မေ-၄၊၂၀၂၅။ကဖေး/People’s Spring
စစ်ကောင်စီတပ်သည် ယမန်နေ့(မေ-၃)ညနေမှ ညပိုင်းအထိ မန္တလေး၊ စစ်ကိုင်း၊မကွေးတိုင်း၊ ကချင်ပြည်နယ်နှင့် ရှမ်းပြည်နယ်မှ အနည်းဆုံး ၉ မြို့နယ်ကို လေကြောင်းမှ ဗုံးကြဲခဲ့ရာ ကလေးငယ်အချို့အပါအဝင်အရပ်သားသေဆုံးမှုများရှိခဲ့သည်။
“တောက်လျှောက်ကြဲတာဗျ။မြို့တွေကအရပ်သားနေထိုင်ရာနေရာတွေကို ကြဲတာ။ သေဆုံးတာတွေ ရှိနေပြီး နောက်ထပ်လေကြောင်းသတင်းတွေကြောင့် ဒဏ်ရာရတွေ၊သေဆုံးသူတွေရဲ့အခြေအနေကို မသိနိုင်သေးဘူးဗျ”ဟုမန္တလေးတိုင်း၊သပိတ်ကျင်းမြို့မှ ကာကွယ်ရေးရဲဘော်တစ်ဦးကပြောသည်။
မေ ၄ ရက်နံနက် ၇နာရီအထိရရှိထားသောသတင်းများအရ စစ်ကောင်စီတပ်က မန္တလေးတိုင်အတွင်းရှိ မတ္တရာ၊ စဉ့်ကူး၊ သပိတ်ကျင်း၊ မိုးကုတ်၊ စစ်ကိုင်းတိုင်းမှ ကောလင်း၊ မကွေးတိုင်းမှ စလင်း၊ ထီးလင်း၊ ရှမ်းပြည်နယ်မှ နောင်ချို၊ကချင်ပြည်နယ်မှ ဖားကန့်မြို့တို့ကို လေကြောင်းမှ ဗုံးကြဲခဲ့ကြောင်း စုံစမ်းသိရသည်။
Public Service Announcement
မေ ၃ ရက်နေ့ ည ၉ နာရီ ၄၈ မိနစ်တွင်မိုးကုတ်မြို့အားစစ်ကောင်စီက ထပ်မံဗုံးကြဲခဲ့သည်။ မိုးကုတ်မြို့အနောက်ပိုင်းဆင်ခွာရွာဘုန်းကြီးကျောင်းကိုထိမှန်ခဲ့သည်။ကနဦးရရှိသောသတင်းအရအဆိုပါ ဗုံးကြဲမှုတွင် လူထိခိုက်သေဆုံးမှု မရှိပေ။
“စစ်ကောင်စီက မစားရတဲ့အမဲ သဲနဲ့ပက်နေပြီ။ကြဲလိုက်ရင် အရပ်သားနေရာချည်းပဲ”ဟု မိုးကုတ်မြို့ခံတစ်ဦးကပြောသည်။
မိုးကုတ်မြို့နှင့် နောင်ချို ၊မိုးမိတ် ၊သီပေါ ၊ကျောက်မဲမြို့တို့သည် စစ်ကောင်စီကတရုတ်အကူအညီဖြင့် TNLA ကိုဖိအားပေးပြီး ပြန်တောင်းနေသောမြို့များဖြစ်သည်။ ဧပြီ လကုန် ကူမင်းအစည်းအဝေးတွင် စစ်ကောင်စီက အဆိုပါ မြို့ ၅ မြို့အားတောင်းဆိုမှု အပေါ် TNLA က သဘောမတူခဲ့ကြောင်းသတင်းထုတ်ပြန် ပြီးနောက် စစ်ကောင်စီက မိုးကုတ်မြို့ကိုဆက်တိုက်ဗုံးကြဲနေသည်။ စစ်ကောင်ဝီဝါဒဖြန့် တယ်လီဂရန့်နှင့် စစ်တပ်ထောက်ခံသော ဖေစ်ဘွခ် အကောင့်များက ဗုံးကြဲခြင်းမှာ မြို့သိမ်းအောင်ပွဲရ ရဲဘော်များကိုသပြေပန်းဖြင့်ကြိုဆို၍ ၊ တော်လှန်ရေးအဖွဲ့များနှင့်ပက်သက်သောကြောင့် စသဖြင့်ရေးသားဝါဒဖြန့်နေကြသည်။
