ဇန်နဝါရီ-၂၉၊၂၀၂၆။အိမ်သွင်/People’s Spring
စစ်ကိုင်းတိုင်း၊ ထီးချိုင့်မြို့က စစ်ကောင်စီတပ်စခန်းတွေကို တော်လှန်ရေးတပ်တွေက ယမန်နေ့ မနက်အစောပိုင်းမှာ စတင်တိုက်ခိုက်နေပြီး ဒီကနေ့(ဇန်နဝါရီ၂၉ရက်)မှာတော့ အခြေအနေ ငြိမ်သက်နေပါတယ်။
“ထီးချိုင့်က စစ်ကြောင်းတွေကို ပြန်တိုက်နေတာမှန်တယ်။ စစ်ရေးအခြေအနေကတော့ တစ်ခုမဟုတ် တစ်ခုထူးနေပါလိမ့်မယ်”လို့ စစ်ကိုင်းတိုင်းက PDF ရဲဘော်တစ်ဦးက ပြောပါတယ်။
ထီးချိုင့်မြို့မှာ ဇန်နဝါရီ ၂၈ရက် မနက် ၅နာရီကနေ မနက် ၈နာရီအထိ တိုက်ပွဲအပြင်းအထန်ဖြစ်ခဲ့တာပါ။
Public Service Announcement
စစ်ကောင်စီတပ်က မြို့ထဲကနေ လက်နက်ကြီးတွေ ဆက်တိုက်ပစ်ခတ်နေခဲ့ပါတယ်။ ဒီနေ့မှာတော့ တိုက်ပွဲငြိမ်သက်နေပါတယ်။
ထီးချိုင့်မြို့ကို ၂၀၂၃ နိုဝင်ဘာမှာ တော်လှန်ရေးတပ်တွေက မြို့သိမ်းတိုက်ပွဲတိုက်ခိုက်ခဲ့ဖူးပါတယ်။ စစ်ကောင်စီက မြို့ကို လေကြောင်းကနေ ဗုံးကြဲပြီး မီးရှို့လို့တော်လှန်ရေးတပ်တွေက ပြန်ဆုတ်ခွာခဲ့ပါတယ်။မြို့အနီးက ရွာတွေကိုတော့ တော်လှန်ရေးတပ်တွေက ထိန်းချုပ်ခဲ့ပါတယ်။
ထီးချိုင့်မြို့ပေါ်က ဒေသခံတွေဟာ ၂၀၂၃ နိုဝင်ဘာကတည်းက ယခုထိ နေရပ်စွန့်ခွာတိမ်းရှောင်နေကြရပါတယ်။
လက်ရှိမှာ ထီးချိုင့်မြို့နဲ့ ဆက်စပ်နေတဲ့ အင်းတော်မြို့ကို PDFပူးပေါင်းတပ်တွေကထိန်းချုပ်ထားပြီး ကသာနဲ့ ကောလင်းမြို့မှာလည်း စစ်ရေးတင်းမာနေပါတယ်။
