စက်တင်ဘာ ၂၆၊၂၀၂၆။ထားမြတ်/People’s Spring
ရှေ့ဆက်ရမယ့်တော်လှန်ရေးခရီးကြမ်းမှာ တော်လှန်ရေးအင်အားစုများအကြား သွေးခွဲစကားတွေနဲ့ စိန်ခေါ်မှုတွေကို ညီညွတ်သော စွမ်းအားနဲ့ ကျော်လွှားကြဖို့ အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်းက တိုက်တွန်းလိုက်ပါတယ်။
စက်တင်ဘာ ၂၅ရက်မှာကျင်းပတဲ့ မကွေးဖက်ဒရယ်ယူနစ်လွှတ်တော် ပုံမှန်အစည်းအဝေးကို ဝန်ကြီးချုပ် မန်းဝင်းခိုင်သန်းက သဝဏ်လွှာပေးပို့ခဲ့ရာ အခုလို တိုက်တွန်းခဲ့တာပါ။
ဒါ့အပြင်ဥပဒေပြုရေး၊ အုပ်ချုပ်ရေးနဲ့ ကာကွယ်ရေးဆိုင်ရာအဖွဲ့အစည်းများအကြား အပြန်အလှန် သည်းခံမှု၊ နားလည် ယုံကြည်မှု၊ စေ့စပ်ညှိနှိုင်းမှုတို့ဖြင့် ဟန်ချက်ညီညီ ပူးပေါင်းဆောင်ရွက်သွားကြဖို့လည်း အထူးတိုက်တွန်းကြောင်း ပြည်ထောင်စုဝန်ကြီးချုပ်က တိုက်တွန်းပါတယ်။
Public Service Announcement
အညာဒေသ မကွေးယူနစ်ဟာ စစ်အုပ်စုရဲ့အဓိက ကာကွယ်ရေးပစ္စည်းထုတ်လုပ်ရေး စက်ရုံများ တည်ရှိရာဒေသဖြစ်သကဲ့သို့ ခုခံတွန်းလှန်စစ်ရဲ့ မဟာဗျူဟာကျသော ဆုံချက်တစ်ခုလည်း ဖြစ်ကြောင်း ဝန်ကြီးချုပ်က ပြောပါတယ်။
အဲဒီလို ဗျူဟာမြောက်မှုကြောင့် အကြမ်းဖက်စစ်အုပ်စုဟာ အရပ်သားပြည်သူများကို ရည်ရွယ်ချက်ရှိရှိ လေကြောင်းမှ ပစ်မှတ်ထားတိုက်ခိုက်တာ၊ ရွာလုံးကျွတ် မီးရှို့ ဖျက်ဆီးတာစတဲ့ စစ်ရာဇဝတ်မှုနဲ့ လူ့အခွင့်အရေးချိုးဖောက်မှုများကို နေ့စဉ်နဲ့အမျှ ရက်စက်စွာ ကျူးလွန်နေကြောင်းလည်း ဖော်ပြထားပါတယ်။
ဒီလို ရက်စက်ကြမ်းကြုတ်တဲ့ ဖိနှိပ်မှုများကြားမှပင် မကွေး ပြည်သူလူထု၊ မြေပြင် သပိတ်ကော်မတီများ၊ CDM ဝန်ထမ်းများ၊ ပြည်သူ့ကာကွယ်ရေးတပ်ဖွဲ့ဝင်များ နဲ့ ဒေသခံတော်လှန်ရေး အင်အားစုများရဲ့ စည်းလုံးညီညွတ်မှု၊ ရွပ်ရွပ်ချွံချွံ တွန်းလှန်တိုက်ပွဲဝင်မှုတို့ ကြောင့် ကိုယ်ပိုင်ပြဋ္ဌာန်းခွင့်နဲ့ ကိုယ်ပိုင်အုပ်ချုပ်ခွင့်မှာ မြေပြင်တွင် လက်တွေ့ပုံပေါ်လာနေပြီလို့လည်း ဝန်ကြီးချုပ် မန်းဝင်းခိုင်သန်းက ပြောကြားပါတယ်။
ဒါ့အပြင် စစ်အာဏာရှင်စနစ် အမြစ်ပြတ်ချေမှုန်းရေး၊ စစ်မှန်သော ဖက်ဒရယ်ဒီမိုကရေစီပြည်ထောင်စုကြီး တည်ဆောက်ရေးဟူသော အန္တိမပန်းတိုင်သို့ ပြည်သူလူထုနဲ့ အတူ လက်တွဲညီညီ မဆုတ်မနစ်သော ဇွဲလုံ့လတို့ဖြင့် အောင်မြင်စွာ ချီတက်နိုင်ပါစေလို့လည်း ဝန်ကြီးချုပ်မန်းဝင်းခိုင်သန်းက သဝဏ်လွှာ ပေးပို့ခဲ့ပါတယ်။
