မြိုင်မြို့နယ်တွင် တိုက်ပွဲနှစ်ကြိမ်ဖြစ်ရာ စစ်ကောင်စီတပ်သားနှင့်ရဲ ကိုးဦးထက်မနည်းသေဟုဆို

မကွေးတိုင်း မြိုင်မြို့နယ်အတွင်း တိုက်ပွဲနှစ်ကြိမ်ဖြစ်ပွားရာ အကြမ်းဖက်စစ်ကောင်စီ လက်အောက်ခံစစ်သားနှင့် ရဲ ကိုးဦးထက်မနည်းသေဆုံးကြောင်း မြိုင် PDFက ယနေ့ ညပိုင်းတွင် ထုတ်ပြန်သည်။

ယနေ့(ဒီဇင်ဘာလ ၁၇ ရက်) နေ့လည် ၂ နာရီခန့်က သရက်ကန်ရဲစခန်းနှင့် ဖလံကိုင်း ရေနံမြေရဲစခန်းသို့ သွားသော ဆိုင်ကယ် ၇စီးဖြင့် ရဲအင်အား၁၄ယောက်ကို မြိုင် PDFက မိုင်းဖြင့်တိုက်ခိုက်ရာ ရဲငါးဦးသေပြီး တစ်ဦးဒဏ်ရာရရှိခဲ့သည်။

ထို့နောက် နေ့လည်၃နာရီခန့်တွင် မြိုင်နယ်မြောက်ပိုင်း၌ အကြမ်းဖက်စစ်ကောင်စီ စစ်ကြောင်းကို မြိုင် PDFနှင့် MVRFတို့ ပူးပေါင်း၍ ထိပ်တိုက်ထိတွေ့ပစ်ခတ်ရာ ၁၅ မိနစ်ခန့် ကြာမြင့်ခဲ့ပြီး အကြမ်းဖက်စစ်ကောင်စီ တပ်သား လေးဦး သေဆုံးခဲ့ကြောင်း မြိုင် PDFက ဆိုသည်။

မြိုင်မြို့နယ်ရှိ ငါးမြောင်းရွာ၊ငါးတွင်း နှင့် မှန်တောင်အနီး ဒီဇင်ဘာ ၁၅ ရက် နှင့် ၁၆ ရက်တို့တွင် အကြမ်းဖက်စစ်ကောင်စီနှင့် ပြည်သူ့ကာကွယ်ရေးတပ်များ တိုက်ပွဲဖြစ်ပွားခဲ့သေးသည်။

Public Service Announcement