လေးကေ့ကော် မေတ္တာလင်းမြိုင်တိုက်ပွဲ စစ်ကောင်စီတပ်အရာရှိအပါအဝင် ၅၀ခန့်သေ

ကရင်ပြည်နယ် မြ၀တီမြို့နယ် လေးကေ့ကော်ဒေသ မေတ္တာလင်းမြိုင်နှင့် မယ့်ထော်သလေးကြားတွင် ယနေ့ တိုက်ပွဲပြင်းထန်စွာ ဖြစ်ပွားခဲ့ရာ စစ်ကောင်စီတပ်မှ အရာရှိအပါအဝင် ၅၀ဦးနီးပါးသေဆုံးခဲ့ကြောင်း PVTV သတင်းဌာနကဖော်ပြသည်။

လေးကေ့ကော်ဒေသ တိုက်ပွဲ ၅ ရက်မြောက်နေ့အဖြစ် ကရင်အမျိုးသားအစည်းအရုံး(KNU) တပ် KNLA၊ PDF ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲ ဖြစ်ပွားခဲ့ရာ စစ်ကောင်စီဘက်မှ တပ်ခွဲမှူး (၂) ဦးနှင့် ဒုတပ်ခွဲမှူး (၂) ဦး အပါအဝင် (၅၀) ဦးနီးပါးသေဆုံးပြီး စစ်ကောင်စီတပ်၏ လက်နက်ခဲယမ်းများသိမ်းဆည်း ရရှိခဲ့သည်ကိုသတင်းဓါတ်ပုံနှင့်တစ်ကွတင်ဆက်ထားသည်။PVTVသည် အမျိုးသားညီညွတ်​ရေးအစိုးရကတင်ဆက်ထုတ်လွှင့်​နေ​သော သတင်းမီဒီယာဖြစ်သည်။

တိုက်ပွဲမှသိမ်းဆည်းရရှိခဲ့သည့် လက်နက်ခဲယမ်းများမှာ ၆၀ မမ (၁) လက်၊ ပစ္စတို (၄) လက်၊ စနိုက်ပါ (၁) လက် ၊ MK1 (၃) လက်၊ MK2 (၃) လက် စုစုပေါင်း (၁၂) လက်နှင့် လက်ပစ်ဗုံးအချို့၊ ကျည်ကပ်အချို့ နှင့် ကျည်ဆန်များ ဖြစ်သည်ကို​တွေ့ရသည်။

စစ်​ကောင်စီတပ်က အထိ့နာပြီး​နောက်လက်ရှိအချိန်တွင် အကြမ်းဖက်စစ်ကောင်စီတပ်မှ လေယာဉ်များ ဝဲနေကြောင်း ဖော်ပြထားသည်။

Public Service Announcement

တစ်ဖက်တွင်လည်း စစ်ကောင်စီတပ်၏ ဖလူးစခန်းကာကင်းကုန်းကို ယနေ့ ညနေပိုင်းတွင် KNLA က တက်ရောက်ရှင်းလင်းနိုင်ခဲ့ပြီး ၆၀ မမ လက်နက်ကြီးအပါအဝင် လက်နက်ငယ် ၂၀ ရရှိခဲ့သည်ဟု မြေပြင်သတင်းပေးပို့ချက်အရ သိရသည်။