ဇွန်-၄၊ ၂၀၂၅။ ဇော်ရမ်း/People’s Spring
ရှမ်းပြည်နယ်တောင်ပိုင်း၊ အောင်ပန်းမြို့တွင် မြေအနက် တစ်မိုင်ကျော်ကို ဗဟိုပြု၍ ရစ်ချ်တာစကေး ၄ ဒသမ ၅အဆင့်ရှိ ငလျင် ယနေ့ နေ့လည်ပိုင်း၌ လှုပ်ရှားသွားပြီး အလွန်ပြင်းထန်ကြောင်း ဒေသခံများကပြောသည်။
နေ့လည် ၁၂နာရီ ၄၆ မိနစ်ခန့်တွင် လှုပ်ရှားခြင်းဖြစ်ပြီး ဇောက်တိမ် ငလျင်ဖြစ်ခြင်းကြောင့် ထိခိုက်ပျက်စီးမှုအနည်းငယ်ရှိနိုင်ကြောင်း အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန(MOHADM)က ထုတ်ပြန်သည်။
“ငလျင်မလှုပ်ခင် အသံတော်တော်ကျယ်ကျယ်ကြားရတယ်။ အိမ်တွေထဲ မနေရဲလို့ ဆင်းပြေးသူကပြေးနဲ့။ နောက်ထပ်တော့ ဘာမှ မကြားရသေးပါ”ဟု အောင်ပန်းဒေသခံတစ်ဦးကပြော
သည်။
Public Service Announcement
ယခုရက်ပိုင်း၌ ရှမ်းပြည်နယ်တောင်ပိုင်းတွင် ရစ်ချ်တာစကေး ၃ မှ ၄ပတ်ဝန်းကျင် အဆင့် ငလျင်များ မကြာခဏ လှုပ်နေသည်။
ဇွန်လ ၃ ရက် ၊ ည ၈ နာရီခန့်ကလည်း ရှမ်းပြည်နယ်အရှေ့ပိုင်း၊ ကျိုင်းတုံမြို့အနီး ၊ မြေအောက်အနက် ၁၀ ကီလိုမီတာကိုဗဟိုပြု၍ ရစ်ခ်တာစကေး ၄.၆ အဆင့်နှင့် အင်အားအနည်းငယ်ရှိသည့် မြေငလျင်တစ်ခု လှုပ်ခတ်ခဲ့သည်။
ထိုအပြင်မေလ ၃၀ရက်ကလည်း တောင်ကြီးမြို့အနီးကို ဗဟိုပြု၍ ရစ်ချ်တာစကေး ၄ ဒသမ ၄အဆင့်ရှိ ငလျင်လှုပ်ရှားသွားသည်။
ပြီးခဲ့သည့် မတ်လ ၂၈ရက်က မန္တလေးမြို့ကို ဗဟိုပြု၍ လှုပ်ခဲ့သည့် ရစ်ခ်ျတာစကေး ၇ ဒသမ ၇ အဆင့် ငလျင်လှုပ်ပြီးနောက်ပိုင်း မြန်မာနိုင်ငံဒေသအနှံ့တွင် နောက်ဆက်တွဲငလျင်များ မကြာခဏလှုပ်ရှားနေသည်။ အဆိုပါငလျင်လှုပ်ရှားစဉ်က ရှမ်းပြည်နယ်တောင်ပိုင်း အောင်ပန်း၊ ကလော၊ အင်းလေးဒေသများတွင်လည်း ထိခိုက်ပျက်စီးမှုမှုများရှိခဲ့သည်။
ယင်းငလျင်၏ နောက်ဆက်တွဲငလျင်ငယ်များ ဆက်လက်လှုပ်ခတ်နိုင်သည့်အတွက် ငလျင်ဘေးဆောင်ရန်၊ ရှောင်ရန်၊ သတိပြုရန်များနှင့်အညီ နေထိုင်ကြရန် MOHADM က သတိပေးထားသည်။
