ဇူလိုင် ၂၆၊၂၀၂၅။ သုည/People’s Spring
ရန်ကုန်နဲ့ စစ်ကိုင်းတိုင်းအတွင်း သပိတ်အဖွဲ့တွေ၊ ဒေသခံပြည်သူတွေက ဒီကနေ့ (ဇူလိုင် ၂၆)မှာ စစ်အာဏာရှင်စနစ်နဲ့ စစ်ကောင်စီရဲ့အတုအယောင်ရွေးကောက်ပွဲကို ဆန့်ကျင်ဖို့ လှုံ့ဆော်တဲ့ ဆန္ဒပြလှုပ်ရှားမှုတွေ အသီးသီး ပြုလုပ်ခဲ့ပါတယ်။
ရန်ကုန်မြို့တစ်နေရာမှာ တော်လှန်ညီနောင်လေးဖွဲ့က “ငလျင်ဘေးကူညီမှုနဲ့ လုပ်မယ့် ရွေးကောက်ပွဲအတုကို ဆန့်ကျင်ကြ” စာသားကိုင်ဆောင်ပြီး ငလျင်ဘေးသင့်ဒေသကိုရောက်ရှိသင့်တဲ့ အကူအညီတွေကို စစ်ကောင်စီက ရွေးကောက်ပွဲအတွက် အသုံးမချနိုင်စေရန် အားလုံးသတိထား ကန့်ကွက်ကြဖို့ တိုက်တွန်းနှိုးဆော်ခဲ့ပါတယ်။
စစ်ကိုင်းတိုင်း ယင်းမာပင်မြို့နယ်မှာ ပြည်သူ့အားမာန် သပိတ်စစ်ကြောင်းက ဦးဆောင်ကာ ဒေသခံပြည်သူတွေနဲ့အတူ စစ်အာဏာရှင် တော်လှန်ရေး လူထုသပိတ် ချီတက်ဆန္ဒပြခဲ့ပါတယ်။
Public Service Announcement
ယင်းမာပင်မြို့နယ်မြောက်ခြမ်းမှာလည်း အောင်လံလွှင့်မည် ဒေါင်းသွေးနီ သပိတ်စစ်ကြောင်းက မတရားတဲ့စစ်မှုထမ်းဥပဒေကို ဆန့်ကျင်ကြဖို့နဲ့ စစ်အာဏာရှင်စနစ်ကို တော်လှန်ကြဖို့ ဆန္ဒထုတ်ဖော်ခဲ့ပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ ရန်ကုန်တော်လှန်ညီနောင်လေးဖွဲ့
