အာဏာသိမ်းခေါင်းဆောင်တက်ခွင့်မရတဲ့အာဆီယံထိပ်သီးအစည်းအဝေးစတင်

မေ – ၈ ၊၂၀၂၆

အာဏာသိမ်းမြန်မာစစ်ခေါင်းဆောင်တက်ရောက်ခွင့်မရတဲ့အာဆီယံအဖွဲ့ရဲ့(၄၈) ကြိမ်မြောက်ထိပ်သီးအစည်းအဝေးကိုအလှည့်ကျ ဥက္ကဋ္ဌနိုင်ငံဖြစ်တဲ့ဖိလစ်ပိုင်နိုင်ငံ၊စီဘူးမြို့မှာဒီနေ့( မေလ ၈ ရက်)မှာစတင်ကျင်းပနေပါတယ်။

အာဏာသိမ်းစစ်ခေါင်းဆောင်အဖြစ်ကနေရွေးကောက်ခံသမ္မတအဖြစ် ဖန်တီးပုံဖော်ထားတဲ့အာဏာသိမ်းခေါင်းဆောင်တစ်ယောက်အာဆီယံထိပ်သီးအစည်းအဝေးတက်ရောက်ခွင့်မရတဲ့သတင်းကိုစစ်တပ်ထိန်းချုပ်ထားတဲ့သတင်းမီဒီယာတွေမှာ သတင်းအမှောင်ချထားပေမယ့်မိုးကုတ်ကနေပတ္တမြားကြီးတွေ့ရတယ်ဆိုတဲ့သတင်းကိုသာ အသားပေးဖော်ပြနေတာတွေ့ရပါတယ်။

အာဆီယံထိပ်သီးအစည်းအဝေးကိုအာဏာသိမ်းခေါင်းဆောင်ကလွဲရင် အရှေ့တောင်အာရှနိုင်ငံတွေရဲ့ခေါင်းဆောင်တွေတက်ရောက်ကြပါတယ်။

Public Service Announcement

မကြာသေးခင်ကအဖွဲ့ဝင်နိုင်ငံဖြစ်လာတဲ့အရှေ့တီမောနိုင်ငံရဲ့ဝန်ကြီးချုပ်လည်းတက်ရောက်ပါတယ်။

မြန်မာနိုင်ငံမှာ ၂၀၂၀ အထွေထွေရွေးကောက်ပွဲရလဒ်ကနေ ပေါ်ထွက်လာမယ့်လွှတ်တော်စတင်မယ့်ရက် ၂၀၂၁ ခုနှစ် ၊ဖေဖော်ဝါရီလ ၁ရက်မှာ စစ်တပ်ကအရပ်သားရွေးကောက်ခံအစိုးရခေါင်းဆောင်တွေကိုဖမ်းဆီးလိုက်ပြီး အာဏာသိမ်းခဲ့တာပါ။

အာဏာသိမ်းပြီးလပိုင်းအကြာဧပြီလမှာတင်အာဏာသိမ်းမြန်မာစစ်ခေါင်းဆောင်မင်းအောင်လှိုင်ကိုအာဆီယံရုံးချုပ်အခြေစိုက်ရာအင်ဒိုနီးရှားနိုင်ငံ၊ဂျာကာတာမြို့ဆီအာဆီယံနိုင်ငံခေါင်းဆောင်တွေကခေါ်ယူ တွေ့ဆုံကာမြန်မာနိုင်ငံရေးအကျပ်အတည်းကိုဖြေရှင်းဖို့အတွက်ဘုံသဘောတူညီချက်ငါးချက်ကို ချမှတ်ခဲ့ပါတယ်။

အဲဒီဘုံသဘောတူညီချက်ကိုအာဏာသိမ်းမြန်မာစစ်ခေါင်းဆောင်က အကောင်အထည်မဖော်ပေးတာကြောင့်အာဆီယံ ထိပ်သီးအစည်းအဝေးတွေမှာစစ်ကောင်စီခေါင်းဆောင်ပိုင်းတွေကိုအစည်းအဝေးတက်ရောက် ခွင့်ပိတ်ပင်ထားတာပါ။

အာဏာသိမ်းခေါင်းဆောင်ကိုယ်တိုင်တက်ရောက်ခဲ့ပြီးသဘောတူညီခဲ့တဲ့ ဘုံသဘောတူညီချက်ငါးချက်မှာတော့ အကြမ်းဖက်မှုတွေချက်ချင်းရပ်တန့်ဖို့ ၊ သက်ဆိုင်သူတွေတွေ့ဆုံဆွေးနွေးအဖြေရှာဖို့ ၊ မြန်မာ့အရေးမှာ အာဆီယံ ကိုယ်စားလှယ်က ကြားဝင်ဖြေရှင်းပေးဖို့ ၊ အာဆီယံ ကိုယ်စားလှယ်ကိုသက်ဆိုင်သူတွေတွေ့ဆုံခွင့်ပေးဖို့ ၊ အာဆီယံက မြန်မာနိုင်ငံကို လူသားချင်းစာနာမှု အကူအညီတွေပေးဖို့အချက်တွေပါဝင်ပါတယ်။