယ်။

သေဆုံးသူတွေဟာ မြန်မာနိုင်ငံသားတွေချည်း ဖြစ်ပြီး အမျိုးသား ၂ ဦးနဲ့ အမျိုးသမီး ၅ ဦးလို့ ဆိုပါတယ်။ သူတို့ဟာ ယာဉ်တိုက်မှုမှာ သေဆုံးတာလား၊ ရေနစ်သေဆုံးတာလား ဆိုတာကိုတော့ ထိုင်းသတင်းဌာနက ဖော်ပြမထားပါဘူး။

Public Service Announcement

ရုပ်အလောင်းတွေကို ဒေသခံ လူမှုကူညီရေး အသင်းတွေက ဆေးရုံကို ပို့ဆောင်ခဲ့ပါတယ်။ အလောင်းတွေကို သေမှုသေခင်းဆိုင်ရာ ရင်ခွဲစစ်ဆေးမှုတွေ ပြုလုပ်သွားမယ်လို့လည်း ရဲတွေက ပြောကြားထားပါတယ်။

ကိုးကား- Khaosod English