ကမ္ဘာ့ဖလားရဲ့ အအောင်မြင်ဆုံး အသင်းဖြစ်တဲ့ ဘရာဇီးဟာ အာရှ အသင်းကောင်း ဂျပန်ကို ကျော်ဖြတ်ပြီး ၁၆ သင်း ရှုံးထွက်အဆင့်ကို တက်လှမ်းနိုင်ခဲ့ပါတယ်။ နောက်ပိုင်းနှစ်တွေမှာ ဘောလုံး အဆင့်အတန်း သိသိသာသာ တိုးတက်လာပြီး အခုနှစ် ပြိုင်ပွဲမှာ ဖျက်မြင်း အသင်းတစ်သင်းအဖြစ် သတ်မှတ် ခံထားရတဲ့ ဂျပန်ဟာ အကောင်းဆုံး ကြိုးစား တုံ့ပြန်ခဲ့ပေမယ့်လည်း သမ္ဘာနဲ့ တစ်ဦးချင်း အရည်အသွေး သာလွန်တဲ့ ဘရာဇီးကို နောက်ဆုံးမိနစ်ဂိုးနဲ့ အရေးနိမ့်ခဲ့တာ ဖြစ်ပါတယ်။
ဂျပန်အတွက် ကွင်းလယ်လူ ကိုင်ရှူဆာနိုက ပထမပိုင်းမှာ တစ်ကိုယ်တော် အစွမ်းနဲ့ ဦးဆောင်ဂိုး သွင်းပေးခဲ့ပါတယ်။ ဘရာဇီးရဲ့ တိုက်စစ်ဆင်မှုကို ကြားဖြတ် ဟန့်တားပြီးတဲ့နောက် ဆာနိုက ကိုယ်တိုင် ဘောလုံးဆွဲပြေးလာရင်း ဘီးကုပ်စက်ဝိုင်း အပြင်ဖက်ကနေ ကန်သွင်းခဲ့ပြီး ဘရာဇီး ဂိုးသမား အလီဆင်ဘက္ကာ ဘယ်လိုမှ မတားဆီးနိုင်ခဲ့ပါဘူး။ ဂျပန်ဟာ စုဖွဲ့မှု ကောင်းကောင်းနဲ့ ဘရာဇီး တိုက်စစ်ကို ဟန့်တားနေခဲ့ပြီး အရင်ပွဲတွေမှာ ဂိုးမြူးခဲ့တဲ့ ဘရာဇီး တိုက်စစ်မှူး မက်သီးရက်စ် ကွန်ညာလည်း ဂျပန်ရဲ့ ပိတ်ဆို့မှုတွေကြောင့် ခြေမပေါ်ခဲ့ပါဘူး။
ဒုတိယပိုင်းမှာတော့ ဘရာဇီးနည်းပြ ကာလို အန်ဆလော့တီက အန်းဒရစ် ဖိလစ်ပီနဲ့ ဂေဘရီရယ်လ် မာတီနယ်လီတို့ကို ထည့်သွင်းပြီး တိုက်စစ်ပိုင်းကို အပြောင်းအလဲ လုပ်ခဲ့သလို ဂျပန်အပေါ် ပိုမို ဖိအားပေးလာနိုင်ခဲ့ပါတယ်။ ဒါပေမဲ့ ဂိုးသမား ဇီယွန် ဆူဇူကီးနဲ့ ဂျပန်နောက်တန်းရဲ့ ကြိုးစားမှုတွေကြောင့် ဘရာဇီးအသင်း ဂိုးရဖို့ ခက်နေခဲ့ပါသေးတယ်။ ဘရာဇီးအတွက် ချေပဂိုးကိုတော့ ပွဲချိန် ၅၆ မိနစ်မှာ ဝါရင့် ကွင်းလယ် ကစားသမားကြီး ကက်စ်မဲရိုးက အနီးကပ် ခေါင်းတိုက်ပြီး သွင်းယူခဲ့ပါတယ်။ တစ်ဂိုးစီ သရေရလဒ်နဲ့ ပွဲပြီးတော့မယ်လို့ ထင်မှတ်နေကြချိန် ဒုတိယပိုင်း နာကျင်အပိုဆောင်းချိန် ၅ မိနစ်လောက်မှာတော့ ဘရူနို ဂွီမာရက်စ် ပေးပို့တဲ့ ဘောလုံးကို ဘရာဇီးရဲ့ လူစားဝင် တောင်ပံတိုက်စစ်သမား မာတီနယ်လီက ကန်သွင်းပြီး အနိုင်ဂိုး ရယူသွားတာကြောင့် ဂျပန်တို့ ကံဆိုးခဲ့ရပါတယ်။
