ကနေဒါမှာ လူအုပ်ထဲ ကားနဲ့ဝင်တိုက်လို့ ၁၁ ဦး သေဆုံးခဲ့မှုရဲ့ ယာဉ်မောင်းကို စွဲချက်တင်

ပွဲတော်တစ်ခုမှာ လူအုပ်ထဲ ကားနဲ့ ဝင်တိုက်ခဲ့ပြီး လူတစ်ဒါဇင်နီးပါးကို အသက်ဆုံးရှုံးစေခဲ့တဲ့ အမျိုးသားကို ကနေဒါမှာ စွဲချက်တင်ထားလိုက်ပါတယ်။

ဗန်ကူးဗားမြို့မှာ ဖိလစ်ပိုင် အနွယ်ဝင်တွေက ပွဲတော်တစ်ခု ကျင်းပနေတဲ့အချိန် ဧပြီ ၂၆ ရက်နေ့ ညနေပိုင်းတုန်းက အဲဒီလူအုပ်ထဲကို မြို့ခံ အမျိုးသား ကိုင်ဂျီ အဒမ်လိုက SUVကားတစ်စီးနဲ့ ဝင်တိုက်ခဲ့တာ ဖြစ်ပါတယ်။ အဲဒီ ရည်ရွယ်ချက်ရှိရှိ တိုက်ခိုက်မှုကြောင့် အသက် ၅ နှစ်နဲ့ ၆၅ နှစ်ကြား လူ ၁၁ ဦး သေဆုံးခဲ့ပြီး နောက်ထပ် နှစ်ဒါဇင်လောက် ဒဏ်ရာတွေ ရခဲ့ကြပါတယ်။

စိတ်ကျန်းမာရေး ပြဿနာ နောက်ခံ အခြေအနေတွေ ရှိခဲ့ဖူးတယ်ဆိုတဲ့ အဒမ်လိုဟာ အခုအခါမှာတော့ ဗြိတိသျှ ကိုလံဘီယာ ပြည်နယ် အစိုးရ ရှေ့နေတွေက လူသတ်မှုနဲ့ စွဲချက်တင်ခြင်းကို ခံထားရပြီ ဖြစ်ပါတယ်။ နောက်ထပ် စွဲချက် အသစ်တွေလည်း ရှိလာနိုင်သေးတယ်လို့ ဗန်ကူးဗား ရဲတပ်ဖွဲ့က လူမှုကွန်ရက် မီဒီယာ Xမှာ ရေးသားထားခဲ့ပါတယ်။

အဒမ်လိုဟာ အခင်းဖြစ်ပွားပြီး နောက်တစ်နေ့၊ ဧပြီ ၂၇ ရက်နေ့က တရားရုံးမှာ ပထမဆုံး ရုံးထုတ်တာ ခံခဲ့ရပါတယ်။ Reuters သတင်းဌာနက ရရှိခဲ့တဲ့ တရားရုံး မှတ်တမ်းတွေအရ အဒမ်လိုဟာ လုပ်ရပ်အတွက် ဝန်ခံခဲ့တာမျိုး မရှိဘူးလို့ သိရပါတယ်။

Public Service Announcement

အမှုကို စုံစမ်းနေတဲ့ အရာရှိတွေက ကျူးလွန်သူမှာ စိတ်ကျန်းမာရေး ပြဿနာ နောက်ခံ အခြေအနေတွေ ထင်ထင်ရှားရှား ရှိနေခဲ့တာကို အတည်ပြုထားပြီး အကြမ်းဖက် ဝါဒနဲ့ ဆက်စပ်တဲ့ အထောက်အထားတော့ လုံးဝ မတွေ့ရကြောင်း ပြောပါတယ်။

ဗန်ကူးဗား ရဲတပ်ဖွဲ့ ယာယီ အကြီးအကဲ စတိဗ်ရိုင်းက မြို့ရဲ့ သမိုင်းမှာ အမှောင်မိုက်ဆုံး ကာလတစ်ခုကို ကြုံတွေ့ခဲ့ရတာ ဖြစ်တယ်လို့ ပြောပါတယ်။

ဒဏ်ရာရသူတွေထဲမှာ အခြေအနေ အရမ်းစိုးရိမ်ရသူတွေ ပါဝင်နေပြီး လာမယ့် ရက်ပိုင်း၊ ဒါမှမဟုတ် သီတင်းပတ်တွေအတွင်း သေဆုံးစာရင်းက ဆက်လက် မြင့်တက်လာနိုင်ကြောင်းလည်း မှတ်ချက် ပေးထားပါတယ်။ နောက်ပြီး ဒေသခံ လူထုအတွက် စိုးရိမ်ရမယ့် နောက်ဆက်တွဲ ခြိမ်းခြောက်မှုမျိုး မရှိနိုင်ဘူးလို့ သူယုံကြည်ကြောင်းလည်း ရိုင်က ဆိုပါတယ်။

အခင်းဖြစ်ပွားပြီးတဲ့နောက် စုံစမ်းစစ်ဆေးမှုတွေမှာ ရဲတွေ၊ ဖက်ဒရယ် အာဏာပိုင်တွေ အင်အား ၁၀၀ ကျော်လောက် အလုပ်လုပ်နေပြီး ထိခိုက်ခံစားခဲ့ရသူတွေနဲ့ မိသားစုဝင်တွေအတွက်လည်း လူမှု အဖွဲ့အစည်းတွေက လိုအပ်တဲ့ အကူအညီတွေ ပေးအပ်နေတယ်လို့ သိရပါတယ်။

ကိုးကား: Reuters