“ဖက်ဆစ်ရွေးကောက် ခွေးထွက်ပေါက် မဲမပေးနဲ့သပိတ်မှောက်” ကြွေးကြော်ပြီး စစ်ကိုင်းနဲ့ မကွေးမှာ ဆန္ဒပြ

စက်တင်ဘာ-၂၊၂၀၂၅။ သုည/People’s Spring

စစ်ကိုင်းနဲ့ မကွေးတိုင်းအတွင်းမှာ သပိတ်အဖွဲ့တွေ၊ ဒေသခံပြည်သူတွေဟာ ဒီကနေ့ (စက်တင်ဘာ ၂)မှာ “ဖက်ဆစ်ရွေးကောက်ခွေးထွက်ပေါက် မဲမပေးနဲ့သပိတ်မှောက်” ကြွေးကြော်ပြီး စစ်ကောင်စီရဲ့ ရွေးကောက်ပွဲကို မဲမပေးပဲ ဆန့်ကျင်ကြဖို့ ဆန္ဒပြခဲ့ပါတယ်။

မကွေးတိုင်း ပခုက္ကူမြို့နယ် တစ်နေရာမှာ ပခုက္ကူလူထုတိုက်ပွဲကော်မတီက “ဖက်ဆစ်ရွေးကောက်ခွေးထွက်ပေါက် မဲမပေးနဲ့သပိတ်မှောက်” ခေါင်းစဉ်နဲ့ အတုအယောင်ရွေးကောက်ပွဲကို ဆန့်ကျင်တဲ့ ဆန္ဒပြလှုပ်ရှားမှု ပြုလုပ်ခဲ့ပါတယ်။

စစ်ကိုင်းတိုင်းမှာလည်း ခေတ်ဟောင်းချိုးဖျက် ဒို့မျိုးဆက်သပိတ်စစ်ကြောင်းမှ စစ်တပ်ရဲ့အတုအယောင် ရွေးကောက်ပွဲကို ဆန့်ကျင်ကန့်ကွက်တဲ့ စာသားတွေ ကိုင်ဆောင်ပြီး အာဏာရှင် အမြစ်ပျက်ရေးအတွက် ချီတက်ဆန္ဒပြခဲ့ပါတယ်။

Public Service Announcement

ယင်းမာပင်မြို့နယ်မြောက်ခြမ်းမှာလည်း နောက်ပြန်မလှည့်ကြေးဒီတော်လှန်ရေးသပိတ်စစ်ကြောင်းမှ “သင့်မဲဖြင့် တရားဝင် လူသတ်ခွင့်မပေးနဲ့” စာသားနဲ့ အကြမ်းဖက်စစ်ကောင်စီက ပြုလုပ်မယ့် တရားမဝင်ရွေးကောက်ပွဲကို ဆန့်ကျင်ကြောင်း ဆန္ဒထုတ်ဖော်ခဲ့ပါတယ်။

ယင်းမာပင်မြို့နယ်မှာလည်း အောင်လံလွှင့်မည် ရွှေရေကြည်သပိတ်၊ အောင်လံလွှင့်မည်ဒေါင်းသွေးနီ သပိတ် “သင့်မဲ့ဖြင့်တရားဝင်လူသတ်ခွင့်မပေးနဲ့” ၊ “ဖက်စစ်ရွေးကောက်ပွဲသပိတ်မှောက် တော်လှန်ရေးကိုရဲရဲလျှောက်” ကြွေးကြော်သံတွေနဲ့ ချီတက် ဆန္ဒပြခဲ့ကြပါတယ်။

ဒါအ့ပြင် ဖမ်းဆီးထားသောနိုင်ငံ့ခေါင်းဆောင်တွေနဲ့နိုင်ငံရေးအကျဉ်းသားတွေအားလုံး ချက်ချင်းလွှတ်ရန်လည်း ကြွေးကြော်သံတွေနဲ့ ဆန္ဒဖော်ထုတ်ခဲ့ပါတယ်။

စစ်ကိုင်းတိုင်းအတွင်း စစ်တပ်ကစစ်ကြောင်းတွေထိုးနေတဲ့ ကြားက စစ်အာဏာရှင် ဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။