မေ ၂၅၊၂၀၂၅။ဇော်ရမ်း/People’s Spring
တောင်ငူမြို့နယ်အတွင်း တိုက်ပွဲဆက်လက်ဖြစ်ပွားနေပြီး ယနေ့(မေလ ၂၅ရက်)နံနက်ပိုင်းတွင် ရန်ကုန်-မန္တလေးအမြန်လမ်းနှင့် ၁မိုင်ခန့်သာဝေးသည့်နေရာ၌ တိုက်ပွဲဖြစ်ပွားနေသည်ဟု ဒေသခံများကပြောသည်။
အမြန်လမ်း (၁၇၄)မိုင်နှင့် ၆မ်ိုင်ခန့်အကွာရှိ စပါးကြွယ်ကျေးရွာအနီးတွင် မေလ ၂၃ရက်က တိုက်ပွဲစတင်ဖြစ်ပွားခဲ့ပြီး ယနေ့(မေလ ၂၅ရက်)အထိ စစ်ရေးတင်းမာနေသလို အမြန်လမ်းနှင့် (၁)မိုင်ခန့်အကွာရှိ ကြက်တက်ညောင်ပင်ကျေးရွာတွင်လည်း ယနေ့နံနက်အစောပိုင်းကစ၍ တိုက်ပွဲဖြစ်ပွားနေသည်ဟု တောင်ငူမြို့ဒေသခံတစ်ဦးက ပြောသည်။
” အမြန်လမ်းနဲ့ ပိုနီးလာတယ်။မနက်ကတည်းက သေနတ်သံတွေကြားရတယ်။လေယာဉ်က တမနက်လုံးဝဲနေတယ်။ ရွာတွေဘက်ကနေ မြို့ပေါ်ကိုပြေးလာတာအများကြီးပဲ”ဟု တောင်ငူမြို့ခံကပြောသည်။
Public Service Announcement
ယနေ့ နံနက်ပိုင်းတွင် ကြက်တက်ညောင်ပင်ကျေးရွာမှ စစ်ဘေးရှောင်များအား ဘေးလွတ်ရာသို့ ကူညီပို့ဆောင်ပေးခဲ့သည်ဟု Taungoo Rescue အရေးပေါ်ကယ်ဆယ်ရေးပရဟိတအဖွဲ့က သတင်းထုတ်ပြန်ထားသည်။
စစ်ကောင်စီသည် အိမ်ခြေ၄၀၀ ကျော်ရှိသည့် စပါးကြွယ်ကျေးရွာကို လေကြောင်းမှတိုက်ခိုက်ပြီး မီးရှို့ဖျက်ဆီးထားကြောင်း ဒေသခံစစ်ဘေးရှောင်များက ပြောသည်။ တောင်ငူမြို့နယ်အတွင်း လက်ရှိတွင် စပါးကြွယ်ရွာ၊ ကြက်တက်ညောင်ပင်ရွာအပြင်ညကြက်ရိုးပင်ရွာ၊ တောပုရွာ၊ ဇီးပင်သာ ၊ ငုံးမင်းရွာတို့မှ ဒေသခံများ စစ်ဘေးရှောင်နေကြရကြောင်း သိရသည်။
လက်တလောတွင် ပဲခူးတိုင်းအတွင်း၌ တောင်ငူမြို့နယ်အတွင်း တိုက်ပွဲပြင်းထန်နေသလို ကျောက်ကြီး၊ရွှေကျင်၊ နတ္တလင်း၊ မင်းလှမြို့နယ်တို့တွင်လည်း စစ်ရေးတင်းမာနေပြီး စစ်ကောင်စီက လက်နက်ကြီးများပစ်ခတ်နေကြောင်း သတင်းရရှိသည်။
ရွှေကျင်မြို့နယ်၊ ကျွန်းကြီးကျေးရွာမှ မင်္ဂလာဆောင်ကို ယနေ့နံနက် ၁၁နာရီခန့်တွင် စစ်ကောင်စီကလေကြောင်းတိုက်ခိုက်၍ သတို့သမီးဖြစ်သူနှင့် ကလေးငယ်နှစ်ဦးအပါအဝင် ၁၀ဦးသေဆုံးသွားကြောင်း သတင်းရရှိသည်။
