ကြည်မြင်တိုင်လူသတ်ပွဲအပါအဝင်စစ်ကောင်စီတပ်များ၏လူမဆန်သော ရက်စက်ယုတ်မာမှုများကို
တုန့်ပြန်သည့်အနေဖြင့် ရန်ကုန်တိုင်းစစ်ဒေသခွဲကွပ်ကဲရေးအဖွဲ့က ယနေ့(ဒီဇင်ဘာ ၆)ညတွင်လည်း ရန်ကုန်တိုင်းရှိ စစ်ရေးပစ်မှတ်နှစ်ခုကိုတိုက်ခိုက်ခဲ့ပြီး ကနဦးသတင်းအရ သုံးဦးသေဆုံးကြောင်း ထုတ်ပြန်သည်။
ဒီဇင်ဘာ၅ ရက်က ကြည်မြင်တိုင်တွင်ငြိမ်းချမ်းစွာဆန္ဒပြ နေသူများကိုစစ်ကောင်စီတပ်က ကားနှင့်တိုက် ၊သေနတ်ဖြင့် ပစ်သတ်သဖြင့် လူငယ်အချို့ကျဆုံးဒဏ်ရာရ ခဲ့ပြီးနောက် ထို့နေ့တွင်ပင် ရန်ကုန်တိုင်းစစ်ဒေသခွဲကွပ်ကဲရေးအဖွဲ့က နေရာခြောက်နေရာကိုတိုက်ခိုက်ခဲ့ပြီး ၊ဒီဇင်ဘာ ၆ ရက်တွင်လည်း ကော့မှူးမြို့နယ်ရှိ ဝါးဘလောက်သောက် ရဲစခန်းနှင့် ခရမ်းမြို့နယ်၊ သက္ကလဘက်အထွက်ရှိ သစ်တောဂိတ်တို့ကိုတိုက်ခိုက်ခဲ့ခြင်းဖြစ်သည်။
“ပျံလွှားအောင်” စစ်ဆင်ရေး၏ အစိတ် အပိုင်းတစ်ရပ်ကော့မှူးမြို့နယ်ရှိ ဝါးဘလောက်သောက် ရဲစခန်းတွင် တပ်စွဲထားသော အကြမ်းဖက် ရဲသားနှင့် စစ်သားများကိုယနေ့ညပိုင်းတွင် ပြည်သူ့ကာကွယ်ရေး တပ်ဖွဲ့များက တိုက်ခိုက်ခဲ့ရာ ကနဦးစုံစမ်းသိရှိရသည့်အခြေအနေအရ ရန်သူရဲသား ၃ ဦး သေဆုံးကာ အချို့ ထိခိုက်ဒဏ်ရာရရှိ(အသေးစိတ် စုံစမ်းဆဲ) ခဲ့ကြောင်း ထုတ်ပြန်ထားသည်။
အလားတူခရမ်းမြို့နယ်၊ သက္ကလဘက်အထွက်ရှိ အကြမ်းဖက် ရဲသားနှင့် စစ်သားများ ပူးပေါင်း တပ်စွဲထားသည့် သစ်တောဂိတ်အား ယနေ့ ည ၈ နာရီအချိန်ခန့်တွင် ၄၀ မမ ဗုံးသီးဖြင့် ပစ်ခတ်တိုက်ခိုက်ခဲ့ကြောင်းပါရှိသည်။ သို့သော် စစ်ကောင်စီတပ်ထိခိုက် သေဆုံးမှုများ ရှိသော်လည်း အသေးစိတ်ဆက်လက်စုံစမ်းဆဲ ဖြစ်သည်ဟုဆိုသည်။
Public Service Announcement
ထိုအပြင်အကြမ်းဖက်စစ်ကောင်စီတပ်များအပေါ် ယခုကဲ့သို့ စစ်ရေးအရ အရေးယူ ဆောင်ရွက်မှုများကို “ပျံလွှားအောင်” စစ်ဆင်ရေးလှုပ်ရှားမှုအဖြစ် ရန်ကုန်တိုင်းစစ်ဒေသခွဲကွပ်ကဲရေးအဖွဲ့က ဆက်လက် အရှိန်မြှင့် ဆောင်ရွက်သွားမည်ဖြစ်ပြီး ပြည်သူလူထုအနေဖြင့်လည်း သံပုံးတီးခြင်း၊ ဆန္ဒထုတ်ဖော်ခြင်း၊ အကြမ်းဖက်စစ်ကောင်စီ၏ စီးပွားရေးထုတ်ကုန်များကို မသုံးစွဲဘဲ သပိတ်မှောက်ခြင်းစသည့် စစ် အာဏာရှင်ဆန့်ကျင်ရေး လှုပ်ရှားမှုများကို အရှိန်အဟုန်မပျက်ဆက်လက်ဆောင်ရွက်ပေးကြရန်နှင့် ပြည်သူ့ကာကွယ်ရေးတပ်သားများကို ပံ့ပိုးကူညီခြင်း၊ ပူးပေါင်းပါဝင်ခြင်းများကို ဆက်လက် အားပေးဆောင်ရွက်သွားကြပါရန် မေတ္တာရပ်ခံ တိုက်တွန်းအပ်ပါသည်ဟုလည်းဖော်ပြထားသည်။
ယမန်နေ့က နေရာ ၆ နေရာအားတိုက်ခိုက်မှုတွင် ခရမ်းမြို့နယ်အတွင်း တိုက်ခိုက်မှု၌ စစ်ကောင်စီတပ်မှ ၃ ဦးသေဆုံးပြီး ၇ ဦးဒဏ်ရာရရှိခဲ့ပြီး ကျန်နေရာများထိ့ခိုက်သေဆုံးမှုကို စုံစမ်းနေဆဲဟလည်းပါရှိသည်။ အာဏာသိမ်းစစ်ကောင်စီကမူ ယမန်နေ့ကတိုက်ခိုက်ခံရမှုများကိုသတင်းမထုတ်ပြန်ပါ ။ စစ်ကောင်စီက၎င်းတို့၏တပ်ဖွဲ့ဝင်များတိုက်ခိုက်ခံရပြီး ထိခိုက်သေဆုံးလျှင် ထုတ်ပြန်လေ့မရှိပေ။