စစ်ကိုင်းတိုင်း ၊ကောလင်းမြို့နယ်တွင်လည် မေ၃ ရက်ညတွင် ဗုံးကြဲတိုက်ခိုက်ခံရပြီး အမျိုးသားတစ်ဦးနှင့်ကလေးငယ်တစ်ဦးဒဏ်ရာရရှိခဲ့ကြောင်း ကောလင်းခရိုင်အမှတ်၂ တပ်ရင်း သတင်းထုတ်ပြန်ထားသည်။
နောင်ချိုမြို့နယ်မှဝါးဘိုးကုန်းရွာ၊ ကောလင်းမြို့နယ်မှ ချောင်းနားဆေးရုံ နှင့်ဥက္ကံစာသင်ကျောင်းအနီး လေကြောင်းတိုက်ခိုက်မှုတို့တွင် အရပ်သားထိခိုက်သေဆုံးမှုရှိခဲ့ကြောင်း ဒေသခံများထံမှ သတင်းရရှိသည်။
ဗုံးကြဲသည့်မြို့နယ်များအနက်ဖားကန့်မြို့နှင့်နောင်ချိုမြို့၌သာ တိုက်ပွဲဖြစ်နေပြီး ကျန်ဒေသများတွင် တိုက်ပွဲဖြစ်ပွားခြင်းမရှိပေ။ ဗုံးကြဲရာတွင် Y12နှင့် ဂျက်ဖိုက်တာကို အဓိက အသုံးပြုခဲ့သည်။ စလင်းမြို့အား ဗုံးကြဲတိုက်ခိုက်မှု၌ Y12လေယာဉ်ဖြင့် နာရီဝက်ခန့်အတွင်း ဗုံး၆၀ ကျော်ကြဲချသွားကြောင်း ဒေသခံများကပြောသည်။
ဗုံးကြဲမှုကြောင့် ထိခိုက်မှုများအား အသေးစိတ်မသိရှိရသေးပေ။စစ်ကောင်စီသည် အရပ်သားပြည်သူများအားဦးတည်၍ လေကြောင်းတိုက်ခိုက်မှု ဆက်တိုက်ပြုလုပ် နေသောကြောင့် လူစုလူဝေးဖြင့် နေထိုင်ခြင်းမပြုကြရန် တော်လှန်ရေးတပ်ဖွဲ့များက သတိပေးနေကြသည်။
စစ်ကောင်စီ၏လေကြောင်းတိုက်ခိုက်မှုမှတ်တမ်းများ၊ ဗုံးကြဲသည့်လေယာဉ်မှူးများ၏ကိုယ်ရေးအချက်အလက်များအား အသေးစိတ်စိစစ်ရယူထားသလို အဆိုပါအချက်အလက်များရရှိရေးအတွက် အရပ်ဖက်အဖွဲ့စည်းများကလည်း အကူအညီပေးကြရန် အညာဒေသမှ ပြည်သူ့ကာကွယ်ရေးရဲဘော်များက အကူအညီတောင်းထားသည်။
(မိုးကုတ်မြို့ အနောက်ပိုင်းဆင်ခွါကျေးရွာ တောင်ပေါ်ကျောင်းအား စစ်ကောင်စီကမေ ၃ရက်ညတွင် ဗုံးကြဲပြီးနောက်အပျက်အစီးများကိုတွေ့ရစဥ်။ ဓါတ်ပုံ-CJ)
