နိုဝင်ဘာ-၁၂၊၂၀၂၅။သတိုး/People’s Spring
စစ်ကောင်စီရဲ့ ရွေးကောက်ပွဲကို ဆန့်ကျင်ကြောင်း လှုပ်ရှားမှုအနေနဲ့ နှစ်လအတွင်းမှာ ကျပ်ငွေ ၁၅ သိန်းခန့် အသုံးပြုပြီး Money Flow လှုပ်ရှားမှု ပြုလုပ်ထားတယ်လို့ ရန်ကုန်တော်လှန်ညီနောင် ၄ ဖွဲ့က အသိပေးထားပါတယ်။
Money Flow လှုပ်ရှားမှုဆိုတာကတော့ ပြည်သူတွေ အကြားအသုံးပြုနေတဲ့ ငွေစက္ကူတွေပေါ်မှာ ရွေးကောက်ပွဲ ကို အသိအမှတ်မပြုဖို့နဲ့ သပိတ်မှောက်စာသားတွေရေးသားပြီး လူထုအကြားအထိ ဒီလှုပ်ရှားမှုကို ပြန့်နှံ့စေတာပါ။
၅၀၀ တန်ကစပြီး ၅၀၀၀ တန်အထိ ငွေကျပ် ၁၅ သိန်းဖိုးခန့် ငွေစက္ကူတွေမှာ ရွေးကောက်ပွဲ ဆန့်ကျင်ရေးစာသားတွေ ရေးသားဖြန့်ဝေခဲ့တာပါ။
Public Service Announcement
“ No Vote” “ ဖက်ဆစ်ရွေးကောက်ပွဲကို တိုက်ဖျက်ကြ” ၊” ရွေးကောက်ပွဲ အတုလုပ်လည်း တော်လှန်ရေးကဆက်ချမယ်” ၊” သေနတ်မိုးတဲ့ ရွေးကောက်ပွဲ ပြည်သူအားလုံး ဆန့်ကျင်နွှဲ” ၊” ဖက်ဆစ်ရွေးကောက်ပွဲထောက်ခံသူ ပြည်သူ့ရန်သူ” စတဲ့ စာသားတွေကို ငွေစက္ကူတွေပေါ်မှာရေးသားထားခဲ့တာပါ။
ဒီလှုပ်ရှားမှုကို စက်တင်ဘာ နဲ့ အောက်တိုဘာ နှစ်လအတွင်း ပြည်သူတွေအကြားကို ငွေကျပ် ၁၅ သိန်းခန့် ဖြန့်ထားနိုင်ခဲ့တယ်လို့ ရန်ကုန်တော်လှန်ညီနောင် ၄ဖွဲ့က အသိပေးထားပါတယ်။
“ ပြည်သူများအနေဖြင့်အတုအယောင်ရွေးကောက်ပွဲစာတန်းပါ ပိုက်ဆံများကို ပြည်သူမှ ပြည်သူသို့ ပြန်လည်ဖြန့်ဝေသုံးစွဲ သတင်းစကားပါးခြင်းဖြင့် အတုအယောင်ရွေးကောက်ပွဲသပိတ်မှောက်ဆန့်ကျင်ရေးအား အတူပူးပေါင်းပါဝင်ပေးကြပါရန် လေးစားစွာဖြင့် အထူးတိုက်တွန်းအပ်ပါသည်။ ” လို့ သူတို့အဖွဲ့တွေက မေတ္တာရပ်ခံထားပါတယ်။
စစ်ကောင်စီက ရွေးကောက်ပွဲကို ဆန့်ကျင်ရင် ဖမ်းဆီးမယ်ကြေညာထားပေမယ့် ရန်ကုန်တော်လှန်ညီနောင် ၄ ဖွဲ့အနေနဲ့ မြေပြင်မှာ လှုပ်ရှားမှုတွေရသလောက်လုပ်ဆောင်မယ်လို့ ဆိုပါတယ်။
