ဇွန်-၆၊၂၀၂၆။သတိုး/People’s Spring
အာဏာသိမ်းစစ်ခေါင်းဆောင် မင်းအောင်လှိုင်တောင်ငူကို လာရောက်မယ့်အကြောင်း သတင်းရတာကြောင့် နေရာနှစ်နေရာကို ၁၀၇ မမရှော့တိုက်ဒုန်း လေးလုံးနဲ့ ပစ်ခတ်တိုက်ခိုက်ခဲ့တယ်လို့ Brave Warriors For Myanmar-BWM အဖွဲ့တာဝန်ရှိသူကပြောပါတယ်။
“မအလခရီးစဉ်ဆိုတော့သူလာမယ့်နေရာအနီးတဝိုက်ကလုံခြုံရေးကပုံမှန်ထက်တင်းကြပ်သလို စစ်ကြောင်းတွေကလည်နဂိုကတည်းကအထပ်ထပ်ရှိနေတာ။ အဲ့ကြားထဲဝင်ပစ်ရတာအတော်စွန့်စားရတယ်” လို့ စစ်ဆင်ရေးနဲ့ပတ်သက်ပြီး ပြောပါတယ်။
ဒီစစ်ဆင်ရေးကို ဇွန် ၆ ရက် ညနေ ၄ နာရီခွဲလောက်မှာ မင်းအောင်လှိုင်ဝင်ရောက်မယ်လို့ သတင်းရထားတဲ့ တောင်ငူ မဆရ ၃ စစ်ဆေးရုံနဲ့ ကေတုမတီလေဆိပ် ကို ၁၀၇ မမရှော့တိုက်ဒုန်း နှစ်လုံးစီ ပစ်ခတ်တိုက်ခိုက်ခဲ့တယ်လို့ဆိုပါတယ်။
Public Service Announcement
ဒီစစ်ဆင်ရေးကို BWMရဲ့ အထူးစစ်ဆင်ရေးအဖွဲ့ နဲ့အတူ KNLA တပ်မဟာ ၂ ၊ တပ်ရင်း ၅ တို့ပူးပေါင်းလုပ်ဆောင်ခဲ့တာဖြစ်ပြီး စစ်ဆင်ရေးလုပ်ဆောင်သူအားလုံး ဘေးကင်းတယ်လို့ အထက်ပါတာဝန်ရှိသူကပြောပါတယ်။
“အချိန်ကပ်တော့ အလုံးရေအများကြီး မစီစဉ်လိုက်နိုင်ဘူး။ ရအောင်တော့ပစ်မယ်ဆိုပြီး ကြိုးစားခဲ့တယ်။” လို့ ပြောပါတယ်။
တောင်ငူခရီးစဉ်ကို ပြည်ထောင်စုဝန်ကြီးလာမယ်လို့ အသိပေးထားတာဖြစ်ပြီး လုံခြုံရေးတွေ အနေနဲ့ ခပေါင်းခန်းမ ပတ်လည် ၊ မီးရထားသံလမ်း လမ်းဆုံ လမ်းခွတွေ မှာ နေရာယူထားသလို မြို့တွင်းမှာလည်း လက်နက်အပြည့်အစုံနဲ့ စစ်ကောင်စီတပ်သား ၆ ဦး Double Cub နဲ့ ကင်းလှည့်နေတယ်လို့ သိရပါတယ်။
BWM အနေနဲ့ မဟာမိတ်အဖွဲ့တွေနဲ့အတူ တော်လှန်ရေး ပြီးဆုံးသည်အထိ ပါဝင်သွားမှာဖြစ်ပြီး ပြည်သူတွေအနေနဲ့လည်း စစ်တပ်နဲ့ သက်ဆိုင်တဲ့ သတင်းတွေ ပေးပို့ကြဖို့ တိုက်တွန်းထားပါတယ်။
