ပုလဲမြို့မှ အနောက်ဘက်သို့ ထွက်ခွာလာသော စစ်ကောင်စီတပ်၏ ခြေလျင်ရှေ့ပြေးအဖွဲ့နှင့် ယာဥ်တန်းကို အဝေးထိန်းမိုင်းများဖြင့် ဖောက်ခွဲတိုက်ခိုက်ရာ စစ်ကောင်စီတပ်သား သေဆုံးမှုများပြားနိုင်ကြောင်း ပုလဲမြို့နယ် ပြည်သူ့ကာကွယ်ရေးတပ်ဖွဲ့(PPDF)အဖွဲ့ခေါင်းဆောင် ဗိုလ်နဂါးက လူထုနွေဦးသို့ ပြောသည်။
ယနေ့(ဒီဇင်ဘာ၁၈ရက်) နေ့လည် ၁နာရီ၄၅မိနစ်အချိန်တွင် ပုလဲမြို့မှ ထွက်ခွာလာသော စစ်ကောင်စီတပ်၏ ခြေလျင်ရှေ့ပြေးအဖွဲ့ကို အဝေးထိန်းမိုင်းများခွဲ၍ စတင်တိုက်ခိုက်ခဲ့ကြောင်း ဗိုလ်နဂါးက ပြောသည်။
“စောင့်ပြီးတော့ မိုင်းဆွဲတယ်။ အဝေးထိန်းမိုင်းတွေနဲ့ ဆွဲတယ်။ ရှေ့ပြေးအဖွဲ့က ကျွန်တော်တို့ လိုက်ရှာပြီး ပစ်တယ်။ ကျွ်တော်တို့က ၅မိနစ်တစ်ခါနားလိုက်၊ ခွဲလိုက်လုပ်နေတာ”ဟု ၎င်းက ပြောသည်။
“ကားလေးစီးပျက်သွားတယ်။ စိန်ပြောင်းနဲ့ ပစ်တာ။ ခြေလျင်ရှေ့ပြေးသွားတဲ့ အဖွဲ့တွေက မိုင်းတွေထိပြီးသေတာ များတယ်။ ကားတွေပေါ်မှာ ပါတဲ့သူတွေလည်း သေတယ်။ ကားလေးစီးက ရွေ့လို့ မရသေးဘူး”ဟု ဗိုလ်နဂါးက ပြောသည်။
အဆိုပါ တိုက်ပွဲတွင် အဝေးထိန်းမိုင်း ၂၁လုံးအသုံးပြုဖောက်ခွဲတိုက်ခိုက်ခဲ့ကြောင်း PPDF က ထုတ်ပြန်ထားသည်။
ထိုအပြင် ဒီဇင်ဘာ ၁၇ ရက်နေ့ကလည်း စစ်ကောင်စီတပ်ကို ပုလဲPDF က ဗုံးခွဲတိုက်ခိုက်ခဲ့၍ ထိ့ခိုက်သေဆုံးမှုများကြောင်း ထုတ်ပြန်ထားသည်။