ဟန်နွေ/People’s Spring
ကချင်ပြည်နယ်၊ မံစီမြို့ရှိ စစ်ကောင်စီတပ်ရင်းဌာနချုပ်များမှ ထွက်ပြေးသွားသည့် စစ်ကောင်စီတပ်သားများအား ကချင်လွတ်လပ်ရေးတပ်မတော်(KIA) ပူးပေါင်းတပ်က လိုက်လံတိုက်ခိုက်ရာ အများအပြား ထပ်မံသေဆုံးခဲ့ဟု စစ်ရေး သတင်းရင်းမြစ်က ပြောသည်။
မံစီမြို့ရှိ ခမရ(၆၀၁)၊ ခမရ(၃၁၉)နှင့် အမြောက်တပ်(၃၅၂)တို့ကို KIA၊ KPDFနှင့် ကျောင်းသားတပ် ABSDFပူးပေါင်းတပ်များက ဇန်နဝါရီ ၈ရက်တွင် အပြီးသတ် သိမ်းနိုင်ခဲ့ခြင်းဖြစ်သည်။
အဆိုပါ တပ်စခန်းများမှ ထွက်ပြေးသွားသည့် စစ်ကောင်စီတပ် အင်အား ၃၀၀ကျော်ရှိပြီး ဇန်နဝါရီ ၁၁ရက်တိုက်ပွဲတွင် စစ်ကောင်စီတပ်ဖွဲ့ဝင် အများအပြား ထပ်မံသေဆုံးခဲ့သည်ဟု သတင်းရင်းမြစ်က ပြောသည်။
Public Service Announcement
KIA ပူးပေါင်းတပ်၏ လိုက်လံတိုက်ခိုက်မှုကြောင့် ထွက်ပြေးသွားသည့် စစ်ကောင်စီတပ်ဖွဲ့များအနက်မှ တပ်ဖွဲ့ဝင် ၁၀၀ကျော် သေဆုံးခဲ့ဟု သတင်းရင်းမြစ်က ပြောသည်။
တိုက်ပွဲဖြစ်ပွားရာ နေရာဒေသနှင့် စစ်ကောင်စီတပ်သေဆုံးထိခိုက်အခြေအနေများ ဆက်လက်စုံစမ်းနေဆဲဖြစ်သည်။
စစ်ရေးသတင်းရင်းမြစ်က စစ်ကောင်စီတပ်ဖွဲ့ဝင်များစွာ သေဆုံးနေသည့် ရုပ်သံမှတ်တမ်းကိုလည်း ယနေ့ လူမှုကွန်ရက်မှတဆင့် ဖော်ပြ အသိပေးခဲ့ရာ တောတွင်းတနေရာ၌ တိုက်ခိုက်ခံရပြီး သေဆုံးနေသည့် ရုပ်အလောင်းများ၊ လက်နက်များ၊ ဒဏ်ရာရသူအချို့ကို တွေ့ရသည်။
” ပြေးလည်းလွတ်မယ်ထင်လို့လား ဒီကောင်တွေ၊ ဒါကတော့ မံစီတပ်က ၃၁၉နဲ့ ၆၀၁ က ပြေးတဲ့သူတွေ ကျနော်တို့ လိုက်သမလာတာ”ဟု ရုပ်သံရိုက်ကူးသူက ပြောကြားနေသည်ကို ကြားရသည်။
KIAနှင့် မဟာမိတ်များသည် ၂၀၂၄ ဒီဇင်ဘာ ၄ရက်တွင် မံစီနှင့်ဗန်းမော်မြို့သိမ်း စစ်ဆင်ရေးကို ဖော်ဆောင်ခဲ့ရာ ၁လကျော်အကြာတွင် မံစီမြို့နယ်တစ်ခုလုံးကို သိမ်းနိုင်ခဲ့ပြီး ဗန်းမော်မြို့ရှိ စစ်ကောင်စီ၏ လက်ကျန်ပင်မစခန်းများကို ဆက်လက်ထိုးစစ်ဆင်လျက်ရှိသည်။
(စစ်ကောင်စီတပ်သားများ၏ သေဆုံးရုပ်အလောင်းများအား လူထုနွေဦး၏ တယ်လီဂရန်ချန်နယ် https://t.me/PeopleSpring တွင် သွားရောက်ကြည့်ရှု့နိုင်ပါသည်)