ဘရာဇီးရဲ့ အီတလီသား နည်းပြကြီး အန်ဆလော့တီက သူ့အသင်းရဲ့ ပထမပိုင်း ကစားပုံက အားရစရာ သိပ်မရှိခဲ့ဘူးလို့ ဝန်ခံခဲ့ပါတယ်။ ဒါပေမဲ့ သူက စိတ်တော့ မပူခဲ့ကြောင်း၊ ပထမပိုင်းအပြီး အဝတ်လဲခန်းထဲမှာ သူ့အသင်းသားတွေကို ဒုတိယပိုင်းကျရင် ကျိန်းသေပေါက် ဂိုးရမယ်လို့ ယုံကြည်ထားတယ်ဆိုတာ ပြောပြခဲ့ကြောင်း အန်ဆလော့တီက ဆိုပါတယ်။ အရေးကြီးတာက အသင်းရဲ့ စုဖွဲ့မှုနဲ့ အစီအစဉ်တွေကို ပုံပျက်မသွားအောင် ထိန်းထားဖို့ဖြစ်ကြောင်း၊ ဘရာဇီးဟာ လမ်းကြောင်းမှန်ပေါ်မှာ ရှိနေမှန်း အသင်းသား အားလုံး နားလည်ထားပြီး အဲဒီလမ်းအတိုင်း ဆက်လျှောက်နေကြောင်း သူက ပြောပါတယ်။
Public Service Announcement
ဂျပန်နည်းပြ ဟာဂျီမီ မိုရီယာဆုကတော့ အခုပွဲမှာ ရှုံးနိမ့်ခဲ့ပေမယ့် သူ့အသင်းအတွက် ဂုဏ်မငယ်ဘူးလို့ ပြောပါတယ်။ ဂျပန်ဟာ ကမ္ဘာ့ထိပ်တန်း ဘောလုံးအသင်းတွေနဲ့ ကွာဟချက်ကို အများကြီး လျှော့ချလာနိုင်ခဲ့ပြီလို့ ခံစားရကြောင်းလည်း သူက ဆိုပါတယ်။ ဘရာဇီးဟာ တကယ့် ထိပ်ဆုံးအဆင့် အသင်းတစ်သင်း ဖြစ်သလို ဂျပန်ကလည်း အဲဒီအဆင့်မျိုးဆီ တရွေ့ရွေ့ ချဉ်းကပ်လာနေကြောင်း မိုရီယာဆုက ပြောပါတယ်။ ရလဒ်ပိုင်းအရတော့ အရမ်း ကြေကွဲစရာ ဖြစ်ခဲ့ကြောင်း၊ ဂျပန်အနေနဲ့ ဒီထက်ပိုပြီးကောင်းအောင် ကစားဖို့ လိုနေဆဲဖြစ်ကြောင်း၊ အဆင့်အမြင့်ဆုံး ပြိုင်ပွဲတွေမှာ အကောင်းဆုံး ခြေစွမ်းနဲ့ ယှဉ်ပြိုင်နေဖို့ ဆိုတာက ဂျပန်အသင်းရဲ့ ရည်မှန်းချက်ဖြစ်ကြောင်း သူက သတင်းထောက်တွေကို မှတ်ချက်ပေးသွားပါတယ်။
ဘရာဇီးဟာ ၁၆ သင်းရှုံးထွက်အဆင့်မှာတော့ အိုင်ဗရီကို့စ်နဲ့ နော်ဝေးပွဲစဉ်က အနိုင်ရလာတဲ့ အသင်းနဲ့ ယှဉ်ပြိုင်ရမှာ ဖြစ်ပါတယ်။
ကိုးကား: FIFA
