မြန်မာပြည်သူများအတွက် အမေရိကန်၏သန္နိဋ္ဌာန် ပြောင်းလဲမည်မဟုတ်ဟု နိုင်ငံခြားရေးဝန်ကြီးပြော

▪️အကြမ်းဖက်စစ်ကောင်စီကို ဆက်လက်တရားဝင်မှုမပေးဘဲ လွတ်လပ်ရေးနေ့ဆုတောင်းသဝဏ်လွှာကို မြန်မာပြည်သူများထံပေးပို့

ပိုမိုကောင်းမွန်သောအနာဂတ်တစ်ခုအတွက်မျှော်လင့်ချက်ကို မစွန့်လွှတ်ကြသည့် မြန်မာပြည်သူများအတွက် အမေရိကန်၏သန္နိဋ္ဌာန် ပြောင်းလဲမည်မဟုတ်ကြောင်း အမေရိကန်နိုင်ငံ ခြားရေးဝန်ကြီး အန်တိုနီဘလင်ကန်က ထုတ်ပြန်သည်။

ဇန်နဝါရီ ၄ ရက်တွင်ကျရောက်သော မြန်မာနိုင်ငံလွတ်လပ်ရေးနေ့အတွက် မြန်မာပြည်သူများထံ ပေးပို့သော လွတ်လပ်ရေးနေ့ဆုတောင်းသဝဏ်လွှာတွင် အမေရိကန်နိုင်ငံခြားရေးဝန်ကြီးက ထည့်သွင်းထုတ်ပြန်ခြင်းဖြစ်သည်။

ပုံမှန်အားဖြင့် နိုင်ငံတစ်နိုင်ငံ၏လွတ်လပ်ရေးနေ့ဆု တောင်းသဝဏ်လွှာကို သက်ဆိုင်ရာနိုင်ငံ၏ အကြီးအကဲများ၊ ခေါင်းဆောင်များ သို့မဟုတ် နိုင်ငံခြားရေးဝန်ကြီးဌာနထံ ပေးပို့လေ့ရှိသော်လည်း အမေရိကန်ပြည်ထောင်စုက လက်ရှိနိုင်ငံတော်အာဏာကို တရားမဝင်ရယူထားသည့် အကြမ်းဖက်စစ်ကောင်စီထံ ပေးပို့ခြင်းမရှိဘဲ မြန်မာပြည်သူများထံ ပေးပို့ခြင်းဖြစ်သည်။

Public Service Announcement

“ဒီမိုကရေစီလမ်းကြောင်းပေါ်ပြန်လည်ရောက်ရှိရေး၊ လူ့အခွင့်အရေးကိုလေးစာလိုက်နာရေးနှင့် မိမိတို့နိုင်ငံအတွင်းတရားဥပဒေစိုးမိုးရေးတို့အတွက် ကြိုးပမ်းအားထုတ်နေကြသည့် မြန်မာပြည်သူလူထုကြီးကို မိမိတို့ဂုဏ်ပြုအပ်ပါသည်”ဟု အမေရိကန်နိုင်ငံခြားရေးဝန်ကြီးက ဆိုသည်။

ထို့အပြင် အကြမ်းဖက်မှုများကို ချက်ချင်းရပ်တန့်ရန်၊ မတရားထိန်းသိမ်းထားသူများအားလုံးကို လွှတ်ပေးရန်နှင့် စစ်မှန်ပြီး အားလုံးပါဝင်နိုင်သည့် ဒီမိုကရေစီလမ်းကြောင်းပေါ်သို့ မြန်မာနိုင်ငံကို ပြန်လည်ပို့ဆောင်ရန် စစ်အာဏာရှင်ကို အမေရိကန်က ထပ်မံတောင်းဆိုခဲ့သည်။