ဇူလိုင်-၂၁၊၂၀၂၅။ဆဏ်း/People’s Spring
မင်းမော်ကွန်း၊ ဒါရိုက်တာကိုပေါက်တို့နဲ့ အတူ တော်လှန်ရဲဘော်တွေပါဝင်သရုပ်ဆောင်ထားတဲ့ ပြုံးပြုံးလေး ရုပ်ရှင်ကို ဩဂုတ်လအတွင်းမှာ ရုံတင်ပြသသွားမှာဖြစ်ပြီး ရရှိလာတဲ့ ငွေတွေကို မြေပြင်အတွက် ရာနှုန်းပြည့် စီးဆင်းသွားမယ်လို့ အဲဒီ့ရုပ်ရှင်ရဲ့ ဖေ့စ်ဘွတ်ခ်မှာ အသိပေးထားပါတယ်။
“ဒီရုပ်ရှင်ကိုမှတ်တမ်းတင်ချင်တဲ့အချက်ကတော့ကိုယ်ကျိုးစီးပွါးကိုယ်စီအတွက် စကစလက်အောက်ကဘောမပရိုကျူဆာ၊ဘောမအနုပညာရှင်တွေရဲ့ တစ်ကိုယ်စာရပ်တည်မှုမျိုးအတွက်ဆိုတဲ့ခေါင်းစဉ်ဖြစ်မနေခြင်းက သမိုင်းတစ်ခုဖြစ်နေပါတယ်။ဒီကားရဲ့ထူးခြားမှုက သရုပ်ဆောင်စစ်စစ်ဆိုလို့မင်းမော်ကွန်းနဲ့ကိုပေါက်သာဖြစ်ပြီး ကျန်တဲ့သူတွေကတော့ မြေပြင်မှာပြည်သူနဲ့အတူတူ လေးနှစ်ကျော်ရပ်တည်ခဲ့ကြသော အလွှာပေါင်းစုံမှာ တော်လှန်ရေးသမားစစ်စစ်တွေပါဝင်ထားကြခြင်းပါ။” လို့ ပြုံးပြုံးလေး ပေ့ခ်ျမှာ ဇူလိုင် ၂၁ ရက်က ဖော်ပြထားပါတယ်။
ဩဂုတ်လအတွင်းမှာ ရုံတင်မယ့်အကြောင်း ကြေညာထားပေမယ့် ရက်အတိအကျတော့ ထုတ်ပြန်ထားတာမရှိသေးပါဘူး။
Public Service Announcement
ဒီရုပ်ရှင်မှာ မင်းမော်ကွန်းက မြေပြင်ကရဲဘော်တွေနဲ့ အတူဖရူဆို၊ဒီမောဆို၊ဖားဆောင်းမြို့တွေမှာ အခြေပြုရိုက်ကူးခဲ့တာဖြစ်ပြီး ဒါရိုက်တာကိုပေါက်ကိုယ်တိုင် ဖားဆောင်းမြို့သိမ်းတိုက်ပွဲတွေကြား မှာရိုက်ကူးခဲ့တယ်လို့ ဆိုပါတယ်။
“ကျော်ကျော်ကမင်းသား၊ကျနော်ကဒါရိုက်တာအဖြစ် ပထမဆုံးဆုံဖြစ်တဲ့ ရုပ်ရှင်၊တနည်းအားဖြင့်ပြည်သူနဲ့တသားတည်းရပ်ခဲ့ကြသူနှစ်ဦးရဲ့လိပ်ပြာလုံခြင်း အနုပညာ” လို့ ဒီရုပ်ရှင်ရဲ့ ဇာတ်လမ်း ဇာတ်ညွှန်း ဒါရိုက်တာ ကိုပေါက်က သူ့ဖေ့စ်ဘွတ်ခ်မှာရေးသားထားပါတယ်။
ဒီရုပ်ရှင်က အလွှာပေါင်းစုံက ပြည်သူတွေနဲ့ အတူ ပါဝင်ရပ်တည်ပေးနေတဲ့ မြေပြင်ရဲဘော်တွေရဲ့ ဖြစ်ရပ်မှန် ဘဝတွေကို အခြေခံရိုက်ကူးထားတယ်လို့ ဆိုပါတယ်။
ရုပ်ရှင်ပိုစတာမှာလည်း တော်လှန်ရဲဘော်တွေရဲ့ နာမည်တွေကစပြီး အစဉ်လိုက်ရေးသားထားတာကိုတွေ့ရပြီး အဲဒီလိုရေးဖို့ မင်းမော်ကွန်းက အဆိုပြုတာလို့ ဒီဇာတ်ကားမှာပါဝင်ထားတဲ့ ရဲဘော်တစ်ဦးဖြစ်တဲ့ယာလေးက မှတ်ချက်ပြုထားပါတယ်။
“ရိုက်ကူးရေးပြီးတော့ ကိုကျော်က ဒီကားက တလရမောင်နှမတွေ ရဲ့ကားပါ၊ မင်းသား မင်းသမီးဆိုပြီး နံမည်တင်မထိုးပါနဲ့ ကျွန်တော့်ကိုနောက်ဆုံးသာထားပေးပါ ဆိုပီးတောင်းဆိုတုန်းက တကယ် ပြန်အားနာရတာ ။ ခု poster ထွက်တော့လဲ တကယ်ကြီး သမားရိုးကျလမ်းစဉ်တွေကို ခွဲထွက်ပြီး ကိုကျော်ရော ကိုပေါက်ရော ရာတို့တွေကို ဦးစားပေးထားတာ တကယ် ရင်ထဲထိရပါတယ်” လို့ ယာလေးက ပြုံးပြုံးလေး ဇာတ်ကားကြော်ငြာပို့စ်မှာ မှတ်ချက်ရေးသားထားပါတယ်။
