ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ နယ်မြေ ဖာပွန်ခရိုင်ထဲမှာ စစ်ကောင်စီတပ်တွေဟာ မြေပြင်ကနေ ရိက္ခာပို့ဖို့ခက်နေလို့ ရဟတ်ယာဉ်နဲ့ ရိက္ခာပို့တာတွေ လာရောက်ပို့နေတယ်လို့ ကေအဲန်ယူ မူတြော်သတင်းစဉ်ရဲ့ ထုတ်ပြန်ချက်အရ သိရပါတယ်။
ပြီးခဲ့တဲ့ ဇန်နဝါရီ ၂၉ ရက်က ဖာပွန်ခရိုင် ဘူးသိုမြို့နယ်အတွင်းမှာရှိတဲ့ စစ်ကောင်စီရဲ့ ခေါပုတ်စခန်းမှာ ရဟတ်ယာဉ်နဲ့ ရိက္ခာ လေးကြိမ်လာရောက်ပို့ခဲ့တယ်လို့ ထုတ်ပြန်ချက်မှာ ဖော်ပြထားတာပါ။
ကေအဲန်ယူထိန်းချုပ်နယ်မြေ ဖာပွန်ခရိုင်ထဲမှာ စစ်ကောင်စီတပ်တွေကို KNLA တပ်မဟာ ၅ က ပြောက်ကျားတိုက်ခိုက်မှုတွေ လုပ်ဆောင်ခဲ့ပြီး ဒီလိုကြားဖြတ်တိုက်ခိုက်တာတွေကြောင့် စစ်ကောင်စီတပ်ဟာ မော်တော်ယာဉ်နဲ့ရော ခြေလျင်နဲ့ပါ လာရောက်ပို့ဆောင်လို့မရတော့တဲ့အတွက် အခုလို ရဟတ်ယာဉ်နဲ့ လာရောက်ပို့ဆောင်နေတာ ဖြစ်ပါတယ်။
ဖာပွန်ခရိုင်ထဲက ဖာပွန်-ကတိုင်တိ-ကမောင်းကားလမ်းပိုင်းမှာ ရိက္ခလာပို့တဲ့ စစ်ကောင်စီရဲ့ ရိက္ခာတင်ကားနဲ့ မြင်း၊ လားတွေနဲ့ ရိက္ခာပို့မှုတွေ လုပ်ဆောင်နေတဲ့ စစ်ကောင်စီစစ်ကြောင်းတွေကို KNLA တပ်မဟာ ၅ ကကြားဖြတ်တိုက်ခိုက်မှုတွေ လုပ်ဆောင်ခဲ့တာကြောင့် စစ်ကောင်စီအတွက် ရိက္ခာပို့ဖို့ အခက်အခဲဖြစ်ပေါ်နေတာ ဖြစ်ပါတယ်။
Public Service Announcement
ဖာပွန်ခရိုင်ထဲမှာတော့ အာဏာသိမ်းစစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ တို့အကြား တိုက်ပွဲတွေဟာ နေ့စဉ်လိုလိုဖြစ်ပွားနေပြီး ဇန်နဝါရီလ လဝက်တာအတွင်းမှာ တိုက်ပွဲပေါင်း ၁၀၀ ကျော်ဖြစ်ခဲ့ကာ စစ်ကောင်စီဘက်က အယောက် ၅၀ ကျော် သေဆုံးသွားခဲ့တာဖြစ်ပါတယ်။
