ဖယ်ခုံမြို့နယ်တွင် ဒေသခံပြည်သူ့ကာကွယ်ရေးတပ်များနှင့် အကြမ်းဖက်စစ်ကောင်စီတို့ကြား နိုဝင်ဘာ ၄ ရက်တွင် ထိတွေ့တိုက်ပွဲများဖြစ်ပွားပြီး အကြမ်းဖက်စစ်ကောင်စီတပ်သား ၂၀ကျော် သေဆုံးကြောင်း PDF(လွိုင်ကော်)က သတင်းထုတ်ပြန်သည်။
ဖယ်ခုံမြို့နယ်၊ ခေါင်းအိကျေးရွာနှင့် စက်တော်ကျေးရွာ အနီးတဝိုက်တွင်တိုက်ပွဲဖြစ်ပွားခဲ့ခြင်းဖြစ်ပြီး ဒေသခံကာကွယ်ရေးတပ်ဖွဲ့ တစ်ခုဖြစ်သည့် အလယ်ပိုင်းတိုင်း PDFမှ ရဲဘော်တစ်ဦး ထိခိုက်ဒဏ်ရာရရှိခဲ့ကြောင်းလည်းဖော်ပြထားသည်။
ထိုတိုက်ပွဲကို ဒေသခံကာကွယ်ရေးတပ်ဖွဲ့များဖြစ်သည် လွိုင်ကော် PDF ၊ဖယ်ခုံ PDF ၊KA ၊ဒီးမော့ဆို PDF ၊အလယ်ပိုင်းတိုင်း PDF ၊ KGZ ၊KNDF စသည့်တို့က ပူးပေါင်း၍ အကြမ်းဖက်စစ်ကောင်စီတပ်နှင့် နံနက် ၈ နာရီမှ ညနေ ၆ နာရီအထိ့ တစ်နေကုန်တိုက်ပွဲဖြစ်ပွားခဲ့ခြင်းဖြစ်ကြောင်းဖယ်ခုံPDF ကလည်းထုတ်ပြန်သည်။
တိုက်ပွဲဖြစ်ပြီးနောက် အကြမ်းဖက်စစ်တပ်က လက်နက်ကြီးများဖြင့် လူနေအိမ်များ ပစ်ခတ်ခဲ့ပြီး အိမ်များကို မီးရှို့ခြင်း၊ ပစ္စည်းများခိုးယူခြင်းနှင့် စပါးကွင်းများကို ဖျက်ဆီးခြင်းတို့ လုပ်နေကြောင်းဒေသခံကာကွယ်ရေးတပ်ဖွဲ့များက သတင်းထုတ်ပြန်သည်။
Public Service Announcement
နိုဝင်ဘာ ၂ ရက်တွင်လည်း ဖယ်ခုံမြို့နယ်တွင် အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်ဖွဲ့တို့ကြား တိုက်ပွဲများဖြစ်ပွားခဲ့ပြီး အကြမ်းဖက်စစ်တပ်ဘက် အကျအဆုံးများရှိခဲ့သည်ဟု ဒေသခံကာကွယ်ရေးတပ်ဖွဲ့များက ထုတ်ပြန်ထားသည်။
တိုက်ပွဲများအတွင်း ဖယ်ခုံမြို့ အခြေစိုက် အမြောက်တပ်ရင်းက တိုက်ပွဲဖြစ်ပွားရာနေရာသို့ လက်နက်ကြီးများဖြင့် ပစ်ခတ်ခဲ့သည်ဟု ဒေသခံကာကွယ်ရေးတပ်ဖွဲ့များကသတင်းထုတ်ပြန်ထားသည်။ လက်ရှိတွင် ဖယ်ခုံမြို့ကိုလည်း လုံခြုံရေးတင်းကျပ်ထားပြီး အစိုးရဌာနဆိုင်ရုံးများတွင် လက်နက်ကြီးအမြောက်များချထားပြီး ခံတပ်အသွင်ပြောင်းလဲထားသည်ဟု ဒေသခံကာကွယ်ရေးတပ်ဖွဲ့များကဆိုသည်။
(ပြည်သူ့ကာကွယ်ရေး(PDF)တပ်ဖွဲ့ဝင်အချို့ ၊ ဓါတ်ပုံ- (PDF)လွိင်ကော် )
