ဂျာမနီရဲ့ အင်အားကြီးမားတဲ့၊ ဥရောပကို ဦးဆောင်နိုင်မယ့် နေ့ရက်တွေ ပြန်လည် ရောက်ရှိလာတော့မယ်လို့ ရွေးကောက်ပွဲ အနိုင်ရ ပါတီခေါင်းဆောင်က ညွန့်ပေါင်းအစိုးရ ဖွဲ့စည်းရေး ဆွေးနွေးမှုတွေ အောင်မြင်ပြီးချိန်မှာ ပြောကြားလိုက်ပါတယ်။
ဧပြီ ၉ ရက်နေ့မှာ ဖရိုင်းဒရစ်ချ်မားဇ်က နောက်လကစပြီး နိုင်ငံရဲ့ အဓိပတိအဖြစ် သူဦးဆောင်မယ့် ဂျာမနီ ညွန့်ပေါင်း အစိုးရဟာ နိုင်ငံကို ခမ်းနားတဲ့ ဦးဆောင် ရပ်တည်မှုမျိုးဆီ ပြန်လည် ဆောင်ကြဉ်းသွားတော့မယ်လို့ ပြောကြားခဲ့ပါတယ်။ သူက ညွန့်ပေါင်း အစိုးရ ဖွဲ့စည်းရေး ဆွေးနွေးမှုတွေမှာ နိုင်ငံရဲ့ စီးပွားရေးနဲ့ ကာကွယ်ရေး ကဏ္ဍတွေကို မြှင့်တင်မယ့် စိတ်ကူး အစီအမံတွေကို တင်ပြခဲ့တယ်လို့လည်း ဆိုပါတယ်။
အမေရိကန်မှာ ဒေါ်နယ်လ်ထရမ့် သမ္မတ ဖြစ်လာတဲ့နောက် အစဉ်အလာ မဟာမိတ် ဥရောပ နိုင်ငံတွေအပေါ် သိသိသာသာ စိမ်းကားတဲ့ သဘောထား အမြင်တွေ ပြသလာချိန်မှာ မားဇ်ဟာ ဥရောပတိုက်ရဲ့ စီးပွားရေးအင်အား အတောင့်တင်းဆုံး နိုင်ငံကြီးကို ဦးဆောင်ဖို့ အကြောင်းဖန်လာတာ ဖြစ်ပါတယ်။
မားဇ်ဟာ ဥရောပကို ပစ်ပယ်လာတဲ့ ထရမ့်ရဲ့ မူဝါဒတွေကို ပွင့်ပွင့်လင်းလင်း ဝေဖန်ထားသူ တစ်ဦးပါ။ သူ့အနေနဲ့ ထရမ့်ဆီ သတင်းစကား တစ်ခုခု ပေးချင်သလားလို့ သတင်းထောက်တွေက မေးတဲ့အခါ မားဇ်က ဂျာမနီဟာ နိုင်ငံရဲ့ ကာကွယ်ရေး ရည်မှန်းချက်တွေကို ပြည့်မီအောင် တည်ဆောက်ယူရင်း စီးပွားရေး အရလည်း နိုင်ငံတကာမှာ ယှဉ်ပြိုင်ဝင်ဆံ့နိုင်တဲ့ အနေအထားထိ ပြန်တက်လှမ်းသွားမယ်လို့ အင်္ဂလိပ်လို ဖြေကြားသွားခဲ့ပါတယ်။ ဂျာမနီဟာ လမ်းကြောင်းမှန်ပေါ် ပြန်တက်လာမယ်လို့ သူက ပြောပါတယ်။
Public Service Announcement
ဖေဖော်ဝါရီ ရွေးကောက်ပွဲမှာ မားဇ် ဦးဆောင်တဲ့ ခရစ်ယာန် ဒီမိုကရက်တစ်နဲ့ ကွန်ဆာဗေးတစ် နိုင်ငံရေး မဟာမိတ် အင်အားစု (CDU/CSU)က အနိုင်ရခဲ့ပါတယ်။ အဲဒီနောက် လက်ရှိ ဂျာမနီ အဓိပတိ အိုလက်ဖ်ရှော့ဇ်ရဲ့ ဗဟိုလက်ဝဲယိမ်း ဆိုရှယ် ဒီမိုကရက်တစ်ပါတီ (SPD)နဲ့ ညွန့်ပေါင်း အစိုးရ ဖွဲ့စည်းရေး ကိစ္စကို မားဇ်က သဘောတူညီမှု ရယူနိုင်ခဲ့ပါတယ်။ ဒီတော့ CDU၊ CSUနဲ့ SPD နိုင်ငံရေး အင်အားစု သုံးခု ပူးပေါင်းပြီး ညွန့်ပေါင်းအစိုးရကို မောင်းနှင်သွားမှာ ဖြစ်ပါတယ်။
ထရမ့်ကိုယ်တိုင်က အားပေး ထောက်ခံခဲ့တဲ့ လက်ယာစွန်း အင်အားစုဖြစ်တဲ့ AfD ပါတီကလည်း ဂျာမနီ ရွေးကောက်ပွဲမှာ ထောက်ခံမှု အတော်လေး ရခဲ့ပေမယ့် အစဉ်အလာ ကြီးမားတဲ့ နိုင်ငံရေး ပါတီတွေကတော့ AfDကို အစိုးရ ဖွဲ့စည်းရေးအတွက် မကမ်းလှမ်းဘဲ ဖယ်ချန်ထားဖို့ ဆုံးဖြတ်ခဲ့ကြပါတယ်။
ညွန့်ပေါင်းအစိုးရ အဖွဲ့ဝင် ပါတီတွေဟာ ရုရှား-ယူကရိန်း စစ်ပွဲမှာ ယူကရိန်းကို ဆက်လက် အားပေး ကူညီနေဖို့လည်း သဘောတူထားကြပါတယ်။
ပါတီ သမိုင်းတလျှောက် ရွေးကောက်ပွဲတွေမှာ စံချိန်တင် အောင်မြင်မှုအဖြစ် ထောက်ခံမဲ ၂၀ ရာခိုင်နှုန်း ရခဲ့ပြီး ရွေးကောက်ပွဲမှာ ဒုတိယ မဲအများဆုံး ရခဲ့တဲ့ AfDကတော့ မားဇ်ဦးဆောင်တဲ့ ညွန့်ပေါင်း အစိုးရဟာ သက်တမ်းပြည့်အောင်တောင် တာဝန်မယူနိုင်ဘဲ အတွင်းပိုင်းကနေ ပြိုကွဲသွားလိမ့်မယ်လို့ ဝေဖန် ပြောကြားထားပါတယ်။
ကိုးကား: CNA
