စစ်ကောင်စီတပ် စစ်ကြောင်းတိုက်ခိုက်ခံရပြီးနောက် မုံရွာ – အရာတော်လမ်းပိုင်းစစ်ကြောင်းထိုးနေ

ဩဂုတ်-၁၁၊၂၀၂၅၊တာရာ/People Spring

စစ်ကိုင်းတိုင်း၊မုံရွာ-အရာတော်လမ်းပိုင်းတွင်စစ်ကောင်စီတပ်စစ်ကြောင်းတိုက်ခိုက်ခံရပြီး အထိနာ၍ အင်အား၂၀၀ခန့် ထပ်ဖြည့်ကာ ထပ်မံ စစ်ကြောင်းလာကြောင်း မုံရွာမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးသို့ ပြောသည်။

ထို့ကြောင့် ယနေ့(သြဂုတ် ၁၁ရက်)ကစ၍ မုံရွာ-ကျောက္ကာ-အရာတော်လမ်းပိုင်းနှင့် ကျောက္ကာ- ဗော်ဓိတထောင် လမ်းပိုင်းတို့ကို တိုက်ပွဲနယ်မြေအဖြစ် သတ်မှတ်လိုက်ကြောင်း အသိပေးသည်။

ဩဂုတ် ၈ရက်က မုံရွာ-ကျောက္ကာ-အရာတော်လမ်းပိုင်းကို စစ်ကောင်စီတပ်က ကနဦးစစ်ကြောင်းထိုးလာစဥ် တော်လှန်ရေးအင်အားစုများ၏ တိုက်ခိုက်ခြင်းခံရကာ စစ်ကောင်စီတပ် ထိခိုက်သေဆုံးမှုများ ရှိခဲ့သည်ဟု ဆိုသည်။

Public Service Announcement

“ဒီနေ့ ထပ်တိုးတင် ခန့်မှန်း ၂၀၀လောက်ရှိမယ်။အရင်နေ့က ပြန်သယ်သွားတဲ့ အမြောက်နဲ့ ပွိုင့်ဖိုက်ပါတဲ့ သံချပ်ကာ၂စီးပြန်ပါလာတယ်။အခု လက်ရှိအားလုံး ၃၀၀ ဝန်းကျင်ရှိမယ် ခန့်မှန်းတယ်”ဟု အထက်ပါ တာဝန်ရှိသူက စစ်ကောင်စီစစ်ကြောင်း အခြေအနေအပေါ် ရှင်းပြသည်။

စစ်ကောင်စီတပ်သည် မုံရွာ-အရာတော်လမ်းပိုင်း တလျှောက်လုံးကို အင်အား ဖြန့်ကျက်ထားပြီး မုံရွာနှင့် အရာတော်မြို့နယ်အစပ် စည်သာလေးရွာအနီး တပ်စွဲထားကြောင်းသိရသည်။

ထို့အပြင် အရာတော်မြို့နယ်အခြေစိုက် အမှတ်(၁၀)စစ်အခြေခံလေ့ကျင့်ရေးတပ်(စခတ-၁၀)မှ စစ်ကြောင်းကလည်း မုံရွာ-အရာတော်လမ်းပိုင်းဘက်သို့ ဦးတည်နေကြောင်း ဒေသတွင်း သတင်းရင်းမြစ်က ဆိုသည်။

“အရာတော်နယ် ခမြင့် ရွာနားအထိ ဆင်းလာနေပြီ”ဟု ၎င်းက ပြောသည်။

မုံရွာ-အရာတော်လမ်းပိုင်းရှိ ကျေးရွာအချို့ကို စစ်ကောင်စီတပ်က မီးရှို့ဖျက်ဆီးထားပြီး ပြည်သူပိုင် ပစ္စည်းများ သယ်ယူနေသည်ဟု ဆိုသည်။ ထို့အပြင် စျေးဆိုင်အချို့ မီးရှို့ခံထားရအပြင် ဖမ်းဆီးခံရသူပြည်သူများလည်း ရှိနေကြောင်း သိရသည်။

လက်ရှိစစ်ကောင်စီတပ်စစ်ကြောင်းကြောင့် မုံရွာ- ကျောက္ကာ- အရာတော်လမ်းပိုင်းအား ပြည်သူများ လုံးဝ အသုံးမပြုရန် မုံရွာမြို့နယ်ပြည်သူ့ကာကွယ်ရေးအဖွဲ့က ဩဂုတ် ၈ ရက်က ထုတ်ပြန် ထားသည်။