သြဂုတ် – ၈ ၊၂၀၂၆ /People’s Spring
စစ်ကိုင်းတိုင်း၊ရွှေဘိုခရိုင်၊ တန့်ဆည်မြို့နယ်ထဲကရွှေလှံရွာမှာ သဖန်းဆိပ်ဆည်ရေလွှတ်မှုကြောင့် မူးမြစ်ရေကြီးနေပြီး ဩဂုတ်လ ၇ ရက် မနက်ပိုင်းမှာ အမျိုးသားတစ်ဦး ရေစီးနဲ့မျောပါ ပြီး ပျောက်ဆုံးနေတယ်လို့ဒေသတွင်းသတင်းရင်းမြစ်ဆီကသိရပါတယ်။
တန့်ဆည်မြို့နယ် အရှေ့ခြမ်း၊ မူးမြစ်ကမ်းဘေးရှိ ရွှေလှံရွာမှာနေထိုင်တဲ့ အသက် ၅၀ အရွယ် အမျိုးသားဟာ မနေ့ (သြဂုတ်လ ၇ ရက် ) မနက် ၁၀ နာရီခန့်မှာ ရေစီးနဲ့အတူ မျောပါသွားတာလို့ ဒေသခံ တစ်ဦးကပြောပါတယ်။
“အလောင်းတော့ ပြန်မရကြသေးဘူး” လို့ သူကပြောပါတယ်။
Public Service Announcement
လက်တလောမှာကန့်ဘလူခရိုင် ၊ကျွန်းလှမြို့နယ်ကသဖန်းဆိပ်ဆည် အထက်ပိုင်းဒေသတွေမှာ မိုးကောင်းခဲ့တာကြောင့် ဆည်မှာ ရေပြည့်ပြီး စိုးရိမ်ရေအမှတ်အနီးရောက်ရှိနေလို့ သြဂုတ်လ ၅ရက်ကစတင်ပြီးရေကိုလျော့ချပေးနေရတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့ (ပကဖ)ကထုတ်ပြန်အသိပေးထားပါတယ်။
သဖန်းဆိပ်ဆည်ကနေရေလွှတ်နေပြီးအဲဒီရေတွေဟာ ကာဘိုးဆည်ကနေတဆင့် မူးမြစ်ဆီရောက်ကာအောက်ဘက်သို့ ဆက်ဆင်းသွားတာပါ။
မူးမြစ်ဘေး ကကျေးရွာတွေရေဘေးကို သတိပြုကြဖို့နဲ့ ရိတ်သိမ်းပြီးတဲ့ ကောက်ပဲသီးနှံတွေကို ရေလွတ်ရာ အချိန်မီ ရွှေ့ပြောင်းကြဖို့ တော် လှန်ရေးအဖွဲ့တွေက အသိပေးထားပါတယ်။
မူးမြစ်ရေဟာစစ််ကိုင်းတိုင်းထဲက ခင်ဦး၊ ဒီပဲယင်း၊ ရေဦး၊ တန့်ဆည်နဲ့ စစ်ကိုင်း၊ ဝက်လက်၊ မြင်းမူနယ်ဘက်တွေအထိ သက်ရောက်နေပြီး ရေကြီးရေလျှံမှုတွေ ကြုံတွေ့နေရတယ်လို့ သိရပါတယ်။
