ဇွန်-၂၈၊၂၀၂၆။မိုမို/People’s Spring
မကွေးတိုင်း၊ ရေစကြိုမြို့အနီးမှာ ပြည်သူ့ကာကွယ်ရေးတပ်မတော်(PDF) အယောင်ဆောင်ပြီး အရပ်သားတွေကို စစ်ဆေးပိုက်ဆံတောင်းနေတဲ့ စစ်တပ်ကို တိုက်ခိုက်ခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့(ပကဖ) တာ၀န်ရှိသူက ပြောပါတယ်။
ရေစကြိုမြို့ပေါ်ကနေ စစ်တပ်က အင်အား ၄၅ ဦးနဲ့ မြို့နဲ့ (၁)မိုင်ခွဲ၀န်းကျင်က ပေကုန်းကျေးရွာနားမှာ မနေ့က (ဇွန်လ ၂၇ ရက်) ညနေ ၆နာရီ၀န်းကျင်က PDF အယောင်ဆောင်ကာ လမ်းသွားလမ်းလာတွေကို စစ်ဆေးပိုက်ဆံတောင်းနေတာလို့ ဆိုပါတယ်။
ဒါ့ကြောင့် ပေကုန်းကျေးရွာဘောလုံးကွင်းထိပ်မှာ ကာကွယ်ရေးရဲဘော်တွေက အနီးကပ်တိုက်ခိုက်ခဲ့ပြီး စစ်တပ်က ဒဏ်ရာရသူတချို့ရှိတယ်လို့ အသိပေးပါတယ်။
Public Service Announcement
အဲဒီ တိုက်ခိုက်မှုကို ရေစကြို ပကဖ နဲ့ အတူ ပခုက္ကူခရိုင် တပ်ရင်းအမှတ်(၉)တို့ပူးပေါင်းခဲ့တာလို့လည်း သိရပါတယ်။
“ထိတွေ့မှုက ၁၅မိနစ်လောက် ကြာခဲ့တယ်။စစ်တပ်ဘက် အထိခိုက်က နှစ်ယောက်ကတော့အပြင်းထန်ဒဏ်ရာရတယ်”လို့ အထက်ပါတာ၀န်ရှိသူက တိုက်ခိုက်မှုဖြစ်စဉ်ကို ရှင်းပြပါတယ်။
စစ်တပ်က ရေစကြိုမြို့နယ် ကာကွယ်ရေးအဖွဲ့တွေရဲ့ ယူနီဖောင်းဝတ်ဆုံတွေသုံးပြီး ဒေသခံတွေ ထင်ယောင်ထင်မှား ဖြစ်စေဖို့ စစ်ကြောင်းထိုးတာတွေ လည်းရှိတယ်လို့ သူက ပြောပါတယ်။
အခုဇွန်လ ၁၇ ရက်ကလည်း ရေစကြိုမြို့တောင်ဘက်က ၂၀၀၀ပြည့်ရပ်ကွက်အနီးမှာ စစ်တပ်ကင်းပတ်လာတာကို စောင့်ကြိုတိုက်ခိုက်ခဲ့ပြီး ထိခိုက်သေဆုံးသူ ၅ဦးရှိတယ်လို့ ရေစကြို ပကဖ က ထုတ်ပြန်ထားပါတယ်။
ဒါ့အပြင် ဇွန်လ ၈ ရက်ကလည်း စစ်တပ်အတွက် တပ်သားသစ်တွေ စုဆောင်းပေးနေတဲ့ ရေစကြိုမြို့ အမှတ်(၄) ရပ်ကွက် အုပ်ချုပ်ရေးမှူးနဲ့သားဖြစ်သူ ပျူစောထီးတို့ နေအိမ်မှာ ပစ်ခတ်ခံရပြီး သေဆုံးခဲ့တာရှိပါတယ်။
ရေစကြိုမြို့အနောက်ဘက် (၂)မိုင်၀န်းကျင်အကွာ ဖူလုံကျေးရွာအနီးမှာ စစ်တပ်ရဲ့ အမှတ်(၂၅၆၊၂၅၈၊၂၅၈) ခြေလျင်တပ်ရင်းတွေ ရှိပါတယ်။ဒါ့အပြင် ပခုက္ကူမြို့နယ်နဲ့ ဆက်စပ်နေတာကြောင့်လည်း တပ်မ(၁၀၁) ကနေ ရေစကြိုမြို့နယ်ကို မကြာခဏ စစ်ကြောင်းထိုးမီးရှို့သတ်ဖြတ်တာရှိပါတယ်။
