'/%3E%3C/svg%3E){kind=small}
မန္တလေးတိုင်း ညောင်ဦးမြို့နယ် အတွင်း တရားရုံးထုတ် လုံခြုံရေးအတွက် ထွက်ခွာလာတဲ့ ရဲတပ်ဖွဲ့ဝင် ၃ ဦး လမ်းခုလတ်မှာ ပစ်ခတ်ခံရပြီး ၂ ဦး သေဆုံးသွားတယ်လို့ ပုဂံဒေသခံ သတင်းရင်းမြစ်ဆီက သိရပါတယ်။
ဒီနေ့ ဖေဖော်ဝါရီ ၁၈ ရက် မနက်ပိုင်း ၉ နာရီခန့်က ပုဂံနယ်မြေ ရဲစခန်းကနေ ဒုရဲအုပ်အမျိုးသမီး က ဆိုင်ကယ် ၁ စီး၊ ရဲတပ်သားနဲ့ ရဲတပ်ကြပ်တို့ က ဆိုင်ကယ် ၁ စီး စုစုပေါင်း ၂ ဦးနဲ့ ထွက်ခွာလာချိန် ပုဂံမြို့ဟောင်း ၊ အလိုတော်ပြည့် ဘုရားအနီးမှာ ပစ်ခတ်ခံရတာပါ။
ဆိုင်ကယ်နဲ့ ထွက်ခွာလာတဲ့ ရဲတပ်ဖွဲ့ဝင်တွေကို ကားပေါ်ကနေ ပစ်ခတ်သွားတာလို့ ပုဂံမြို့ခံ သတင်းရင်းမြစ်က ပြောပါတယ်။ ပစ်ခတ်မှုကြောင့် ရဲတပ်ဖွဲ့ဝင် ၂ ဦးသေဆုံးသွားတယ်လို့ သိရပါတယ်။
Public Service Announcement
ပစ်ခတ်မှုဖြစ်ပြီးနောက် စစ်ကောင်စီတပ်ဖွဲ့ဝင်တွေ ရောက်လာပြီး အခင်းဖြစ်တဲ့ နေရာကို အတားအဆီးတွေ ချပြီး အသွားအလာ ကန့်သတ်တယ်လို့ မျက်မြင်တွေ့ခဲ့တဲ့ အဲဒီ ပုဂံမြို့ခံ က ဆိုပါတယ်။
အခုလို ပစ်ခတ်မှုဖြစ်ပွားတဲ့နေရာဟာ လူပြတ်လပ်တဲ့နေရာမဟုတ်ဘူးလို့လည်းသိရပါတယ်။
ပုဂံမှာ ရဲတပ်ဖွဲ့ဝင် ၃ ဦးပစ်ခတ်ခံရတဲ့ ဖြစ်စဉ် ဒီမနက်ပိုင်းမှာ ဖြစ်ပွားခဲ့တယ်လို့ မန္တလေးတိုင်းကို ပစ်မှတ်ထား ဝါဒဖြန့်တဲ့ စစ်တပ်ဝါဒဖြန့် တယ်လီဂရမ်ချန်နယ်ကလည်းဖော်ပြပါတယ်။
ပစ်ခတ်ခံရသူတွေဟာ ရဲတပ်သား ရီဝေဦး ၊ ရဲတပ်ကြပ် ခင်မောင်မြင့်နဲ့ ဒုရဲအုပ်ဝါဝါထွန်းတို့ ဖြစ်ပြီး ရဲတပ်သားနဲ့ ရဲတပ်ကြပ်တို့ သေဆုံးသွား တယ်လို့ ဝါဒဖြန့် ချန်နယ်က ဖြန့်ဝေပါတယ်။
ရဲတပ်ဖွဲ့ဝင်တွေဟာ အလိုတော်ပြည့်ဘုရားအနီး အနော်ရထာလမ်းပေါ်မှာ Honda Fit ကားပေါ်ကနေ ပစ်ခတ်ခံရတာလို့ ဝါဒဖြန့် ချန်နယ်ရဲ့ ဖြန့်ဝေချက်မှာပါရှိပါတယ်။
