ပြည်သူများကို ဖမ်းဆီး​ငွေညှစ်ရန် အကြံ​ပေး​နေ​သော စစ်​ကောင်စီခန့် အုပ်ချုပ်​ရေးမှူးအိမ်ကို ဗုံး​ဖောက်ခွဲ သတိပေး

မန္တလေးတိုင်း မလှိုင်မြို့နယ်တွင် အပြစ်မဲ့ပြည်သူများအား ဖမ်းဆီးငွေညှစ်ရန် စစ်ကောင်စီအား အကြံပေးနေသည့် အကြမ်းဖက်စစ်ကောင်စီခန့်အုပ်ချုပ်ရေးမှူးတစ်ဦး၏နေအိမ် ဒုတိယအကြိမ်မြောက် ပေါက်ကွဲမှုဖြစ်ပွားခဲ့ကြောင်း ဒေသခံများက ပြောသည်။

ယမန်နေ့ (ဇန်နဝါရီလ ၃၀ ရက်) နံနက် ၆နာရီခွဲခန့်က မလှိုင်မြို့ အမှတ်(၄)ရပ်ကွက်အုပ်ချုပ်ရေးမှူး ဦးမျိုးဝင်း၏အိမ်တွင် ပေါက်ကွဲမှုတစ်ခုဖြစ်ပွားခဲ့ခြင်းဖြစ်ပြီး အဆိုပါအုပ်ချုပ်ရေးမှူးသည် လူမြင်ကွင်းသို့သွားလာခြင်းမပြုဘဲ အပြစ်မဲ့ပြည်သူများကို ဖမ်းဆီးငွေညှစ်ရန်အတွက် အကြမ်းဖက်အာဏာလုစစ်ကောင်စီကို နောက်ကွယ်မှအကြံပေးမှုများ ပြုလုပ်နေသူဖြစ်၍ ဖောက်ခွဲမှု ပြုလုပ်လိုက်ခြင်းဖြစ်ကြောင်း မလှိုင်မြို့နယ်အခြေစိုက်စစ်အာဏာရှင်ဖြုတ်ချရေးမြို့ပြပြောက်ကျားတော်လှန်ရေးအင်အားစုက သတင်းထုတ်ပြန်သည်။

“အဲဒီအုပ်ချုပ်ရေးမှူးအိမ်ကိုပဲ လွန်ခဲ့တဲ့ငါးလလောက်ကလည်း ဗုံးနဲ့တစ်ကြိမ်အပစ်ခံခဲ့ရသေးတယ်။ ဘယ်အဖွဲ့ကလုပ်သွားတယ်လို့တော့ မသိရဘူး”ဟု မလှိုင်ဒေသခံတစ်ဦးက ​ပြောသည်။

အဆိုပါအုပ်ချုပ်ရေးမှူးအိမ်ကို ဖောက်ခွဲမှုပြုလုပ်ရာတွင် ၎င်း၏မိသားစုဝင်များ ထိခိုက်မှုမရှိအောင်စီမံ၍ ဖောက်ခွဲမှုပြုလုပ်ခဲ့ခြင်းဖြစ်ကြောင်း၊ နောက်နောင်အရေးယူမှုများ ပြုလုပ်ရာတွင် “အရေးယူခြင်းခံရမည့်သူ၏ မိသားစုဝင်များ မထိခိုက်ရေး” ဆိုသည့်အချက်ကို ထည့်သွင်းစဥ်းစားတော့မည်မဟုတ်ကြောင်း စစ်အာဏာ ရှင်ဖြုတ်ချရေးမြို့ပြပြောက်ကျားတော်လှန်ရေးအင်အားစုက သတိပေးခဲ့သည်။

Public Service Announcement

ဇန်နဝါရီ ၂၉ ရက် ည ၇ နာရီခွဲခန့်အချိန်က မလှိုင်မြို့နယ်စည်ပင်သာယာရေးအဖွဲ့ရုံး၌ ပေါက်ကွဲမှုဖြစ်ပေါ်ခဲ့ပြီး စည်ပင်ရုံးဝန်ထမ်းများသည် ပြည်သူအပေါ်မောက်မာစွာဆက်ဆံခြင်း၊ ဖိအားပေးခြိမ်းခြောက်ခြင်းများ ပြုလုပ်နေ၍ သတိပေးဖောက်ခွဲခဲ့ကြောင်း မလှိုင် ပြည်သူ့ကာကွယ်​ရေးတပ်ဖွဲ့ (MPDF)က အသိပေးခဲ့သည်။