မန္တလေးတိုင်း၊ သပိတ်ကျင်းမြို့နယ်တွင် ရာအိမ်မှုးတစ်ဦးပစ်ခတ်ခံရ၍ စစ်ဆေးနေသည့်အကြမ်းဖက်စစ်ကောင်စီတပ်က ပြည်သူတစ်ဦးကို ပစ်သတ်သွားကြောင်း ဒေသခံများက ပြောသည်။
သပိတ်ကျင်းမြို့နယ်၊ ချောင်းကြီးကျေးရွာရှိ အမှတ် (၁)ရပ်ကွက် ရာအိမ်မှူး ကိုပြည့်အေးဆိုသူသည် ယမန်နေ့ (ဒီဇင်ဘာလ ၁၆ ရက်) နံနက် ၁၁း၃၀ခန့်က ရေထွက်လမ်းခွဲအနီးတွင် ဆယ်အိမ်မှူးတစ်ယောက်နှင့်အတူ ဆိုင်ကယ်စီးလာစဥ် လိုက်လံပစ်ခတ်ခံရ၍ ဆေးရုံတွင်ဆေးကုသမှုခံယူနေသည်ဟု ဒေသခံများက ပြောသည်။
ထိုသို့ပစ်ခတ်ရာတွင် သေနတ်ကျည်မထွက်၍ ထွက်ပြေးသွားသောကြောင့် လိုက်လံပစ်ခတ်ခဲ့ရကြောင်း၊ လက်ရှိတာဝန်ထမ်းဆောင်နေသော ကျေးရွာလူကြီးများ အကြမ်းဖက်စစ်ကောင်စီလက်အောက်တွင် ဆက်လက်တာဝန်ထမ်းနေပါက အရေးယူသွားမည်ဖြစ်ကြောင်းကို အထူး ထပ်မံ သတိပေးလိုက်ကြောင်း စစ်အာဏာရှင်ကိုခုခံတော်လှန်နေသည့် သပိတ်ကျင်းအခြေစိုက် ဗိုလ်လင်းယုန်အဖွဲ့က ပြောသည်။
ပစ်ခတ်ခံရသူ ရာအိမ်မှူးသည် စစ်မှုထမ်းဟောင်းတစ်ဦးဖြစ်ပြီး ခြေထောက် တွင် ဒဏ်ရာရရှိသွားကြောင်း၊ ရာအိမ်မှုး ပစ်ခတ်ခံရမှုကြောင့် ကျောက်ဖြူရွာ ပတ်ဝန်း ကျင်တွင် စစ်တပ်မှ လမ်းသွား လမ်းလာများအား စစ်ဆေးမှုများ ပြုလုပ်နေစဥ် ဆိုင်ကယ် ရပ်မပေးသူနှစ်ဦးအား သေနတ်ဖြင့် ပစ်ရာ ဇရပ်ကွင်းကျေးရွာမှ မောင်သီဟနိုင် ဆိုသူ သေဆုံးကာ၎င်း နှင့် အဖော်ပါလာသူ တစ်ဦးဒဏ်ရာ ရရှိခဲ့ကြောင်း ဒေသခံများက ပြောသည်။
Public Service Announcement
“ပစ်ခတ်ခံရတဲ့ကောင်လေးက ဗိုက်ကိုပွင့်သွားတာ။ ဇရပ်ကွင်းသားပါ။ နေတာကတော့လိပ်ကျရွာမှာနေတာပါ။”ဟု ဒေသခံတစ်ဦးက ပြောသည်။
