အောက်တိုဘာ-၁၆၊၂၀၂၅။အိမ်သွင်/People’s Spring
ရှမ်းပြည်နယ်မြောက်ပိုင်းက တအာင်းတပ်မတော်(TNLA)ထိန်းချုပ်ဒေသဖြစ်တဲ့ မိုးမိတ်မြို့ကို ဒီနေ့အောက်တိုဘာ ၁၆ရက် ညနေပိုင်းမှာ စစ်ကောင်စီက လေယာဉ်နဲ့ ထပ်မံ ဗုံးကြဲသွားပါတယ်။
မိုးမိတ်မြို့၊ တောင်ပိုင်းရပ်ကွက်ထဲကို ည ၆ နာရီ ၂၀ မိနစ်မှာ ပေါင် ၅၀၀ ဗုံးတစ်လုံးနဲ့ ပေါင် ၂၅၀ ဗုံးတစ်လုံး ကြဲချသွားတာလို့ ရှမ်းမြောက်သတင်းရင်းမြစ်က ပြောပါတယ်။
နေအိမ်တချို့ပျက်စီးခဲ့ပြီး ဒေသခံတစ်ဦးဒဏ်ရာအနည်းငယ်ရခဲ့တယ်လို့ သိရပါတယ်။
Public Service Announcement
မိုးမိတ်မြို့၊ ဝဲဘောင်ရွာနဲ့ အောင်မြေရွာကိုလည်း အောက်တိုဘာ ၉ရက်နဲ့ ၁၀ရက်မှာ စစ်ကောင်စီက လေကြောင်းကနေ ဗုံးကြဲခဲ့လို့ ကလေးနှစ်ဦးအပါအဝင် အရပ်သား ရှစ်ဦး သေဆုံးခဲ့ပါတယ်။
TNLAဟာ ၂၀၂၃ အောက်တိုဘာလ၂၇ရက်ကစတင်တဲ့ ၁၀၂၇ စစ်ဆေးတွေနဲ့အတူ ရှမ်းပြည်နယ်မြောက်ပိုင်းက ကျောက်မဲမြို့၊ သီပေါ၊နမ့်ဆန်၊ မိုင်းလုံ၊ မိုးမိတ်၊ မန်တုံ၊နမ္မတူ၊ ကွတ်ခိုင်၊ နောင်ချို၊နမ့်ခမ်း၊မိုင်းငေါ့မြို့နဲ့ မန္တလေးတိုင်းက မိုးကုတ်မြို့ကိုသိမ်းယူခဲ့တာပါ။ ၂၀၂၅ နှစ်လယ်ပိုင်းမှာ စစ်ကောင်စီကပြန်ပြီးစစ်ကြောင်းထိုးလို့ ပြီးခဲ့တဲ့ဇူလိုင်မှာ နောင်ချိုမြို့ကို လက်လွတ်ဆုံးရှုံးခဲ့ပါတယ်။
ကျောက်မဲမြို့ကိုလည်း အောက်တိုဘာ ၁ရက်မှာ စစ်ကောင်စီကပြန်လည်ထိန်းချုပ်ခဲ့ပါတယ်။ လက်ရှိမှာ သီပေါမြို့မှာလည်း တိုက်ပွဲတွေဖြစ်နေပါတယ်။
မိုးမိတ်မြို့ဟာ မိုးကုတ်မြို့နဲ့ဆက်စပ်နေပြီး စစ်ကောင်စီက ဒီနေ့မနက်ပိုင်းမှာလည်း မိုးကုတ်မြို့ကို လေကြောင်းကနေ ဗုံးကြဲခဲ့ပါတယ်။
အောက်တိုဘာ ၁ရက်ကနေ ဒီနေ့ အောက်တိုဘာလ ၁၆ရက်အတွင်း နမ္မတူ၊ မန်တုံ၊သီပေါ၊ မိုးကုတ်၊ ကျောက်မဲ၊ မိုင်းလုံ၊ မိုင်းငေါ့၊ မိုးကုတ်မြို့တွေကို ဗုံးဆက်တိုက်ကြဲခဲ့လို့ အရပ်သား ၃၅ဦးထက်မနည်းသေဆုံးခဲ့ပါတယ်။
စစ်ကောင်စီတပ်က လေကြောင်း၊ လက်နက်ကြီး၊ ဒရုန်းနဲ့ မြေပြင်စစ်ကြောင်းအင်အားတွေသုံးပြီး ဒေသအနှံ့မှာ အရပ်သားတွေကို ပစ်မှတ်ထားပြီး စစ်ရာဇဝတ်မှုတွေ ကျူးလွန်နေတယ်လို့ TNLAက ထုတ်ပြန်ထားပါတယ်။
