ဇူလိုင် – ၂၂ ၊၂၀၂၅ ၊ ဆိုင်းမင်း/People’s Spring
စစ်မှုထမ်းစုဆောင်းခံရပြီးစစ်တပ်ကထွက်လာသူတွေကိုဌာနဆိုင်ရာတွေနဲ့ ပုဂ္ဂလိလုပ်ငန်းတွေမှာအလုပ်အကိုင်ဖန်တီးခန့်အပ်ဖို့အတွက် အာဏာသိမ်း စစ်ကောင်စီကအဖွဲ့တစ်ဖွဲ့ ဖွဲ့ပြီးစီစဉ်နေပါတယ်။
အဲဒီအဖွဲ့ကိုဇူလိုင်လ၈ ရက်ကဖွဲ့စည်းလိုက်တာဖြစ်ပြီး စစ်ကောင်စီရဲ့ စစ််မှုထမ်းစုဆောင်းရေးအဖွဲ့ ဥက္ကဋ္ဌ လည်းဖြစ်၊ကာကွယ်ရေးဝန်ကြီးလည်းဖြစ်သူဗိုလ်ချုပ်ကြီးမောင်မောင်အေးက ဦးဆောင်တာတာပါ ။
အဖွဲ့အမည်ကိုတော့ စစ်မှုထမ်း တာဝန်ကျေပွန်စွာ ထမ်းဆောင်ခဲ့သူများ အလုပ်အကိုင်ရရှိရေးစီမံခန့်ခွဲမှုကော်မတီလို့ အမည်ပေးထားပါတယ်။
Public Service Announcement
ဒီအဖွဲ့ဟာအမြဲတမ်းစစ်သားနဲ့ စစ်မှုထမ်းဥပဒေနဲ့စုဆောင်းထားသူတွေကို နုတ်ထွက်ခွင့်ပြုချိန်မှာအသက်မွေးဝမ်းကျောင်းသင်တန်းတွေပေးဖို့ ၊ အသိအမှတ်ပြုလက်မှတ်ထုတ်ပေးဖို့၊ အဲဒီသူတွေကို ဌာနဆိုင်ရာလုပ်ငန်းတွေ ၊ ပုဂ္ဂလိက လုပ်ငန်းတွေမှာအလုပ်ခန့်တာတွေ လုပ်ဆောင်မှာပါ။
စစ်မှုထမ်းတွေကိုဦးစားပေးအလုပ်ခန့်ရမယ်လို့လည်း ပုဂ္ဂလိက လုပ်ငန်းတွေကို စစ်ကောင်စီရဲ့အဖွဲ့က ဖိအားပေးထားပါတယ်။
ဒါအပြင် စစ်မှုမထမ်းခင်ကလုပ်ခဲ့တဲ့ အလုပ်အကိုင်အတိုင်း သက်ဆိုင်ရာဌာနဆိုင်ရာ၊ ပုဂ္ဂလိက လုပ်ငန်းတွေက စစ်မှုထမ်းပြီး ပြန်ထွက်လာရင် ပြန်ခန့်ရမယ်လို့ ညွှန်ကြားပါသေးတယ်။
စစ်တပ်ဝါဒဖြန့် တယ်လီဂရမ် အချို့ကလည်းစစ်မှုထမ်း ပြီးကြောင်း လက်မှတ်ရှိသူတွေကို အလုပ်ခန့်ကြဖို့ ဆော်သြနေကြတာရှိပါတယ်။
ယခင်စစ်အစိုးရလက်ထက်ကတော့စစ်တပ်အရာရှိတွေကိုတပ်ကအနား ပေးပြီးနောက် ဌာနဆိုင်ရာတွေကို ရာထူးအကြီးပိုင်းတွေ နဲ့ ပြောင်းရွေ့တာမျိုးတွေ ရှိခဲ့ပါတယ်။
အောက်ခြေအရပ်ဖက်ဝန်ထမ်းတွေရဲ့ရာထူးတက်လမ်းပိတ်ပြီးနေရာအခန့်သားဝင်ယူတဲ့ အဲဒီသူ တွေကို မိုးကျရွှေကိုယ်တွေလို့ ကင်ပွန်းတပ်လေ့ရှိပါတယ်။
အခုတော့အာဏာသိမ်းစစ်ကောင်စီကအောက်ခြေတပ်ဖွဲ့ဝင်တွေတပ်က ထွက်ရင်အလုံးအရင်းနဲ့ ဌာနဆိုင်ရာတွေဆီပို့ဖို့ စီစဉ်လာတာလည်းဖြစ်ပါတယ်။
စစ်ကောင်စီရဲ့စစ်မှုထမ်း ဥပဒေ မှာ နှစ်နှစ် စစ်မှုထမ်းရမယ်လို့ပါရှိပါတယ်။
ပြီးခဲ့တဲ့နှစ်ဖေဖော်ဝါရီလကစတင်ခဲ့တဲ့ စစ်မှုထမ်းအစီအစဉ်ဟာလက်ရှိ မှာတော့ အပတ်စဉ် ( ၁၅) ထိရောက်ရှိနေပြီဖြစ်ပြီး လူအင်အား ၇၅,၀၀၀ နီးပါး စစ်ကောင်စီတပ်က စုဆောင်းရရှိထားပြီး ဖြစ်ပါတယ်။
