မင်းကင်းမှာ တိုက်ပွဲနှစ်ကြိမ်ဖြစ်ပြီး ပျူစောထီးတစ်ဦးကို SRFဖမ်းမိ

​မတ်-၁၈ ရက်၊၂၀၂၆။ဟာနာဆန်/People’s Spring

​စစ်ကိုင်းတိုင်း၊ မင်းကင်းမြို့နယ်မှာ ပျူစောထီးတွေနဲ့ တိုက်ပွဲနှစ်ကြိမ်ဖြစ်ပြီး ပျူစောထီးတစ်ဦး ဖမ်းဆီးရမိခဲ့ကြောင်း ကျောင်းသားတော်လှန်ရေးတပ်တော် (Student’s Revolutionary Force – SRF)က ထုတ်ပြန်ပါတယ်။

ဒီကနေ့ မတ်လ၁၈ရက် မနက် ၈နာရီခွဲခန့်က မင်းကင်းမြို့နယ်၊ မင်းရွာမှ ထွက်လာတဲ့ ပျူစောထီးအဖွဲ့နဲ့ ကင်းလှည့်နေတဲ့ SRF အဖွဲ့တို့ ပထမအကြိမ် ထိတွေ့တိုက်ပွဲဖြစ်ပွားခဲ့ပါတယ်။ အဲဒီ ထိတွေ့မှုအတွင်း မင်းရွာမှ ပျူစောထီးတစ်ဦးဖြစ်တဲ့ ဦးသန်းထွန်းကို လက်ရဖမ်းဆီးရမိခဲ့တယ်လို့ SRF က ထုတ်ပြန်ပါတယ်။ ဒါ့အပြင် ၎င်းပျူစောထီးတွေ ထောင်ထားတဲ့ နင်းမိုင်းတစ်လုံးကိုလည်း ရှင်းလင်းနိုင်ခဲ့ကြောင်း သိရပါတယ်။

အဲဒီနောက် မနက် ၁၀ နာရီခွဲခန့်မှာလည်း မင်းရွာနဲ့ အင်ကြင်းတောင်ရွာဘက်မှ ထွက်လာတဲ့ အင်အား ၃၀ ခန့်ပါဝင်တဲ့ ပျူစောထီးစစ်ကြောင်းနဲ့ ဒုတိယအကြိမ် ထိတွေ့မှု ထပ်မံဖြစ်ပွားခဲ့ကြောင်း SRF က အသိပေးပါတယ်။ အဲဒီတိုက်ခိုက်မှုမှာ ပျူစောထီးတွေထဲက ၄ ဦးထက်မနည်း ထိခိုက်ပြီး ပြန်ဆုတ်ခွာသွားတယ်လို့ SRF ဆိုပါတယ်။

Public Service Announcement

ထုတ်ပြန်ချက်နဲ့ပတ်သက်လို့ Student’s Revolutionary Force – SRF ကိုဆက်သွယ်မေးမြန်းထားပြီး ပြန်လည်ဖြေကြားတာ မရှိသေးပါဘူး။

တိုက်ပွဲဖြစ်ပွားပြီးနောက် ၎င်းကျေးရွာတဝိုက် အခြေအနေနဲ့ပတ်သက်ပြီး ​ဒေသခံတစ်ဦးက

“မြေပြင်ရော ဝေဟင်ရော သတိထားနေရတယ်”လို့ ဆိုပါတယ်။

လက်ရှိမှာ စစ်ကောင်စီနဲ့ လက်အောက်ခံအဖွဲ့တွေက စစ်မျက်နှာအရပ်ရပ်မှာ စစ်ရေးလှုပ်ရှားမှုတွေ ပြုလုပ်နေလို့ ဒေသခံပြည်သူတွေ သတိပြုသွားလာကြဖို့ ကျောင်းသားတော်လှန်ရေးတပ်တော် (SRF) က တိုက်တွန်းထားပါတယ်။