အိမ်သွင်/People’s Spring
မကွေးတိုင်း၊ ထီးလင်းမြို့နယ်တွင် စစ်ဆင်ရေးများ ပိုမိုပြင်းထန်လာမည်ဖြစ်သဖြင့် မြို့ပေါ် နေထိုင်သူများအားလုံး ဒီဇင်ဘာ ၃၁ရက် နောက်ဆုံးထား မြို့ပေါ်မှထွက်ခွာကြရန် အဆိုပါမြို့နယ်ပြည်သူ့အုပ်ချုပ်ရေးအဖွဲ့(ပအဖ)က သတင်းထုတ်ပြန်သည်။
ထီးလင်းမြို့ခံများအနေဖြင့် အမျိုးသား ညီညွတ်ရေးအစိုးရ(NUG)၏ စိုးမိုးနယ်မြေများသို့ လာရောက်ခိုလှုံကြရန် ထီးလင်းမြို့နယ် ပအဖက အသိပေးသည်။
ထီးလင်းမြို့ပေါ်နေ ပြည်သူများသိရှိစေရန် အထူး သတိပေး ထုတ်ပြန်ကြေညာခြင်းဟုဆိုကာ ပအဖက ဒီဇင်ဘာ ၅ရက်တွင် ထုတ်ပြန်ခြင်းဖြစ်သည်။
Public Service Announcement
မြို့ပေါ်နေ ပြည်သူများအနေဖြင့် အမျိုးသား ညီညွတ်ရေးအစိုးရ၏ စိုးမိုးနယ်မြေများသို့ လာရောက် ခိုလှုံကြရန်နှင့် စစ်ကောင်စီတပ်ဖွဲ့ဝင်များ နှင့် ပျူစောထီးများအမြန်ဆုံး ပြည်သူ့ရင်ခွင်သို့ အလင်းဝင်ရောက်ကြရန်လည်း တိုက်တွန်းထားသည်။
အမျိုးသားညီညွတ်ရေးအစိုးရ၏ ထိန်းချုပ်နယ်မြေအတွင်းရှိ ပြည်သူများ၊ ပအဖ ၊ ပကဖ များနှင့် တပ်ရင်းတပ်ဖွဲ့များက ထီးလင်းမြို့ပေါ်တွင် နေထိုင်သူများအားလုံးကို နွေးထွေးစွာ ကြိုဆိုနေသည်ဟု ဆိုသည်။
သတ်မှတ်ရက်အတွင်း ထီးလင်းမြို့ပေါ်မှ ထွက်ခွာလာခြင်းမရှိပါက နောက်ဆက်တွဲကိစ္စရပ်များကို တာဝန်ယူမည်မဟုတ်ကြောင်း အသိပေးထားသည်။
” ရှောင်ကြတဲ့သူ ရှောင်နေကြပြီ။ စစ်တပ်ဘက်က လူတွေလည်း နေရဲမယ်မထင်ဘူး။ တော်လှန်ရေးဘက်က ထိန်းချုပ်ဧရိယာ ပိုကြီးတယ်။ စစ်တပ်က မြို့ပေါ်ပဲရှိတာ”ဟု ထီးလင်းမြို့မှ ဒေသခံတစ်ဦးက ပြောသည်။
စစ်ကောင်စီတပ်သည် ထီလင်းမြို့ရှိ ရွှေထီးခန်းမ၊ တရားရုံး၊ ထွေအုပ်ရုံး၊ ရဲစခန်း၊ ဘောလုံးကွင်းတို့၌ တပ်စွဲထားပြီး မြို့ပေါ်နေအိမ်အချို့တွင် ပျူစောထီးများအား နေရာချထားသည်ဟု သတင်းရရှိသည်။
” တိုက်ပွဲကြီးဖြစ်လာနိုင်တယ်။ တော်လှန်ရေးဘက်က သတိပေးထားပြီ”ဟု မြို့မှတိမ်းရှောင်ခဲ့သည့် ဒေသခံတဦးက ပြောသည်။
ဂန့်ဂေါခရိုင်အတွင်းရှိ ဂန့်ဂေါ၊ ကျော၊ ထီးလင်း၊ ကျောက်ထု၊ ဆော စသည့် ၅ မြို့နယ်ကို ယောဒေသဟု ခေါ်ဝေါ်ပြီး စစ်ကောင်စီတပ်အား တော်လှန်ရာတွင် စုဖွဲ့မှုအားကောင်းသည့် ဒေသဖြစ်သည်။
ထီးလင်းမြို့သည် ချင်းပြည်နယ်ဖြင့်လည်း ထိစပ်နေပြီး ယောကာကွယ်ရေးတပ်(YDF)အပြင် ဂန့်ဂေါခရိုင်တပ်ရင်းများလည်း အဆိုပါဒေသအတွင်း အခြေစိုက်ထားသည်။
ထီးလင်းမြို့သည် ပခုက္ကူမြို့မှ (၉၇)မိုင်ခန့် ကွာဝေးပြီး ချင်းလူမျိုးအများအပြားလည်း နေထိုင်ကြသည်။
