မြင်းခြံမြို့ပေါ်မှာ ဓားပြတိုက်၊ နှစ်ဦးဖမ်းမိ

ဧပြီ ၂၄၊၂၀၂၅။Scorpio/People’s Spring

စစ်ကောင်စီတပ်နဲ့ပျူစောထီးတွေ ကြီးစိုးနေတဲ့ မြင်းခြံမြို့ပေါ်မှာ ဓါးပြတိုက်မှုဖြစ်ပွားပြီး နှစ်ဦးကိုဖမ်းမိထားတယ်လို့ မြို့ခံတွေက ပြောပါတယ်။

မနေ့က ဧပြီ ၂၃ ရက် ညနေပိုင်းက မြင်းခြံမြို့မစျေး အရှေ့မြောက်ထောင့်က ဖိနပ်လုပ်ငန်းလုပ်ကိုင်တဲ့ နေအိမ်တစ်အိမ်ကို လက်နက်ကိုင်လူတစ်စု ရောက်ရှိလာပြီး ဓါးပြတိုက်သွားခဲ့တာဖြစ်ကြောင်း၊ ၇ ဦးခန့်ပါဝင်တဲ့ အဲဒီဓားပြအဖွဲ့က ၂ ဦးကိုတော့ ဖမ်းမိခဲ့တယ်လို့ မြို့ခံတွေက ပြောပါတယ်။

“ဘာမှပါမသွားဘူး။ မိသွားတာ။ ကျန်တဲ့သူတွေကတော့ ထွက်ပြေးသွားတယ်။ သူတို့ကံဆိုးတာက အဲဒီအိမ်ဘေးမှာ မီးသတ်ရုံးရှိတော့ မီးသတ်တွေက ဝင်ဖမ်းပေးသွားတာ။”လို့ မြင်းခြံမြို့ခံတစ်ဦးက ပြောပါတယ်။

Public Service Announcement

ဖမ်းမိသူနှစ်ဦးဟာ မိန်းကလေးတစ်ဦး၊ ယောကျာ်းလေးတစ်ဦးဖြစ်ပြီး သေနတ်နဲ့ဓါးတွေပါ ဖမ်းမိတယ်လို့ ဆိုပါတယ်။ မြင်းခြံမြို့ပေါ်မှာ စစ်ကောင်စီတပ်တွေ ကြီးစိုးနေတာဖြစ်တဲ့အတွက် ဓားပြတိုက်သူတွေဟာ ၎င်းတို့နဲ့ပတ်သက်သူတွေသာဖြစ်နိုင်ကြောင်း၊ ဖမ်းမိသူတွေကို ပျူစောထီးခေါင်းဆောင် သီတာယုမွန်က စစ်ဆေးနေတယ်လို့ မြို့ခံတွေက ပြောပါတယ်။

အာဏာသိမ်းပြီးနောက်ပိုင်း မြင်းခြံမြို့ပေါ်မှာ ရွှေဆိုင်အပါအဝင် မြို့ပေါ်နေအိမ်တချို့ ဓားပြတိုက်ခံရမှုတွေ ဖြစ်ပွားခဲ့ပါတယ်။