မုံရွာ-မန္တလေးလမ်းမှာ စစ်တပ်က ပစ်ခတ်နေလို့ ကားတွေပိတ်မိ

ဇူလိုင်-၂၃၊ ၂၀၂၅။ ဇေအောင်/People’s Spring

စစ်ကိုင်းတိုင်း၊ မုံရွာ-မန္တလေးလမ်းမှာ စစ်ကောင်စီတပ်က ရမ်းသမ်းပစ်ခတ်နေလို့ ကားတွေပိတ်မိနေကြောင်း သတင်းရရှိပါတယ်။

ဒီကနေ့ ဇူလိုင် (၂၃)ရက် မနက်ပိုင်းကစပြီး မုံရွာ-မန္တလေးလမ်းပေါ် မုံရွာနဲ့ ချောင်းဦးကြားမှာ စစ်ကောင်စီတပ်က ကင်းပုန်းတွေချထားကြောင်း၊ ဒါ့အပြင် ရမ်းသမ်းပစ်ခတ်တာတွေပါ ရှိနေလို့ ကားတွေစောင့်ဆိုင်းရင်း ပိတ်မိခဲ့တာဖြစ်ကြောင်း ဒေသခံတွေက ပြောပါတယ်။

“မုံရွာနဲ့ ချောင်းဦးကြား နေရာတိုင်းလိုလို ကင်းပုန်းတွေချထားတယ်။ မန္တလေးသွားတဲ့ကားတွေလည်း ပိတ်မိနေတယ်”လို့ ချောင်းဥဦးဒေသခံတစ်ဦးက ပြောပါတယ်။

Public Service Announcement

စစ်ကိုင်းမြို့အခြေစိုက် တပ်မ ၃၃ က စစ်ကောင်စီယာဥ်တန်းတွေ မုံရွာဘက်ကို ဦးတည်သွားနေတာကြောင့် ကင်းပုန်းတွေချပြီး ရမ်းသမ်းပစ်ခတ်နေတာဖြစ်ကြောင်း ဒေသခံတွေက ပြောပါတယ်။ ဒါ့အပြင် ရေပိုးစားရွာအနီးက စစ်ကောင်စီတပ်ဟာ လာသမျှကားတွေကိုလည်း ပိုက်ဆံတောင်းနေတယ်လို့ ခရီးသွားတချို့က ပြောပါတယ်။

ယခု ညနေ ၃ နာရီဝန်းကျင်မှာတော့ စစ်ကောင်စီယာဥ်တွေဟာ မြင်းမူနဲ့ ချောင်းဦးကြားကို ရောက်ရှိနေတယ်လို့ သိရပါတယ်။