မေ – ၂၆ ၊၂၀၂၅ /People’s Spring
မြန်မာ့အရေးထည့်သွင်းဆွေးနွေးမယ့် အာဆီယံထိပ်သီးအစည်းအဝေးကို ဒီနေ့ (မေလ ၂၆ ) ကစတင်ပြီး မလေးရှားနိုင်ငံ ၊ကွာလာလမ်ပူမြို့မှာ နှစ်ရက်ကြာ ကျင်းပနေပါပြီ။
အာဆီယံ အလှည့်ကျ ဥက္ကဋ္ဌ နိုင်ငံဖြစ်တဲ့ မလေးရှားက ကျင်းပတဲ့ အဲဒီထိပ်သီးအစည်းအဝေးကို အာဆီယံ အဖွဲ့ဝင်နိုင်ငံတွေရဲ့ခေါင်းဆောင်တွေ တက်ရောက်နေကြပြီး မြန်မာထိုင်ခုံအတွက် စစ်ကောင်စီရဲ့ နိုင်ငံခြားရေးအမြဲတမ်းအတွင်းဝန်တက်ရောက်တာတွေ့ရပါတယ်။
၂၀၂၁ခုနှစ် မှာ စစ်တပ်အာဏာသိမ်းပြီးနောက် ဖြစ်ပေါ်လာတဲ့ မြန်မာနိုင်ငံရေးအကျပ်အတည်းကိုဖြေရှင်းဖို့ ချမှတ်ထားတဲ့ ဘုံသဘောတူညီချက် ၅ ရပ်ကို မြန်မာစစ်ကောင်စီက ထိထိရောက်ရောက်အကောင် အထည်မဖော်တာကြောင့် စစ်ကောင်စီခေါင်းဆောင်ပိုင်းတွေကို ထိပ်သီးအစည်းအဝေး တက်ရောက်ခွင့် အာဆီယံ ကပိတ်ပင်ထားတာပါ။
Public Service Announcement
ဘုံသဘောတူညီ ၅ ချက်ကတော့ မြန်မာနိုင်ငံမှာအကြမ်းဖက်မှုတွေရပ်တန့်ဖို့ ၊ ပြည်တွင်းက သက်ဆိုင်ရာအစုအဖွဲ့တွေကြားတွေ့ဆုံဆွေးနွေးအဖြေရှာဖို့ ၊ မြန်မာ့အရေး ကြားဝင်ဖြေရှင်းပေးဖို့ အာဆီယံအထူးကိုယ်စားလှယ်ခန့်အပ်ဖို့ ၊ မြန်မာကိုအာဆီယံက လူသားချင်းစာနာထောက်ထားမှုအကူအညီတွေပေးဖို့ နဲ့ အာဆီယံ အထူးကိုယ်စားလှယ် မြန်မာနိုင်ငံကိုလာရောက်ပြီးသက်ဆိုင်သူတွေနဲ့တွေ့ဆုံနိုင်ဖို့အချက်တွေပါဝင်ပါတယ်။
ဘုံသဘောတူညီချက်တွေကို အာဏာသိမ်းပြီး ၂ လကျော်အကြာ အင်ဒိုနီးရှားမှာ ပြုလုပ်တဲ့ အာဆီယံထိပ်သီးအစည်းအဝေးမှာ ချမှတ်ခဲ့တာပါ။
အဲဒီအစည်းအဝေးကို စစ်ကောင်စီခေါင်းဆောင်တက်ရောက်ခဲ့တာလည်းဖြစ်ပါတယ်။
ဒါပေမယ့် ဒီသဘောတူညီချက်တွေကို မြန်မာစစ်ခေါင်းဆောင်က ထိထိရောက်ရောက်အကောင်အထည် ဖော်တာမရှိဘူးလို့ အာဆီယံ ခေါင်း ဆောင် အချို့က ထောက်ပြထားပါတယ်။
လက်ရှိကျင်းပနေတဲ့ အာဆီယံ ထိပ်သီးအစည်းအဝေးမှာ ဘုံသဘောတူညီချက် ၅ ချက်ကို ပြန်လည်သုံးသပ်ဖို့ရှိနေပါတယ်။
ထိုင်းနိုင်ငံခြားရေးဝန်ကြီးဌာနက အာဆီယံထိပ်သီးအစည်းအဝေးမှာ မြန်မာနိုင်ငံအတွက် လူသားချင်းစာ နာထောက်ထားမှုအကူအညီပေးရေး ကိစ္စတွေ ဆွေးနွေးသွားမယ်လို့ အသိပေးထားတာရှိပါတယ်။
