ကန်ပက်လက်နဲ့ မင်းတပ်မြို့ကို စစ်တပ် ဗုံးကြဲ

ဇွန် ၁၄၊ ၂၀၂၆။ ထားမြတ်/People’s Spring

တိုက်ပွဲတွေ ပြင်းထန်နေတဲ့ ချင်းပြည်နယ်တောင်ပိုင်းက မင်းတပ်နဲ့ ကန်ပက်လက်မြို့နယ်တွေကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်မှုတွေ ဆက်တိုက်ပြုလုပ်လျက်ရှိပါတယ်။

စစ်တပ်က ချင်းတောင်ပိုင်းကို ပြန်ထိန်းချုပ်နိုင်ဖို့ထိုးစစ်ဆင်လာလို့ ချင်းပြည်သူ့အစည်း အရုံး (CPU/CPA) နဲ့ မဟာမိတ်တွေက ခုခံတိုက်ခိုက်လျက်ရှိရာ မင်းတပ်မြို့နယ်မှာ ၂ပတ်ကြာ နေ့စဉ်တိုက်ပွဲ ပြင်းထန်နေတာဖြစ်ပါတယ်။ ကန်ပက်လက်မြို့နယ်မှာလည်း မေလ ၁၈ရက်ကတည်းက တိုက်ပွဲဖြစ်ခဲ့ရာ ၁လနီးပါးကြာမြင့်ပြီ ဖြစ်ပါတယ်။

အခု ဇွန်လမှာ မင်းတပ်မြို့နယ်အတွင်း တိုက်ပွဲ ပိုမိုပြင်းထန်နေတာဖြစ်ပြီး နေ့စဉ်နီးပါးလိုလို လေကြောင်းကနေ ဗုံးကြဲတိုက်ခိုက်တာတွေလုပ်ဆောင်နေကြောင်း မင်းတပ်ဒေသခံက အသိပေးပါတယ်။

Public Service Announcement

ဇွန် ၁၄ရက် ဒီကနေ့မနက်မှာလည်း မင်းတပ်မြို့နယ် အရှေ့ခြမ်းတနေရာကို ၄ကြိမ်ထက် မနည်းဗုံးကြဲခဲ့တယ်လို့ ဒေသခံက အသိပေးပါတယ်။ မနေ့က ဇွန်လ ၁၃ရက်ညနေမှာလည်း စစ်တပ်က မင်းတပ်မြို့နယ် တိုက်နယ် (၁၄) အတွင်း ကျေးရွာ ၁ရွာကို အကြောင်းမဲ့ လေကြောင်း တိုက်ခိုက်တာကြောင့် နေအိမ်တွေ ပျက်စီးခဲ့ရတယ်လို့ ဆိုပါတယ်။

အာဏာသိမ်းစစ်တပ်ဟာ မင်းတပ်တိုက်ပွဲမှာ တိုက်ပွဲဖြစ်ပွားရာ နေရာတွေကိုသာမက စစ်ရေးနဲ့ မသက်ဆိုင်တဲ့ ပြည်သူလူထု နေအိမ်တွေ ကိုပါ ဗုံးကြဲတိုက်ခိုက်ဖျက်ဆီးနေတာလို့ ဒေသခံက ပြောပါတယ်။

ဒါ့အပြင် အာဏာသိမ်းစစ်တပ်ဟာ ပြီးခဲ့တဲ့အပတ်အတွင်းက တိုက်ပွဲတွေ ငြိမ်နေတဲ့ ကန်ပက်လက် မြို့နယ် အရှေ့ခြမ်း တနေရာကို လေကြောင်းဗုံးကြဲခဲ့တယ်လို့ ဒေသခံက အသိပေး ထားပါတယ်။

စစ်တပ်ဟာ ချင်း-မကွေးအစပ် ဆောမြို့နယ်က ကျောက်ထုလေဆိပ်ကိုလည်း လေယာဉ်နဲ့ စစ်အင်အား ခဲယမ်း ရိက္ခာတွေ ဖြည့်တင်းနေတယ်လို့ ဒေသတွင်း သတင်းတွေ ဖော်ပြနေတဲ့ ယောအလင်းတန်းက ဇွန် ၁၃ရက်မှာ အသိပေးထားပါတယ်။

စစ်တပ်ဟာ ယောဒေသအတွင်းကျောက်ထုနဲ့ လောင်းရှည်မြို့နယ်တွေမှာ စစ်ကြောင်း ၂ကြောင်း လှုပ်ရှားနေသလို ကျောက်ထု အခြေစိုက် တပ်ကိုလည်း လေကြောင်းကနေ စစ်ကူ၊ ခဲယမ်းတွေ ဖြည့်တင်းသွားတယ်လို့ ဖော်ပြထားပါတယ်။

ဒါ့အပြင် တိုက်ပွဲမှာ ထိခိုက်ဒဏ်ရာရထားတဲ့ စစ်ကောင်စီတပ်သားတွေကို လေယာဉ်နဲ့ ပြန်လည်တင်ဆောင်သွားတယ်လို့လည်း ယောအလင်းတန်းက အသိပေးထားပြီး ပြည်သူတွေ စစ်ရေးသတိမပြတ်ထားဖို့ လေကြောင်း၊ လက်နက်ကြီး အန္တရာယ်တွေ အထူးဂရုစိုက်ကြဖို့ နှိုးဆော်ထားပါတယ်။