လက်ရှိ ကျင်းပနေတဲ့ ကမ္ဘာ့ဖလား ဘောလုံးပြိုင်ပွဲကြီးရဲ့ အုပ်စုအဆင့် ပွဲစဉ်အားလုံး ပြီးဆုံးသွားပြီဖြစ်ပြီး ၃၂ သင်း ရှုံးထွက်အဆင့် ပွဲစဉ်တွေ ထွက်ပေါ်လာပါတယ်။
အခုနှစ် ကမ္ဘာ့ဖလားမှာတော့ အုပ်စုပထမနဲ့ ဒုတိယ အသင်းတွေသာ မကဘဲ အုပ်စုတတိယ နေရာတွေက အကောင်းဆုံး အသင်း ၈ သင်းပါ ရှုံးထွက်အဆင့် တက်ရောက်ခွင့် ရခဲ့ကြပါတယ်။ အုပ်စုပွဲစဉ်တွေ နောက်ဆုံးယှဉ်ပြိုင်ရာမှာ အုပ်စု(J)ရဲ့ အယ်လ်ဂျီးရီးယားနဲ့ ဩစတြီးယားတို့က ၃ ဂိုးစီ သရေကျခဲ့တာကြောင့် နှစ်သင်းလုံး ရှုံးထွက်အဆင့်ကို အောင်အောင်မြင်မြင် တက်ရောက်သွားနိုင်ခဲ့ပါတယ်။ အုပ်စု (G)ရဲ့ တတိယ နေရာမှာ ရှိနေခဲ့တဲ့ အီရန်ကတော့ အဲဒီပွဲ ရလဒ်ကြောင့် အကောင်းဆုံး အုပ်စု တတိယ အသင်းတွေ စာရင်းမှာ နံပါတ် ၉ ဆီ ရောက်သွားပြီး ပြိုင်ပွဲကနေ ထွက်ခွာခဲ့ရပါတယ်။ အစောပိုင်းတုန်းက အီရန်ဟာ နောက်တစ်ဆင့်တက်ဖို့ အတော်လေး မျှော်လင့်ချက် အားကောင်းနေခဲ့တာပါ။
အုပ်စုပွဲစဉ်တွေရဲ့ နောက်ဆုံး ရလဒ်တွေမှာတော့ လက်ရှိ ချန်ပီယံ အာဂျင်တီးနားကလည်း ဂျော်ဒန်ကို သုံးဂိုး-တစ်ဂိုးနဲ့ အနိုင်ရပြီး အုပ်စုပွဲစဉ် ၃ ခုလုံး ရာနှုန်းပြည့် အနိုင်ရလဒ်ကို ပိုင်ဆိုင်နိုင်ခဲ့ပါတယ်။ အခုနှစ် ကမ္ဘာ့ဖလားမှာ အုပ်စုပွဲစဉ် အားလုံး အနိုင်ရခဲ့တဲ့ အသင်းတွေက အာဂျင်တီးနား၊ ပြင်သစ်နဲ့ ပူးတွဲအိမ်ရှင် မက္ကဆီကိုတို့ ၃ သင်းသာ ရှိခဲ့ပါတယ်။ အာဂျင်တီးနားနဲ့ ပြင်သစ်တို့ဟာ ပြီးခဲ့တဲ့ ၂၀၂၂ ကမ္ဘာ့ဖလား ဗိုလ်လုပွဲမှာ တွေ့ဆုံခဲ့ကြဖူးပါတယ်။
ဇွန်လ ၂၇ ရက်နေ့ ညပိုင်းက ယှဉ်ပြိုင်ကစားခဲ့တဲ့ အုပ်စုအဆင့် နောက်ဆုံးပွဲစဉ်တွေမှာ နာမည်ကြီး အင်္ဂလန်ကလည်း ပနားမားကို နှစ်ဂိုး-ဂိုးမရှိနဲ့ အနိုင်ယူပြီး အုပ်စု(L)ရဲ့ ထိပ်ဆုံးနေရာကို ရယူနိုင်ခဲ့ပါတယ်။ တခြား နာမည်ကြီး အသင်းတစ်သင်းဖြစ်တဲ့ ပေါ်တူဂီကတော့ ကိုလံဘီယာနဲ့ ဂိုးမရှိ သရေကျခဲ့ပြီး အုပ်စု ဒုတိယ နေရာနဲ့သာ နောက်တစ်ဆင့်ကို တက်လာခဲ့ပါတယ်။
Public Service Announcement
ကမ္ဘာ့ဖလား ၃၂ သင်း ရှုံးထွက်အဆင့် ပွဲစဉ်တွေကို ဇွန်လ ၂၉ ရက်နေ့ကနေ ဇူလိုင် ၃ ရက်နေ့ထိ ယှဉ်ပြိုင်ကြမှာပါ။ အဲဒီပွဲစဉ်တွေကတော့ အောက်ပါအတိုင်း ဖြစ်ပါတယ်။
တောင်အာဖရိက – ကနေဒါ
ဘရာဇီး – ဂျပန်
ဂျာမနီ – ပါရာဂွေး
နယ်သာလန် – မော်ရိုကို
ပေါ်တူဂီ – ခရိုအေးရှား
အိုင်ဗရီကို့စ် – နော်ဝေး
ပြင်သစ် – ဆွီဒင်
မက္ကဆီကို – အီကွေဒေါ
အင်္ဂလန် – ကွန်ဂို
ဘယ်လ်ဂျီယမ် – ဆီနီဂေါ
အမေရိကန် – ဘော့စ်နီးယား
စပိန် – ဩစတြီးယား
ဆွစ်ဇာလန် – အယ်လ်ဂျီးရီးယား
ဩစတြေးလျ – အီဂျစ်
အာဂျင်တီးနား – ကိပ်ဗာဒီ
ကိုလံဘီယာ – ဂါနာ
ကိုးကား: FIFA
ဓာတ်ပုံ – Reuters, Getty Images, AP, EPA
