မေ-၁၂၊ ၂၀၂၆။ ရှိန်း/People’s Spring
စစ်ကိုင်းတိုင်း၊ ရွှေဘိုမြို့နယ်အနောက်ခြမ်း မဲတောရွာကို စစ်တပ်က လေကြောင်းတိုက်ခိုက်ခဲ့တာကြောင့် အမျိုးသမီး၂ဦး အပါအဝင် ပြည်သူ ၄ဦး ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။
မေလ ၁၁ ရက် မနေ့က ညပိုင်း ၉နာရီခွဲခန့်မှာ မန္တလေးတံတားဦး လေတပ်ကနေ တက်လာတဲ့ ဂျက်ဖိုက်တာနဲ့ မဲတောရွာဘုန်းကြီးကျောင်းကို လေကြောင်းတိုက်ခိုက်ခဲ့တာလို့ သိရပါတယ်။
“စစ်ရေး ပစ်မှတ်မဟုတ်ဘဲ စစ်ရှောင်တွေရှိမယ်ထင်တဲ့ ဘုန်းကြီးကျောင်းကို ကြဲတာ။ ဘုန်းကြီးကျောင်းဘေးက နေအိမ်တွေက ပြည်သူတွေထိတာ”လို့ ဒေသခံတစ်ဦးက ပြောပါတယ်။
Public Service Announcement
လေကြောင်းတိုက်ခိုက်ခံရမှုမှာ ဒေသခံ လူလတ်ပိုင်း အမျိုးသမီး၂ဦးနဲ့ အမျိုးသား၂ဦးတို့ ထိခိုက် ဒဏ်ရာရခဲ့တယ်လို့ သိရပါတယ်။
စစ်တပ်က လေကြောင်းကနေ ဗုံး ၃လုံး ကြဲချခဲ့ပြီး စာသင်ကျောင်းနဲ့ ဘုန်းကြီးကျောင်းဆောင်တချို့လည်း ဗုံးစထိမှန်ပျက်စီခဲ့တယ်လို့ ဒေသခံက ပြောပါတယ်။
စစ်တပ်က ရွှေဘိုမြို့နယ်အနောက်ခြမ်းကို ဧပြီလကစတင်ကာ လေကြောင်းတိုက်မှုတွေ ဆက်တိုက်ပြုလုပ်နေခဲ့ပြီး ဦးဇင်း၂ပါးနဲ့ ကိုယ်ဝန်သည်မိခင်အပါအဝင် ပြည်သူ ၅ဦးထပ်မနည်း သေဆုံးခဲ့တယ်လို့ သိရပါတယ်။
