ရန်ကုန်လူထုသပိတ်မှ အနည်းဆုံးလူငယ်​လေးဦး ကျဆုံး၊ ခုနစ်ဦးခန့် ဖမ်းဆီးခံရ

ရန်ကုန်မြို့ ကြည့်မြင်တိုင်မြို့နယ် ပန်းပင်ကြီးလမ်းတွင် ငြိမ်းချမ်းစွာဆန္ဒပြနေသည့် ရန်ကုန်လူထုသပိတ်မှ လူငယ်များကို အကြမ်းဖက်စစ်ကောင်စီက ကားဖြင့်တိုက် သေနတ်ဖြင့် ပစ်သတ်၍ အနည်းဆုံးလူငယ်​လေးဦးကျဆုံးခဲ့ရ​​ကြောင်း သပိတ်တွင်ပါဝင်သူများက လူထု​နွေဦးသို့ ​ပြောသည်။

“ကားနဲ့ တိုက်ခံရတဲ့ ကလေး​လေးယောက်လုံးလည်း သေသွားတယ်လို့ သိရပါတယ်။ အရှိန်တော်တော်ပြင်းတော့ ကလေးတွေ လွင့်ထွက်သွားတာပါ။ သေသွားတဲ့သူတွေကို ကားပေါ်ပြန်တင်သွားတယ်။ သေနတ်တွေနဲ့ ပစ်သံလည်း ကြားလိုက်ရတယ်။ တကယ့်ကို အသေလုပ်တာဗျာ။ ကလေးအချို့က သူတို့ သူငယ်ချင်း ကားတိုက်ခံရတော့ သွားဆွဲရင်း အဖမ်းခံရတာပါ”ဟု ရန်ကုန်လူထုသပိတ်တွင်ပါဝင်သူတစ်ဦးက ပြောသည်။

ထို့အပြင် အမျိုးသားလူငယ်ငါးဦးနှင့် မိန်းကလေးနှစ်ဦး စုစုပေါင်း ခုနစ်ဦးခန့် ဖမ်းဆီးခံရကြောင်း သပိတ်တွင်ပါဝင်ခဲ့သူတစ်ဦးက ပြောသည်။

“ဓာတ်ပုံရိုက်တဲ့ အစ်ကိုတစ်ယောက်နဲ့ အားလုံးပေါင်း ခုနစ်ယောက်လောက် ဖမ်းခံလိုက်ရတယ်။ အော်သံတွေ နားထဲက မထွက်သေးဘူးဗျာ။ တကယ်စိတ်မကောင်းဘူး။ အရမ်းမိုက်ရိုင်းလွန်းတယ် “ဟု ၎င်းက ပြောသည်။

Public Service Announcement