ဇူလိုင်-၁၇၊၂၀၂၆။ဇော်ရမ်း/People’s Spring
မန္တလေးတိုင်း၊ရွှေဘိုမြို့မှာဒီနေ့ မနက်က လှုပ်သွားတဲ့ ရစ်ခ်တာစကေး ၅ဒဿမ၂အဆင့်ငလျင်ကြောင့် စစ်ကိုင်းတိုင်းအပြင် မန္တလေးတိုင်းနဲ့ ရှမ်းပြည်နယ်အထိ သိသိသာသာခံစားခဲ့ရပါတယ်။
ဇူလိုင်လ၁၇ရက် မနက် ၇နာရီ ၅၆မိနစ်မှာရွှေဘိုမြို့အနီးမြေအနက် ၁၀ ကီလိုမီတာ(၆မိုင်ခန့်)ကို ဗဟိုပြုပြီးလှုပ်သွားတာလို့ အမေရိကန်ဘူမိလေ့လာရေး အသင်း(USGS) က ထုတ်ပြန်ပါတယ်။
အဆိုပါငလျင်ကို စစ်ကိုင်းတိုင်းအထက်ပိုင်း မော်လိုက်မြို့အထိ ခံစားရပြီး မန္တလေးတိုင်းထဲက မြို့နယ်တွေအပြင် ရှမ်းပြည်နယ်တောင်ပိုင်းနဲ့ မြောက်ပိုင်းက မြို့တွေအထိ ခံစားလိုက်ရပါတယ်။
Public Service Announcement
“လှုပ်ချိန်ကသာမန်ထက်ကိုကြာတယ်။ မနှစ်ကမန္တလေးမှာအားပြင်းငလျင်လှုပ်ပြီးနောက်ပိုင်း ကျတော်တို့ဆီ ပထမဆုံး ပြန်လှုပ်တာ” လို့ ဖောင်းပြင်မြို့ခံတစ်ဦးကပြောပါတယ်။
အမျိုးသားညီညွတ်ရေးအစိုးရ၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)ကတော့ အဆိုပါငလျင်ဟာ နောင်ချိုမြို့အနီးကို ဗဟိုပြုတာလို့ ထုတ်ပြန်ပါတယ်။
ဒါအပြင်မန္တလေးတိုင်း၊ စဥ်ကူးမြို့အနီးမှာ လည်း ဇူလိုင် ၁၇ ရက်မနက် ၈ နာရီ ၁၂ မိနစ်မှာ မြေအောက်အနက် ၁၀ ကီလိုမီတာခန့်ကိုဗဟိုပြုပြီးလှုပ်ခဲ့တာငလျင်ဟာရစ်ခ်တာစကေး ၄ဒဿမ၁ အင်အားရှိငလျင်လှုပ်ခဲ့တယ်လို့ MoSLHA ကဖော်ပြပါတယ်။ ငလျင်ကြောင့် ထိခိုက်မှုသတင်းကိုတော့မကြားရသေးပါဘူး။
ဒါ့အပြင်ဇူလိုင်လ ၁၂ရက် မနက်ပိုင်းကလည်း စဉ့်ကူးမြို့အနီး ရစ်ခ်တာစကေး ၄ ဒဿမ၄ အဆင့်ငလျင်လှုပ်ခဲ့ပါတယ်။
ရွှေဘိုနဲ့ စဉ့်ကူးမြို့ဟာ စစ်ကိုင်းပြတ် ရွေ့ဖြတ်သွားပြီး ယခင်ကလည်း ငလျင်တွေမကြာခဏလှုပ်ဖူးသလို ထိခိုက်ပျက်စီးမှုတွေလည်း ရှိခဲ့ပါတယ်။ဇူလိုင်လထဲမှာ စစ်ကိုင်းတိုင်း၊မန္တလေးတိုင်း၊ ဧရာဝတီတိုင်း၊ရန်ကုန်တိုင်းနဲ့ ချင်းပြည်နယ်က မြို့နယ်အချို့မှာ ငလျင်တွေ မကြာခဏလှုပ်ခဲ့ပါတယ်။
