'/%3E%3C/svg%3E){kind=small}
ကျော်ဇော/People’s Spring
ပဲခူးတိုင်း၊ မင်းလှမြို့နယ်တွင် တပ်ပြေးသုံးဦးလိုက်ရှာနေသည့် စစ်ကောင်စီတပ်စိပ်နှင့် PDF တပ်ဖွဲ့များ ထိပ်တိုက်တိုးကာ ထိတွေ့တိုက်ပွဲဖြစ်ပွားခဲ့ကြောင်း သာယာဝတီခရိုင် တပ်ရင်း ၃၈၀၂၊ တပ်ခွဲ(၃)မှ ပြန်ကြား ရေးတာဝန်ခံက လူထုနွေဦးသို့ ပြောသည်။
ဖေဖော်ဝါရီ ၁ ရက် နေ့လယ် ၁၂နာရီခန့်က မင်းလှမြို့နယ်၊ စမ်းဘုတ်အုပ်စု၊ ကျွန်းကုန်းကျေးရွာ၊ ချောင်းမကြီးတံတားအနီးသို့ အင်အား ၃၀ခန့်ဖြင့်ရောက်ရှိလာသော စစ်ကောင်စီတပ်နှင့် တပ်ရင်း ၃၈၀၂၊ တပ်ခွဲ(၃)မှ ရဲဘော်များ ထိပ်တိုက်တွေ့ကာ အနီးကပ်တိုက်ပွဲဖြစ်ပွားခဲ့ခြင်းဟု ၎င်းက ပြောသည်။
“သူတို့ကလည်း ထွက်ပြေးသူတွေကိုရှာရင်းက ကျွန်တော်တို့အဖွဲ့နဲ့ ထိတွေ့တိုက်ပွဲဖြစ်တာပါ။ သူတို့လာတာကို ကျွန်တော်တို့လည်းမသိဘူး။ သူတို့ကလည်း ကျွန်တော်တို့ရှိနေတာကိုမမြင်ဘူး။ အနီးကပ်ဖြစ်သွားတာပါ”ဟု တပ်ရင်း ၃၈၀၂၊ တပ်ခွဲ(၃)မှ ပြန်ကြားရေးတာဝန်ခံက လူထုနွေဦးသို့ ပြောသည်။
Public Service Announcement
ထို့သို့ အနီးကပ်တိုက်ပွဲဖြစ်ပွား၍ နှစ်ဘက်လုံး လက်နက်ကြီးအသုံးပြုနိုင်ခြင်းမရှိဘဲ လက် နက်ငယ်များဖြင့် အပြန်အလှန်ပစ်ခတ်မှု ၁၀မိနစ်ကျော်ဖြစ်ပွားပြီး စစ်ကောင်စီဘက်မှ နှစ်ဦးသေဆုံး၍ ငါးဦးထိခိုက်ဒဏ်ရာရသွားကြောင်း ၎င်းက ဆက်ပြောသည်။
အလားတူ ထိတွေ့တိုက်ပွဲတွင် တပ်ခွဲ(၃၀မှ ရဲဘော်နှစ်ဦးထိခိုက်ဒဏ်ရာရခဲ့ပြီး တစ်ဦးမှာ ဦးခေါင်းရှပ်ထိ၍ ကျန်တစ်ဦးမှာ ခြေထောက်ရှပ်ထိခဲ့သော်လည်း စိုးရိမ်ရသည့် အခြေအနေမရှိကြောင်း တပ်ရင်း ၃၈စ၂၊ တပ်ခွဲ(၃)ထံ သိရသည်။
စစ်ကောင်စီတပ်များ လိုက်လံရှာဖွေနေသည့် တပ်သားသုံးဦးသည် အဓမ္မတပ်သားစုစောင်းခံရသည့် စစ်မှုထမ်းအပတ်စဥ်တစ်ခုမှ တပ် သားသစ်များဖြစ်ပြီး မင်းလှအခြေစိုက် ခလရ-၁ မှ စမ်းဘုတ်ရွာစစ်ဆေးရေးဂိတ်သို့ တာဝန်ကျသည်မှာ မကြာသေးဘဲ ထိတွေ့တိုက်ပွဲဖြစ်ပွားသည့် ဖေဖော်ဝါရီ ၁ရက်နံနက်ပိုင်းတွင် ထွက်ပြေးသွားခြင်းဖြစ်ကြောင်း စုံစမ်းသိရသည်။
အထက်ပါ အနီးကပ်ထိတွေ့တိုက်ပွဲတွင် စစ်ကောင်စီဘက်မှ သေဆုံးနှင့် ဒဏ်ရာရတပ်သားများကို သယ်ဆောင်၍ စမ်းဘုတ်ရွာဘက်သို့ ပြန်ဆုတ်သွားကြောင်း တပ်ရင်း ၃၈၀၂၊ တပ်ခွဲ(၃)က အသိပေးထားသည်။
