ရှိန်း/People’s Spring
မန္တလေးကစစ်မှုထမ်းသင်တန်းဆင်းတွေ ရာဂဏန်းလောက်ကို မတ္တရာမြို့နယ်၊ထီးတော်မိုးတပ်သားစုဆောင်းရေးထဲကိုပို့ဆောင်ထားပြီး စစ်တပ်က မတ္တရာမြို့နယ်အရှေ့ခြမ်းကိုစစ်ကြောင်းတွေထိုးလာနိုင်တယ်လို့ မတ္တရာမြို့နယ်က တော်လှန်ရေးတပ်တွေနဲ့ ဒေသခံတချို့ကပြောပါတယ်။
ဖေဖော်ဝါရီလ၂ ရက်နေ့က မန္တလေးမြို့၊ပုသိမ်ကြီးမြို့နယ်ထဲကတပ်မ(၃၃)လက်အောက်ခံစစ်သားသစ်တွေကိုသင်တန်းပေးနေတဲ့တပ်ထဲကနေ စတစ်ကော်လံအဖြူနဲ့လူငယ်တွေအပြည့်ပါဖောကား၂ စီး မတ္တရာမြို့နယ်၊ ထီးတော်မိုးစစ်သားစုဆောင်းရေးတပ်ထဲကို ပို့ဆောင်ထားတယ်လို့ မျက်မြင်တွေ့ရှိသူတွေကပြောပါတယ်။
ဒါ့အပြင် ဇန်နဝါရီလနောက်ဆုံးပတ်ကလည်း တပ်အပြောင်းအလဲတွေပြုလုပ်ထားပြီး မတ္တရာမြို့ကို စစ်တပ်ကပိတ်ဆို့တင်းကြပ်ထားတာတွေပြုလုပ်ထားတယ်လို့လည်း ဒေသခံတွေကပြောပါတယ်။
Public Service Announcement
“မတ္တရာအရှေ့ခြမ်းကိုတိုက်မယ့်သတင်းတွေထွက်နေတယ်။အပူးတပ်မ(တပ်မ၃၃၊၄၄)တွေပို့ထားတယ်ဆိုတဲ့သတင်းတွေလည်းထွက်နေတယ်”လို့ ဒေသခံတဦးကပြောပါတယ်။
မတ္တရာမြို့နယ် ပကဖ သတင်းတာဝန်ခံဗိုလ်တောက်ကလည်း မတ္တရာအရှေ့ခြမ်းကိုတိုက်မယ့်သတင်းတွေထွက်နေတာကိုတော့အတည်ပြုခဲ့ပြီး တခြားစစ်တပ်သတင်းတွေနဲ့ပတ်သက်လို့ကတော့ ထူးထူးခြားခြားသတင်းရထားတာမရှိဘူးလို့ဆိုပါတယ်။
“တိုက်မယ်လို့သတင်းတွေပြန့်နေတာတော့ဟုတ်တယ်။အခုနယ်မြေအခြေအနေကတော့ အရှေ့ခြမ်းရော၊အနောက်ခြမ်းရောမှာ ငြိမ်နေပါတယ်”လို့ ဗိုလ်တောက်ကပြောပါတယ်။
စစ်တပ်က ယခုလိုစစ်မှုထမ်းသင်တန်းဆင်းတွေကို အင်အားအပြည့် မတ္တရာဘက်ကိုပို့ဆောင်တာမျိုး ၂၀၂၄ခုနှစ်၊ မေလ (၁၈) ရက်နေ့ကလည်းလုပ်ဆောင်ခဲ့ပါသေးတယ်။
အဲဒီတုန်းကလည်း ဖောကား၂ စီးအပြည့်ပါတဲ့လူငယ်တွေကို နန်းတွင်း(လပခ)မှာ သင်တန်းဆင်းပွဲလုပ်ဆောင်ခဲ့ပြီးနေ့ချင်းမတ္တရာမြို့နယ်ထဲကို ပို့ဆောင်ခဲ့တာပါ။
ပြည်သူ့ကာကွယ်ရေးတပ်မတော်(မန္တလေး)ဟာ၂၀၂၄ ခုနှစ် ဇူလိုင်လကစပြီး မတ္တရာမြို့နယ်အရှေ့ခြမ်းမှာရှိတဲ့ စစ်ကောင်စီစခန်း လေးဆယ်နီးပါး သိမ်းပိုက်ထားပါတယ်။
စစ်ကောင်စီတပ်ဟာ မတ္တရာမြို့နယ်အတွင်းလက်နက်ကြီးပစ်ခတ်နေသလိုမြေပြင်စစ် ကြောင်းထိုးအင်အားဖြည့်တင်းလာသောကြောင့် ဖယောင်းတောင်၊ ထန်းပင်ကုန်းကျေးရွာနဲ့ မြို့ကုန်းကျေးရွာတစ်ဝိုက်တွင် တိုက်ပွဲများဖြစ်ပွါးနေတယ်လို့ မန္တလေး PDF က ဇန်နဝါရီ ၂၂ ရက်ကထုတ်ပြန်ထားပါတယ် ။
