ဘုတလင်မြို့မှ စစ်​ကောင်စီတပ်စွဲ​ထား​သော ​ထွေအုပ်ရုံးကို​ ပြည်သူ့ကာကွယ်​ရေးတပ်က လက်နက်ကြီးဖြင့်ပစ်ခတ်တိုက်ခိုက်

စစ်ကိုင်းတိုင်း ဘုတလင်မြို့တွင် အကြမ်းဖက်စစ်ကောင်စီတပ်များ တပ်စွဲထားသော ထွေအုပ်ရုံးအား လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း အထူးဒေသတိုက်ခိုက်ရေးတပ်ဖွဲ့-မုံရွာက ယ​နေ့ သတင်းထုတ်ပြန်သည်။

စစ်ကိုင်းတိုင်း၊ဘုတလင်မြို့နယ် ထွေအုပ်ရုံးတွင် တပ်စွဲထားသည့် စစ်ကောင်စီတပ်သားများသည် ဇန်နဝါရီ ၁၅ရက် နေ့လယ်ပိုင်းက ပြည်သူလူထုလိုက်ပါလာသောခရီးသည်ကားကို လက်ပစ်ဗုံးဖြင့်အကြောင်းမဲ့ပစ်ခတ်ခဲ့သဖြင့် ပြည်သူနှစ်ဦးသေဆုံးကာ ၁၀ဦးဒဏ်ရာရရှိခဲ့သည်ဟုမိမိတို့အထူးဒေသတိုက်ခိုက်ရေးတပ်ဖွဲ့မှ စုံစမ်းသိရှိရ​ကြောင်း ဇန်နဝါရီ ၁၇ ရက်တွင် ထုတ်ပြန်သည့် အထူးဒေသတိုက်ခိုက်ရေးတပ်ဖွဲ့-မုံရွာ၏ ထုတ်ပြန်ချက်တွင် ဖော်ပြသည်။

ထို့​ကြောင့်စစ်ကောင်စီတပ်သားများသည်ထွေအုပ်ရုံးတွင် တပ်စွဲထားကာ မိမိတို့အထူးဒေသတိုက်ခိုက်ရေးတပ်ဖွဲ့-မုံရွာနှင့်မဟာမိတ်ဒေသခံပြည်သူ့ကာကွယ်ရေးတပ်ဖွဲ့တို့မှပူးပေါင်းကာ ၎င်းတို့ရှိသည့်နေရာကို လက်နက်ကြီး၄၀မမဖြင့် ပစ်ခတ်ခဲ့ကြောင်း၊ အဆိုပါပစ်ခတ်မှုကြောင့် စစ်ကောင်စီတပ်သားများသေဆုံးမှုများပြားနိုင်ပြီး မိမိတို့အထူးဒေသတိုက်ခိုက်ရေးတပ်ဖွဲ့နှင့်မဟာမိတ်ဒေသခံပြည်သူ့ကာကွယ်ရေးတပ်ဖွဲ့တို့မှ အထိခိုက်မရှိဆုတ်ခွာနိုင်ခဲ့သည်ဟု အထူးဒေသတိုက်ခိုက်ရေးတပ်ဖွဲ့-မုံရွာ (နာရွဲ့ဆွမ်)က အသိပေးသည်။

ထွေအုပ်ရုံးအား ပစ်ခတ်တိုက်ခိုက်ခဲ့သည့်နေ့ရက်နှင့်အချိန်အား ထုတ်ပြန်ချက်တွင် ဖော်ပြထားခြင်းမရှိဘဲ အထူးဒေသတိုက်ခိုက်ရေးတပ်ဖွဲ့-မုံရွာ (နာရွဲ့ဆွမ်)ထံ People’s Springကဆက်သွယ်မေးမြန်းထားသော်လည်း ပြန်လည်ဖြေကြားခြင်းမရှိသေးပါ။

Public Service Announcement