ဧပြီ-၁၉၊၂၀၂၆။ သုည/People’s Spring
တောင်ကိုရီးယားနိုင်ငံ ဆိုးလ်မြို့ရှိ စစ်ကောင်စီရဲ့စစ်သံရုံးရှေ့မှာ ပြည်ပရောက်မြန်မာတွေ စုပေါင်းပြီး ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေးဦးဆောင်ကောင်စီ (SCEF)ကိုကြိုဆိုထောက်ခံကြောင်းနဲ့ စစ်အုပ်စုရဲ့ရွေးကောက်ပွဲက သမ္မတအတုဆိုတာကို လက်မခံကြောင်းကန့်ကွက်ဆန္ဒပြပွဲကို ဒီကနေ့ (ဧပြီ ၁၉)မှာ ပြုလုပ်ခဲ့ပါတယ်။
ဆန္ဒပြပွဲကို အမျိုးသားညီညွတ်ရေးအစိုးရ၊ ကိုရီးယားသမ္မတနိုင်ငံဆိုင်ရာ မြန်မာကိုယ်စားလှယ် ဦးရန်နိုင်ထွန်း တက်ရောက်ကာ ညီညွတ်ရေးကို အလေးထားဖို့နဲ့ တော်လှန်ရေးစိတ်ဓာတ် ယိုင်းယိမ်မသွားကြဖို့ တော်လှန်ရေးစကား တိုက်တွန်း ပြောကြားခဲ့ပါတယ်။
ယင်းထောက်ခံပွဲနဲ့ ကန့်ကွက်ပွဲရဲ့ သဘောထား ထုတ်ပြန်ကြေညာချက်ကိုလည်း တောင်ကိုရီးယားအခြေစိုက် မြန်မာတော်လှန်ရေးအဖွဲ့အစည်း ၄၀ နဲ့ ကိုရီးယား အရပ်ဘက်အဖွဲ့အစည်းတွေက ပူးပေါင်းထုတ်ပြန်ခဲ့ပါတယ်။
Public Service Announcement
ထုတ်ပြန်ချက်မှာ ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF)ကို မြန်မာ့ ဒီမိုကရေစီခရီးရဲ့ မျှော်လင့်ချက်ဖြစ်လာမယ်လို့ ယုံကြည်ကြောင်း၊ မြန်မာပြည်သူလူထုရဲ့ ရည်မှန်းချက်ဖြစ်သော ဖက်ဒရယ် ဒီမိုကရေစီ ပြည်ထောင်စုပေါ်ထွန်းရေးအတွက်မရှိမဖြစ် လိုအပ်သော စုစည်းညီညွတ်မှုကို စတင်ဖော်ဆောင်ခြင်းဖြစ်တဲ့အတွက်ထောက်ခံကြိုဆိုကြောင်း ဖော်ပြခဲ့ပါတယ်။
ဒါ့အပြင် ရွေးကောက်ပွဲကဖြစ်ပေါ်လာတဲ့ သမ္မတအတု မင်းအောင်လှိုင်ကို လုံးဝ လက်မခံ အသိအမှတ်မပြုကြောင်း၊ မင်းအောင်လှိုင်ဟာ စစ်ရာဇဝတ်ကောင် ဖြစ်ကြောင်း အကျယ်တဝင့် ဖော်ပြထားပါတယ်။
စစ်အုပ်စုက အရပ်သားတွေအပေါ် တိုက်ခိုက်မှုနဲ့နိုင်ငံရေးဖိနှိပ်မှုများကို လုံးဝရပ်တန့်ဖို့၊ ဒေါ်အောင်ဆန်းစုကြည်နဲ့နိုင်ငံရေးအကျဉ်းသားများအားလုံးကို ခြွင်းချက်မရှိ လွှတ်ပေးဖို့၊ အတုအယောင် ရွေးကောက်ပွဲနဲ့အရပ်သားအစိုးရဟု အမည်တပ်ထားမှုအပေါ် မည်သည့်တရားဝင်မှုမျှ မပြုကြဖို့၊ နိုင်ငံတကာအသိုက်အဝန်းက NUG နဲ့ SCEF အပါအဝင် ပြည်တွင်းပြည်ပ မြန်မာ့ဒီမိုကရေစီအင်အားစုတွေရဲ့ ကြိုးပမ်းမှုတွေမှာ ပူးပေါင်းပါဝင်ပေးဖို့၊ မြန်မာပြည်သူတွေအတွက် လူသားချင်းစာနာမှု အကူအညီတွေကို တိုးမြှင့်ပေးဖို့လည်း တောင်းဆိုခဲ့ပါတယ်။
ဆန္ဒပြပွဲမှာစစ်အာဏာသိမ်းမှုဆန့်ကျင်ရေးကော်မတီ၊ မြန်မာ့ဖက်ဒရယ်ဒီမိုကရေစီအောင်နိုင်ရေးအဖွဲ့ပေါင်းချုပ်(MFDMC)၊ NLD OC Korea နဲ့ တော်လှန်ရေးအဖွဲ့ အသီးသီးမှ ရဲဘော်တွေက တော်လှန်ရေးစကားပြောကြားခဲ့ပြီး နိုင်ငံရေးအကျဉ်းသားတွေ လွတ်မြောက်ရေး ရှပ်ပြာကင်ပိန်းကိုလည်း ထည့်သွင်း ပြုလုပ်ခဲ့ပါတယ်။
ဓာတ်ပုံ – MFDMC
