စက်တင်ဘာ−၂၉ ၊ ၂၀၂၅။ဇော်ဝင်း/People’s Spring
မကွေးတိုင်း၊မြိုင်မြို့နယ်က ပျူစောထီးအားကောင်းရာ တွင်းမရွာက စစ်အုပ်စုကို တိုက်ခိုက်ရာ သုံးဦးသေပြီး လက်နက်တလက်ရတယ်လို့ မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)က ဒီကနေ့(စက်တင်ဘာ ၂၉ရက်)မှာ ထုတ်ပြန်ပါတယ်။
မနေ့က(စက်တင်ဘာ ၂၈ ရက်) နေ့လယ် ၂နာရီခန့်က တွင်းမရွာမှာ ဒေသခံတွေရဲ့ ပစ္စည်းတွေကို လှည့်လည်ခိုးယူနေတဲ့ စစ်ကောင်စီတပ်နဲ့ ပျူစောထီးအဖွဲ့ကို အလစ်ဝင်တိုက်ခဲ့တာလို့ ဆိုပါတယ်။
တိုက်ခိုက်မှုမှာ စစ်ကောင်စီတပ်သားနဲ့ပျူစောထီး သုံးဦးသေပြီး MA 1 တလက်သိမ်းရခဲ့တယ်လို့ အသိပေးပါတယ်။
Public Service Announcement
မြိုင်ပကဖ ၊ တပ်ခွဲ(၁) ၊ တပ်ခွဲ (၂) ၊ ပြည်သူ့လွတ်မြောက်ရေးတပ်ပေါင်းစု – PLC ၊ ကမ္မတပ်ပေါင်းစု နဲ့ 8+ တပ်ပေါင်းစုတို့ ပူးပေါင်းတိုက်ခိုက်ခဲ့တယ်လို့ ဖော်ပြပါတယ်။
“မြိုင်မှာက သရက်ကန်၊ တွင်းမ ၊ ကန်နီ ဆိုတဲ့ ပျူသုံးရွာပဲ ကျန်တော့တယ်။အရင်ကတော့ ၁၀ ရွာလောက်ရှိတယ်။သရက်ကန်ဆိုလည်း ရိက္ခာလမ်း ကြောင်းတွေ အပိတ်ခံထားရတယ်။မြိုင်မှာ တော်လှန်ရေးအင်အားစုတွေ စုဖွဲ့မှုအားကောင်းလာတယ်”လို့ မြိုင်မြို့နယ်စစ်ရေးသတင်းရင်းမြစ်က ပြောပါတယ်။
ပြီးခဲ့တဲ့လကလည်း မြိုင်မြို့ပေါ်က စစ်ကောင်စီတပ်ကင်းစခန်းတွေကို ဒေသတွင်း တော်လှန်ရေးတပ်တွေ ဝင်ရောက်တိုက်ခိုက်သိမ်းပိုက်နိုင်ခဲ့တာ ရှိပါတယ်။
စစ်ကောင်စီတပ်က မြိုင်မြို့ပေါ်မှာ စုရုံးတပ်တည်ထားပြီးတော့ မြို့တွင်းက စီးပွားရေးဘဏ်၊ ရဲစခန်းနဲ့ စျေးတွေမှာ တပ်စွဲထားတာရှိတယ်လို့ ဒေသတွင်းသတရင်းမြစ်က ဆိုပါတယ်။
မြိုင်မြို့နယ်ရဲ့စစ်ရေးအခြေအနေတွေအရ မြို့နဲ့ (၁)မိုင်ခွဲအကွာဝန်းကျင်အထိ တော်လှန်ရေးအင်အားစုတွေက စိုးမိုးထားနိုင်နေပြီလို့လည်းသိရပါတယ်။
